جايىق جاعاسىنداعى جاستار جارىسى

اتىراۋ قالاسىندا كيكبوكسينگتەن  جاستار اراسىندا ەل بىرىنشىلىگى مارەسىنە جەتتى. «اتىراۋ» سپورت كەشەنىندە بەس كۇنگە سوزىلعان  چەمپيوناتقا 14 وبلىستان 200-گە تارتا جاس  سپورتشى قاتىستى. 

ەل تاۋەلسىزدىگىنىڭ 30 جىلدىق مەرەيتويىنا ورايلاستىرىپ ۇيىمداستىرىلعان دودادا اتىراۋ وبلىسى  اكىمىنىڭ ورىنباسارى  باقىتگۇل حامەنوۆا ءسوز سويلەپ، جاس سپورتشىلارعا جەڭىس تىلەدى. كيكبوكسينگ فەدەراتسياسىنىڭ پرەزيدەنتى تاستانبەك ەسەنتاەۆ وبلىس باسشىلىعىنا اۋقىمدى شارانى ويداعىداي وتكىزگەنى ءۇشىن العىسىن جەتكىزدى.  مادەنيەت جانە سپورت مينيسترلىگى مەن اتىراۋ وبلىسى اكىمدىگى بىرلەسىپ ۇيىمداستىرعان ەل بىرىنشىلىگىندە 2003 – 2004 جىلى تۋعان ءجاسوسپىرىم سپورتشىلار جۇلدە جولىندا بارىن سالدى.

قازاقستان بىرىنشىلىگىنە قۇرمەتتى قوناق رەتىندە قاتىسىپ، كورەرمەن بولعان الەم چەمپيوندارى  ەرلان شاعبان، فازليددين ساپاروۆ، جاندوس نازاربەكوۆ وكشەباسار ىنىلەرىنىڭ ىشىندە تالانتتى شوعىر ءوسىپ كەلە جاتقانىنا قۋانىشتى ەكەنىن    ايتتى. اتىراۋ وبلىستىق كيكبوكسينگ فەدەراتسياسى  بىرىنشىلىكتىڭ قۇرمەتتى قوناقتارىنا وقالى شاپان جاۋىپ سىي-سياپات تارتۋ ەتتى.

بىرىنشىلىك  جەڭىمپازدارى مەن جۇلدەگەرلەرى  باعالى سىيلىق جانە ديپلوممەن ماراپاتتالىپ، كەلەشەكتە  الەمدىك دودالاردا ەل  سەنىمىن ارقالاۋ مۇمكىندىگىنە يە بولدى.

قۋانىش كوشىمباي،

 اتىراۋ قالاسى