SportPress.kz قازاقستان سپورت جاڭالىقتارى
بۇگىن الماتى وبلىسى، ەڭبەكشىقازاق اۋدانى، شەلەك اۋىلىندا بوكستان جاسوسپىرىمدەر اراسىندا رەسپۋبليكالىق اشىق تۋرنير مارەسىنە جەتتى.
كيكبوكسينگتەن الەم كۋبوگىنىڭ يەگەرى، ەكى دۇركىن ەۋروپا چەمپيونى، ازيا بىرىنشىلىگىنىڭ جەڭىمپازى، قازاق سپورتىنا ەڭبەك سىڭىرگەن قايراتكەر ەلمۇرات قايىپجانوۆتىڭ جۇلدەسىنە ارنالعان دوداعا ەلىمىزدىڭ ءار ايماعىنان 100-دەن اسا ءجاسوسپىرىم بوكسشى قاتىستى. تارتىسقا تولى وتكەن ءتۋرنيردىڭ
چەمپيوندارى «سپورت شەبەرلىگىنە ۇمىتكەر» اتاعىن الدى. ودان بولەك جەڭىمپازدار مەن جۇلدەگەرلەرگە الماتى وبلىستىق دەنەشىنىقتىرۋ باسقارماسىنىڭ ديپلومى مەن دەمەۋشىلەر ۇسىنعان باعالى سىيلىقتار تارتۋ ەتىلدى.
ەل سپورتىنىڭ وركەندەۋىنە ولشەۋسىز ۇلەس قوسىپ جۇرگەن دۇنيەجۇزىلىك «جەكپە-جەك» قاۋىمداستىعىنىڭ پرەزيدەنتى سابىرجان ماحمەتوۆ «الاش پرايد» كلۋبىنىڭ پرەزيدەنتى دانيار قاسقاراۋوۆ، بىلىكتى باپكەر تۇرسىنعالي ەدىلوۆ سىندى ازاماتتار قۇرمەتتى قوناق بولىپ، جاس بوكسشىلاردىڭ ونەرىن تاماشالادى. الماتى وبلىسى، ەڭبەكشىقازاق اۋدانى تىزگىن ۇستار ازاماتتارى اۋدان اكىمدىگى اتىنان ەلمۇرات مۇقاش ۇلىنا وقالى شاپان جاۋىپ قۇرمەت-قوشەمەتتەرىن كورسەتتى.
«بىلتىر دا ءوتۋى ءتيىس ەدى، پاندەميانىڭ كەسىرىنەن جۇزەگە اسپاي قالدى. مىنە، ەندى الماتى وبلىسى كارانتيندىك شەكتەۋدىڭ سارى ايماعىنا ءوتىپ، تالاپتار جەڭىلدەگەن سوڭ جارىستار ۇيىمداستىرىلا باستادى. تۋرنيرگە قاتىسقان جاسوسپىرىمدەردىڭ اراسىندا تالانتتى بوكسشىلار ءوسىپ كەلەدى ەكەن. سولاردىڭ ايقاسىن كورىپ، كوڭىلىمىز مارقايدى. جاستاردى جانىپ، قايرايتىن نارسە – جارىس. مۇنداي تۋرنيرلەردىڭ اۋىلدىق جەردە ءجيى ءوتۋى تالانتتاردىڭ تۇما بۇلاعىن اشۋعا وراسان سەپتىگىن تيگىزەدى»، دەيدى ءتۋرنيردىڭ ۇيىمداستىرۋشىسى ەرجان نۇرحالىقوۆ.
قۋانىش رازاق،
الماتى وبلىسى،
ەڭبەكشىقازاق اۋدانى،
شەلەك اۋىلى
