اتا-انالار «ۇلگى بول» ەستافەتاسىن باستادى

كارانتين كەزىندە اتا-انالار بالالارىنىڭ بوس ۋاقىتىن پايدالى وتكىزۋگە تىرىسۋدا، دەپ حابارلادى ءبىلىم جانە عىلىم مينيسترلىگى «ۇلتتىق عىلىمي-پراكتيكالىق دەنە تاربيەسى ورتالىعى» رەسپۋبليكالىق مەملەكەتتىك قازىنالىق كاسىپورىننىڭ ءباسپاسوز قىزمەتى.

ۇرپاق قامىن ويلاۋ  — بۇكىل قاۋىمعا ورتاق پارىز. وسكەلەڭ ۇرپاق — ەلىمىزدىڭ ەرتەڭى، كەمەل كەلەشەگى. اسىرەسە، ەر ادامنىڭ تاربيەسى مەن ونەگەسى جوعارى باعالانادى. ويتكەنى ەر كىسىنىڭ ويى ارقاشاندا نىق،  زەيىندى كەلەدى. ەر ازاماتتى  ابىرويى، نامىسى، قايراتتىلىعى  ەرەكشەلەپ تۇرادى.

«اكە – اسقار تاۋ، انا – باۋرايىنداعى بۇلاق، بالا – جاعاسىنداعى قۇراق»، دەگەن ءبىر اۋىز سوزگە بۇكىل تاربيەنىڭ باستاۋىن دانا حالقىمىز سىيعىزا بىلگەن.

قازىرگى تاڭدا جاھاندى جايلاعان ىندەتكە بايلانىستى ەلىمىزدە دە قاۋىپسىزدىك شارالارى قابىلدانىپ، بارلىق ءبىلىم بەرۋ جۇيەسى قاشىقتان وقىتۋعا كوشكەن. وسى ورايدا، ۇستازداردىڭ جاڭا زاماننىڭ تەحنولوگيالارىن جەتە مەڭگەرۋى، قاشىقتان وقۋشىلار مەن ستۋدەنتتەردى ۇيلەستىرۋى باستى نازارعا الىنىپ وتىر. سونىمەن قاتار وتباسىنداعى اتا-انانىڭ بالالارىنىڭ ءبىلىم مەن تاربيەسىمەن اينالىسۋىنا كوڭىل ءبولۋى ءۇشىن ۇلكەن مۇمكىندىك تۋدى.

قازاق «ءبىر اكەنىڭ تاربيەسىن ءجۇز مەكتەپ تە بەرە المايدى»، دەپ جايدان جاي ايتپاسا كەرەك. رەسپۋبليكانىڭ تۇپكىر-تۇپكىرىنەن بالاسىنىڭ دەنە شىنىقتىرۋ ساباعى جاتتىعۋلارىن ءۇي جاعدايىندا ورىنداۋىنا قولداۋ ءبىلدىرىپ، بىرگە سپورتپەن شۇعىلدانىپ جۇرگەن اتا-انالار لەگى ارتۋدا.

ءبىلىم جانە عىلىم مينيسترلىگى «ۇلتتىق عىلىمي-پراكتيكالىق دەنە تاربيەسى ورتالىعىنىڭ» ۇيىمداستىرۋىمەن «سپورت – دەنساۋلىق كەپىلى» چەللەندجى كەڭىنەن تارالىپ، ەندى وتباسىلىق سپورتپەن شۇعىلدانۋعا ناسيحاتتايتىن «ۇلگى بول» ەستافەتاسى  باستاۋ الدى. العاشقىلاردىڭ ءبىرى بولىپ، ورال مەن تاراز، قىزىلوردا قالالارىنىڭ اكەلەرى باستاما كوتەرگەن ەدى.

ءوزىڭىز دە ۇل-قىزىڭىزبەن جاتتىعۋ جاساپ، بەينەماتەريالىن 87766110111 ۋاتساپ نومەرىنە جولداي الاسىز!

 ىسكە ءسات!

ۇلگى بول وتباسىلىق ەستافەتاسىن جالعاستىرعىڭىز كەلسە، #جاتتىعۋ جاساپ، ☎87766110111 whatsapp نومەرىنە جولداڭىز!

#سپورت #مونرك #قاشىقتانوقىتۋ