«Real» – Ispanııa Sýperkýbogynyń ıegeri!

Keshe Saýd Arabııasynyń Jıdda qalasynda fýtboldan «Real» ( Madrıd) men «Atletıko» (Madrıd) klýbtarynyń arasynda Ispanııanyń Sýperkýbogy úshin fınaldyq matchtyń bolǵanyn bilesizder. Endi mine, keshegi oıynnan jaqsy áser alyp, Ystambuldyń áýejaıynda astanamyzǵa baratyn ushaqty kútip otyrmyn. Osy oıyn týraly úıge jetsem asyqpaı jazamyn dep oılaǵan edim. Biraq sapardan áserim jaqsy bolǵanymen kóp jaza almaıtyn sııaqtymyn. Onyń ornyna fotolar men vıdeolardy sóıletip, solarǵa az-maz óz oıymdy qosa ketýdi jón kórip otyrmyn.

Keshegi biz barǵan «King Abdullah Sports city» ( «Abdolla Koroldiń sport qalasy») stadıony sońǵy úlgide salynǵan arena eken. Ol shamamen 60 myńnan astam jankúıerge arnalǵan. Arabtar sport ordasyn óte jaqsy salypty. Stadıonda kerek dúnıeniń bári bar. Biz Azııa sport baspasózi assoıaııasynyń shaqyrýymen kelgen soń saýdıtter Qazaqstanǵa qurmet kórsetip, eń jaqsy oryndaryn berdi. Bizden basqa matchty Pıreneı túbeginen arnaıy kelgen jankúıerler de tamashalady. Olar Jıddada 8 qańtardan beri júr eken. Sol kúni Ispanııa Sýperkýbogy úshin «Tórttiktiń týrnıri» bastalǵan bolatyn. Endi oıyn týraly ne aıtýǵa bolady? Maǵan mysaly, birinshi, ekinshi taım qyzyqsyz kórindi. Komandalar shabýyldap, esepti birinshi ashqylary kelip, qaýipti jaǵdaı jasaǵanymen bir-birine gol soǵa almady. Matchtyń negizgi ýaqyty aıaqtalyp, qosymsha berilgen ekinshi 15 mınýtta «Atletıkonyń» jeńiske jetýge tamasha múmkindigi boldy. Eger «Realdyń» qorǵaýshysy qaqpashymen birge-bir shyǵyp bara jatqan «Atletıkonyń» shabýylshysyn qulatpaǵanda Zıdannyń oıynshylary jer sıpap qalar edi. Biraq, «Realdyń» oıynshysy qarsylasyn aıaqtan shalyp, komandanyń qaqpasyn aman alyp qaldy. Sóıtip, qarsylastar dopty temir torǵa týlataı almaı, teń eseppen tarqasty. Sodan keıin kezek penaltı serııasyna keldi. Munda «Atletıkonyń» júıkesi syr berse, «Realdyń» oıynshylary tórt doptyń bárin nysanaǵa dál tıgizip, jeńisti sýyryp áketti.

Al «Atletıko» klýby Sýperkýbokty ala almaı ketti. Jalpy, matchtyń 90 mınýty asa qyzyqty bolmasa da oıynshylar saýatty oıyn órnegin kórsetip, jankúıerlerge tamasha syı jasady.

Arabtar fýtboldy jaqsy kóredi eken. Qazir Saýdııada sporttyń osy túrin damytý qolǵa alynǵan. Saýdıtter teńbil dop ónerin eldiń tórt buryshyna keńinen nasıhattap, damytý úshin osyndaı úlken týrnırlerdi ótkizip keledi.
Keshegi matchtyń úzilisinde eki kezdesý ótkizdim. Aldymen meni osy saparǵa shaqyrǵan Azııa sport baspasózi assoıaııasynyń ókili saýdıt Abdollamen kezdesip, oǵan kádesyılardy berdim.

Ol bizdi jyly qarsy alyp, ózderiniń jumysy týraly aıtty.

–Bizdiń shaqyrýdy qabyldap, Ispanııa Sýperlıgasyna kelgenderińe rahmet! Azııa sport baspasózi qaýymdastyǵy aldaǵy kezde de qazaq áriptesterimen tyǵyz baılanysta jumys isteı beredi. Biz birigip jumys istesek, eki jaqqa da tıimdi bolady. Sondyqtan dostyǵymyz uzaǵynan bolsyn, – dedi ol.

Biz de úzilis kezinde ýaqyt sozbaı, qazaq jýrnalısteriniń Saýd Arabııa eliniń aqparat quraldarymen, Azııa sport baspasózi assoıaııasymen baılanysqa múddeli ekenin, eki jaq tyǵyz qarym-qatynasta bolsa alynbaıtyn qamaldyń bolmaıtynyn aıttym. Odan ári Abdollaǵa kádesyıdy syıǵa tarta otyryp, kartınada sýrettelgen qazaq batyrynyń ejelden beri keń dalamyzdy qorǵap kelgenin, qazaqtar úshin jylqy arabtarǵa sııaqty eń qurmetti janýar ekenin, bizdiń ata-babamyz ony tórt túliktiń tóresi dep baǵalap, erekshe jaqsy kórgenin atap óttim.

–Sizge bul syılyqty berip jatqanymnyń máni men mańyzy bar. Atqa otyrǵan batyrdy syılaǵanymnyń sebebi, arabtar da óz elinde eshqashan attan túspeı, bılikti árqashan óz qoldarynda ustap otyrsyn degenim. Ekinshiden, qazaqtyń kıiz úıin de syılap jatqanym, shańyraqtaryńyz bıik bolsyn, onyń keregesi keń, terezesi teń, bosaǵasy berik bolsyn degen nıetpen berip otyrmyn. Arab elderi árqashan birlikte bolsyn! Islam elderi osyndaı shańyraqtyń astynda yntymaqtastyqta, bir-birimen jaqsy qatynasta ómir súrsin degen tilekpen osy kádesyıdy syılaımyn, — dedim. Saýdıtter osyǵan rıza bolyp, syı-sııapatqa alǵysyn bildirdi.

«Kóńil kóńilden sý ishedi», demekshi odan keıin Ispanııa Sýperkýbogy úshin týrnırdi uıymdastyrýshylardyń biri Lama hanymmen áńgimelesip, oǵan da kádesyılardy syıǵa tarttym. Bizben áńgimede Lama hanym da Qazaqstandy jaqsy biletinin, aldaǵy ýaqytta baılanysty damyta berý kerek degen tilegin jetkizdi.

Osylaısha Saýd Arabııasyna sapar aıaqtaldy. Sizderge Arab túbeginen bergen qysqasha aqparatym osy. Amandyqta kezdeseıik!

Dastan KENJALIN,

JIDDA – YSTAMBUL