Túlekterdiń Táýelsizdik kúnine tartýy

Qaıta oralamas stýdenttik shaqtaryn birge ótkizgen dostaryń esińnen máńgi ketpeıdi. Sol bir jalyn atqan jas kezde ómirdiń qyzyǵy men shyjyǵyn birge ótkergen dostarynan keıbir azamattar qol úzip aralaspaı ketse, keıbiri  tipti otbasylarymen aralasyp kópke úlgi bolyp júr.

Oralhan Bókeev: «Sábeń úlken bilim berer orta mektep bolsa, Muqań akademııa ǵoı. Mektepte bári oqyp shyǵady, al, akademııaǵa ekeniń biri túse almaıdy», degen eken. Sol sekildi rasymende joǵary oqýǵa  saýaty zor, bilim ushqyr jastar túsedi desek, bizdiń áńgime etkele otyrǵan 1979 – 1983 jylǵy Qazaqtyń Deneshynyqtyrý jáne Sport ınıstıtýtynyń túlekteri sol kezde bilim qýyp kelip, bastary bir oqý ordasynda qosylǵan jastary bolatyn.

Búginde sol ózderi oqyp támamdaǵan ınstıtýttyń bilikti mamandary retinde barlyǵy sport salasynda eńbek etip keledi. Olardyń jıi kezdesip, ótken kúnderin saǵyna eske alyp, kún uzaq áńgime aıtyp otyryp qalatyn kezderi de bolady. Al, búgingi bas qosýlaryn erekshe dep aıtýǵa bolady. О́ıtkeni, alda kele jatqan Táýelsizdik kúnine oraı 1983 jyldyń túlekteri túgeldeı jınalyp,  Kárken Ahmetov atyndaǵy Olımpıada rezervi respýblıkalyq mamandandyrylǵan mektep-ınternat kolledjine kelip, mektep aýlasyndaǵy «Dostyq alleıasyna» qaz-qatar shyrshalar otyrǵyzdy.

Osyndaı iske uıytqy bolǵan aıtýly mektep-ınternattyń dırektory Seıilhan Baqtyǵalıuly Qaraqovtyń ózi bel sheship kirisken ıgilikti shara, kóńildi kúımen  jarasymyn tapty.

«Keshegi jas, búgin dana», demekshi 1983 jylǵy túlekterdiń árqaısysy ár sport  túrin aıaqtap, jasóspirimderge bar tájirbıelerin úıretip júrgen óz salasynyń bilikti mamandary. Aıtalyq, Seıilhan Qaraqov – sambo, Danara Baıdosova (aty áıgili Qabden Baıdostyń týǵan qyzy) – semserlesý, Leonıd Pak– boks, Iýrıı Kýzmın – fýtbol, Dýlat Turlyhanov pen Jańabaı Ospanov – grek-rım kúresi,  Vladımır Dostavalov – Sporttaǵy qaýipsizdikti qamtamasyz etý, búginde Tótenshe Jaǵdaılar qyzmetiniń polkovnıgi, zeınette. Mine, osyndaı qazaq sportynyń damýyna bar úlesin qosyp júrgen atpal azmattar ózderiniń joǵary oqý ornyn oqyp bitirgenderine 40 jyl tolý qarsańynda  osyndaı shyrsha otyrǵyzyp kópke úlgi-ónege bolyp otyr.

Negizi hadıste, «Otaý tik, aǵash otyrǵyz, urpaq ósir», degen asyl sózder bar. Rasymende, aǵash otyrǵyzý ol aınalanyń aýasyn tazartyp qana qoımaı bolashaq urpaq úshin ıgiligi zor is. Sondyqtan da, Táýelsizdik kúnine qatysty aǵash otyrǵyzǵan 1983 jylǵy túlekterdiń bul qadamyn «Jaraısyzdar aǵalar!», dep qol soqsa bolar. Yntymaǵy  uıysqan aǵa býyndardyń jumyla, jabyly tikken shyrshalary bolashaqtyń shyrshasy bolyp máńgi qalary sózsiz. Urpaqqa úlgi osyndaı izgi sharalar kóp bolsa eken.

Aqyn ORDABAIULY,

ALMATY