Qabanbaı batyr memorıaly máresine jetti

Semeıde dańqty qolbasshy, daraboz batyr Qarakereı Qabanbaıǵa arnalǵan «Qabanbaı batyr memorıaly sambo kúresinen Qazaqstan Respýblıkasynyń Kýbogy» óz máresine jetti. Bul týraly Jaqsylyq Úshkempirov atyndaǵy Semeı sport akademııasy.

Jaqsylyq Úshkempirov atyndaǵy Semeı sport akademııasy jáne Shyǵys Qazaqstan oblystyq sporttyq jáne jaýyngerlik sambo federaııasynyń uıymdastyrýymen ótken jarys bıyl 20-shy márte jalaýyn kóterdi. Ulan – ǵaıyr atyraptan ulylar eline jınalǵan sambo sheberleri Semeıdiń tórine tóselgen bozkilemniń kórigin qyzdyrady. Erler, áıelder jáne jaýyngerlik sambodan synǵa túskender 9 salmaqta baq synady. Aıta keteıik, bıyl atalǵan jarysqa 13 komandadan 300-den astam balýan jınaldy. Nur-Sultan men Almaty qalalary,

Almaty, Aqtóbe, Batys Qazaqstan, Jambyl, Qaraǵandy, Qostanaı, Qyzylorda, Mańǵystaý, Pavlodar, Túrkistan, Shyǵys Qazaqstan oblystarynan kelgen kil myqtylar ózara kim myqtyny anyqtady.

Jarystyń ashylý saltanatynda Semeı qalasy ákiminiń orynbasary Qanat Ádilbaev, Qazaqstanǵa eńbegi sińgen qoǵam qaıratkeri Qusman Shalabaev quttyqtaý sóz sóıledi.

«Qabanbaı batyr memorıaly sambo kúresinen Qazaqstan Respýblıkasy Kýbogynyń» ótýine demeýshilik jasap jáne uıymdastyrýdyń únemi basy-qasynda júrgenderge Qazaqstandyq sporttyq jáne jaýyngerlik sambo federaııasynyń jáne Shyǵys Qazaqstan oblystyq sporttyq jáne jaýyngerlik sambo federaııasynyń  marapattary tabystaldy.

«Bul jarys jyl saıyn joǵary deńgeıde ótedi jáne jyldyń qorytyndy dep esepteýge bolady. Barlyq komanda ózderiniń myqty balýandaryn ákeldi. Shyǵys Qazaqstan, Qaraǵandy, Almaty, Aqtóbe oblystarynyń balýandarynyń daıyndyqtary joǵary boldy. Qyzylorda, Túrkistan oblystarynyń qyzdary da jaqsy nátıje kórsetti», – deıdi jarystyń bas tóreshisi Seısenbaı Janasylov.

Alǵashqy eki kúnde Qabanbaı batyr memorıaly úshin jeke salmaqtarda kúreskender ózara jeńimpazdardy anyqtady. Úshinshi kúni sambo kúresinen Qazaqstan Respýblıkasynyń Kýbogy sarapqa salyndy. Komandalyq saıysta erler arasynda Shyǵys Qazaqstan oblysy birinshi, Aqtóbe oblysy ekinshi, Almaty qalasy úshinshi orynnan kórinse, áıelder arasynda Túrkistan oblysy birinshi, Qyzylorda oblysy ekinshi, Shyǵys Qazaqstan oblysy úshinshi orynǵa turaqtady. Jaýyngerlik samboda Qostanaı oblysy qarsylas shaq keltirmeı tuǵyrdyń bıik satysynan kórinse, Qaraǵandy jáne Shyǵys Qazaqstan oblysy ekinshi jáne úshinshi oryndy bólisti. Jalpy komandalyq esepte Shyǵys Qazaqstan oblysy birinshi, Túrkistan oblysy ekinshi jáne Aqtóbe oblysy úshinshi oryn aldy.

Jeke salmaqta áıelder arasynda Jadyra Paıyz, Aıjan Jylqybaeva, Marjan Bızaq, Bota Ońǵarsyn, Arýjan Sátova, Gúldaraıym Almaǵanbet, Arýjan Baızaq, Mereke Qudaıbergenova, Merýert Ábýbákir top jardy. Erler arasynda Arman Turýmbetov, Qylysh Erenǵaıypov, Rahat Jananıet, Aıan Qurmanbek, Arman Taıbaǵarov, Rýslan Jarqynbaev, Ǵabıt Dáýletbaev, Batyrhan Júnisov, Ádil Orazbaev oza shapty. Jaýyngerlik sambodan synǵa túskender ishinde Ánýar Káribaev, Aıbek Janbolatuly, Baqytjan Ǵumyr, Amanjol Haısa, Nurbol Qulbekov, Ahmat Boboev, Ýmar Iankovskıı, Álibek Temirbaev, Talǵat Jıentaevtardyń baby kelisip, baǵy jandy.