Beısen Quranbek atyndaǵy jarystyń jalaýy jelbiredi

Taldyqorǵanda buqaralyq aqparat quraldary arasynda shaǵyn fýtboldan belgili jýrnalıst  Beısen Quranbekti eske alýǵa arnalǵan týrnır ótti.

Oǵan Jetisý óńirinen 6 komanda qatysty. Beısen Quranbek jýrnalıstıkadaǵy jolyn «Sport» gazetinde tilshi bolyp  bastaǵan.  Fýtbolshy bolýdy armandaǵan.  Sportty erekshe baǵalady. Salamatty ómir saltyn ustandy. Ustanyp qana qoımaı, aıkıdodan qara belbeý ıegeri bolǵan. Sondyqtan da qazaq jýrnalıstıkasynda ózindik tańbasyn qaldyrǵan tulǵany eske alýǵa arnalǵan jarysty uıymdastyrý kezdeısoqtyq emes.

– Jýrnalıst bolýdy armandaǵan joqpyn, fýtbolıst bolǵym kelgen. Biraq, bola almadym. Áskerden kelgen soń «fýtbolıst bolmasam da, fýtbol týraly jazatyn jýrnalıst bolaıyn» dep oıladym. Sóıtip «Sport»  gazetine jumysqa keldim, – dep aıtqan edi Beısen Quranbek «Aq jelken» men «Ulannyń» jas tilshilerimen kezdesýge kelgeninde.

Jetisý jerindegi jarysty sport jýrnalısi Rıshad Turǵanbaev pen áriptesteri uıymdastyrdy. Bolashaqta jarystyń aýqymyn keńeıtý jospary da bar eken.

–Taldyqorǵanda buqaralyq aqparat quraldary arasynda Baq league jarysy ótip keledi. Sýperkýbok ta ótýi kerek bolǵan. Osy sýperkýbok jarysyn aǵamyz Beısen Quranbekti eske alýǵa arnadyq. Jaqynda ómirden ótken aǵamyz sportty, onyń ishinde fýtboldy jaqsy kórdi. Eńbek jolyn sport salasynan bastaǵan. Sporttaǵy jańalyqtardy maǵan habarlasyp surap otyratyn. Sondyqtan jýrnalıstermen keńese kele jarystyń sýperkýbogyn Beısen Quranbek atyndaǵy kýbok dep atadyq. Bul jarysty keleshekte respýblıkalyq deńgeıde ótkizsek degen de maqsat bar. Biraq kýbok jarysy emes, BAQ arasynda Beısen Quranbek atyndaǵy spartakıada etip jasaý josparda bar. Sebebi aǵamyz bar sport túrine den qoıdy. «Barselona» men Nıderlandy quramasynyń jankúıeri boldy. Fýtbol ǵana emes, aıkıdomen de aınalysqan. Qazaq kúresinen ótkizilgen jarystardy júrgizdi, – deıdi Rıshad Turǵanbaev.
Jarys sanıtarlyq talaptardy saqtaı otyryp ótkizildi. Oıynǵa jankúıerler shaqyrylmaǵan. Ashylý saltanatynda sóz alǵan Almaty oblystyq «Jetisý» telearnasynyń dırektory Serik Ábikenuly Beısen aǵamyz jaıly jyly estelikter aıtyp, oıynnyń sátti ótýine nıettes ekenin bildirdi. Dop dodasynda alǵashqy úsh oıyn olımpıadalyq júıe boıynsha ótti. Iaǵnı, jeńilgen komandalar jarys jolynan shyǵyp otyrdy. Al jeńistiń jelkenin kótergen komandalar aınalmaly júıe boıynsha oıyn ótkizip, jeńimpazdardy anyqtady.

Jarys qorytyndysy boıynsha birinshi oryndy «VIP Press» komandasy qanjyǵasyna baılasa, ekinshi oryndy «Taldy Paris» komandasy enshiledi. Al úshinshi oryn «Baq United» komandasyna buıyrdy. Almas Myrzahmetov («VIP Press») úzdik surmergen atandy. Saıys sońynda jeńimpazdar men júldegerlerge Maqtaý qaǵazy men medaldar, baǵaly syılyqtar tabystaldy. Birinshi oryn alǵan «VIP press» komandasyna Beısen Quranbek atyndaǵy Kýbok berildi. Aıta keteıik, osyǵan deıin Qazaqstan Respýblıkasy Aqparat jáne qoǵamdyq damý mınıstrligi buqaralyq aqparat quraldarynda ózindik sheberligimen kózge túsken jazba jáne elektrondy baspasóz quraldarynda jumys isteıtin jas tilshilerdi qoldaý, shyǵarmashylyq izdenisterin shyńdaýǵa jigerlendirý, kórnekti jýrnalıst Beısen Quranbektiń jarqyn beınesin este qaldyrý maqsatynda jastar arasynda «Jiger» syılyǵyn jarııalaǵan edi.

О́mirbek SANSYZBAI,

ALMATY