سەيداحمەت بەردىقۇلوۆ اتىنداعى سىيلىقتىڭ لاۋرەاتتارى انىقتالدى

مادەنيەت جانە سپورت مينيسترلىگىندە سپورت ءجۋرناليسى، پۋبليتسيست جانە قوعام قايراتكەرى سەيداحمەت بەردىقۇلوۆ اتىنداعى جىل سايىن وتەتىن بايقاۋ قورىتىندىلاندى، دەپ حابارلادى سپورت جانە دەنە شىنىقتىرۋ ىستەرى كوميتەتىنىڭ ءباسپاسوز قىزمەتى.

جىل سايىن ءداستۇرلى تۇردە ۇيىمداستىرىلىپ كەلە جاتقان بايقاۋعا بيىل ەلىمىزدىڭ ءار وڭىرىنەن 27 ۇمىتكەر قاتىسىپ، ولاردان گازەت جانە سايت، تەلەۆيدەنيەدە جارىق كورگەن 118 جۇمىس كەلىپ ءتۇستى. قازاق تىلىندە 15، ورىس تىلىندە 12 جۋرناليست جۇمىسىن تاپسىردى. قازىلار القاسىنىڭ شەشىمىمەن جىلىنا ءبىر رەت ءۇش جەڭىمپازعا تاپسىرىلاتىن سىيلىققا «قازاق سپورتى» گازەتىنىڭ ءتىلشىسى وڭداسىن ەلۋباي «ۇزدىك باسپا جاريالانىمى» نوميناتسياسىندا ۇزدىك شىقسا، «كوستانايسكي سپورت» گازەتىنىڭ ءتىلشىسى سەرگەي بيركلە ورىس ءتىلدى جۋرناليستەر اراسىندا «ۇزدىك باسپا جاريالانىمى» اتالىمىندا ۇزدىك اتاندى. «ۇزدىك تەلەۆيزيالىق جۇمىس» نوميناتسياسىندا  Qazsport ارناسىنىڭ ءتىلشىسى تيمۋر سۇلەيمەنوۆتىڭ جۇمىسى لايىقتى دەپ تانىلدى.

بايقاۋدىڭ ۇزدىكتەرىن قىدىربەك رىسبەك، دۇرالى دۇيسەباي، بەكەن قايرات ۇلى، قانات بازىلحان،  نۇرعازى ساساەۆ سەكىلدى سپورت جۋرناليستيكاسىنىڭ مايتالماندارى انىقتادى.

جەڭىمپازدار «سەيداحمەت بەردىقۇلوۆ اتىنداعى سىيلىقتىڭ لاۋرەاتى» ارنايى توسبەلگىسىمەن ماراپاتتالىپ، ديپلوم مەن اقشالاي سىيلىققا يە بولادى.

ۇزدىكتەر كەلەسى جىلى س.بەردىقۇلوۆ اتىنداعى جۋرناليستەر اراسىندا وتەتىن فۋتبول تۋرنيرىندە ماراپاتتالادى.