گولوۆكين-الۆارەس. ۇيىمداستىرۋشىلار قانشا قارجى تاپتى؟

ورتا سالماقتا WBA (Super)، IBO، WBC جانە IBF بەلبەۋلەرىنىڭ يەگەرى قازاقستاندىق گەننادي گولوۆكين (37-0-1، 33 كو) مەن مەكسيكالىق ساۋل «كانەلو» الۆارەس (49-1-2، 34 كو) جەكپە-جەگىندەگى تورەشىلەردىڭ قانشا قارجى العانى بەلگىلى بولدى.

لاس-ۆەگاستاعى T-Mobile ارەناسىندا وتكەن بوكس كەشىندە دون ترەللا، دەيۆ مورەتتي جانە ادەلايدا بەرد تورەلىك ەتتى. 12 راۋندتىڭ قورىتىندىسى بويىنشا ايقاستىڭ جەڭىمپازى انىقتالماي، تەڭ اياقتالعان بولاتىن.

ادەلايدا بەرد 118-110 ەسەبىن تىركەپ، جەڭىسكە الۆارەس لايىق دەپ تانىعان. ونىڭ بۇل شەشىمى كورەرمەندەر مەن الەمدىك دەڭگەيدەگى ساراپشىلاردىڭ نارازىلىعىن تۋدىرعان ەدى. ال دەيۆ مورەتتي 115-113 ەسەبىمەن قازاقستاندىق بوكسشى جەڭىسكە جەتتى دەپ ەسەپتەدى. ءوز كەزەگىندە دون ترەللا 114-114 ەسەبىمەن تەڭ اياقتالدى دەگەن شەشىم شىعاردى.

Daily Mail-ءدىڭ حابارلاۋىنشا، ءار تورەشى بۇل كەزدەسۋدەن 100-500 مىڭ دوللار ارالىعىندا اقشا تاپقان. الايدا، چەكتى Golden Boy پروموۋتەرلىك كومپانياسى بەرگەننەن كەيىن ناقتى سوماسى ازىرگە بەلگىسىز.

اتالعان باسىلىم وسىعان دەيىن گولوۆكين مەن الۆارەستىڭ تابىسىن دا جاريا ەتكەن. مالىمەتتەر بويىنشا قازاقستاندىق بوكسشى 25 ملن دوللار تاپسا، مەكسيكالىقتىڭ ۇلەسىنە ون ميلليون ارتىق تيگەن.

ال يسپانيانىڭ بەدەلدى Marca.com باسىلىمى PPV اقىلى ترانسلياتسيا ارقىلى قانشا پايدا تۇسكەنىن جاريالاعان. باسىلىمنىڭ اقپارى بويىنشا ۇيىمداستىرۋشىلار 100 ملن دوللار پايدا تاپقان. بۇل تيىسىنشە 1،25 ملن PPV ساتىلىمىنا تەڭ. الايدا، HBO بۇل كورسەتكىش ەكى ملن-نان اسادى دەپ بولجام وتىر.

تاعى ءبىر ايتا كەتەرلىگى، گولوۆكين-الۆارەس جەكپە-جەگى T-Mobile ارەناسىندا كورەرمەندەر سانى بويىنشا جاڭا رەكورد ورناتتى. Los Angeles Times ءتىلشىسى لەنس پاگمايەردىڭ ايتۋىنشا، ۇيىمداستىرۋشىلار بيلەت ساتۋ ارقىلى 30 ملن دوللار قارجى تاپقان.