SportPress.kz قازاقستان سپورت جاڭالىقتارى
الماتى قالاسىندا «الماتى تۋرى – 2017» حالىقارالىق كاسىپقوي كوپكۇندىك شوسسە ۆەلوجارىسىنىڭ بەسىنشى، مەرەيتويلىق نۇسقاسىن وتكىزۋگە وراي رەسمي ءباسپاسوز ءماسليحاتى ءوتتى.
بيىل «الماتى تۋرى» حالىقارالىق جارىسى مەرەيتويلىعىمەن عانا ەمەس فورماتىمەن دە ەرەكشەلەنىپ وتىر. ۆەلوسيپەدشىلەردىڭ حالىقارالىق وداعى (UCI) رەگلامەنتى بويىنشا شوسسەدەگى كوپكۇندىك ۆەلوجارىسى جاڭا ستاتۋسىن الدى.
ءباسپاسوز ءماسليحاتىندا الماتى قالاسى دەنە شىنىقتىرۋ جانە سپورت باسقارماسىنىڭ جەتەكشىسى ءابىل دونباەۆ، قازاقستان ۆەلوسيپەد سپورت فەدەراتسياسىنىڭ ۆيتسە-پرەزيدەنتتەرى امانبەك قۇلشىقوۆ پەن الەكساندر ۆينوكۋروۆ، UCI تەحنيكالىق كونسۋلتانتى پەر حاتسەباۋت، سونداي-اق، «Astana Pro Team» كومانداسىنىڭ ۆەلوشاباندوزدارى الەكسەي لۋتسەنكو مەن ياكوب فۋلسانگ ءسوز سويلەدى. جيىن بارىسىندا ولار بەسىنشى «الماتى تۋرىنىڭ» ەرەكشەلىكتەرى، جارىستىڭ جاڭا فورماتى، قاتىسۋشى كوماندالار مەن قالانىڭ دايىندىعى تۋرالى ايتىپ بەردى.
«الماتى تۋرى – 2017» العاش رەت ەكى كەزەڭ بويىنشا وتەدى. وتكەن جىلدارى حالىقارالىق ۆەلوجارىس «كريتەريۋم» فورماتىندا ءوتىپ كەلدى، قاتىسۋشىلار بۇل كەزدە اينالما مارشرۋتتى قايتا-قايتا اينالىپ وتكەن. ال بيىل ۆەلوشاباندوزدار سورەدەن مارەگە دەيىنگى قاشىقتىقتى وتكەرۋى قاجەت، ولاردىڭ اراسىندا جاتقان قالالىق جولدىڭ قاشىقتىعى جۇزدەن اسا شاقىرىمدى قۇرايدى.
«الماتى تۋرى – 2017» جارىس جولى ءتۇرلى لاندشافتتا جاتىر. ناقتىراق ايتار بولساق، ۆەلوجارىستىڭ نەگىزگى بولىگى – الماتى قالاسىنىڭ اسفالت توسەلگەن كوشەلەرى، ال مارەگە جەتەتىن بولىگى تاۋلى ايماق – «مەدەۋ» مۇز ايدىنىنىڭ اۋماعى.
ەكىنشى كەزەڭنىڭ مارەسى «مەدەۋدە» ورنالاسقان جول جايلى الەكساندر ۆينوكۋروۆ ايتىپ بەردى: «قيىن جول. بىرەۋلەر وڭاي دەپ ويلاپ قالۋى مۇمكىن، بىراق 160 شاقىرىم ءجۇرىپ وتكەننەن كەيىن جولى تىك ەمەس تراسسامەن مارەگە جەتۋ قيىن بولادى. تىكۇشاقتان جاسالاتىن ترانسلياتسيادان تاۋلارىمىزدى كورسەتەدى. ۆەلوسپورتتىڭ باسقا سپورت تۇرلەرىنەن ايىرماشىلىعى وسى عوي – جارىس ءوتىپ جاتقان ەلدىڭ پەيزاجىن تاماشالاۋعا بولادى»، دەدى ول.
«الماتى تۋرىنىڭ» ءبىرىنشى كەزەڭى 30 قىركۇيەكتە «استانا» الاڭىنىڭ ماڭىندا، قازاق-بريتان تەحنيكالىق ۋنيۆەرسيتەتى تەرريتورياسىنان باستاۋ الادى. «قالالىق اينالىم» تولە بي، فۋرمانوۆ، ساتباەۆ، بايزاقوۆ كوشەلەرىن، اباي داڭعىلىن جانە جەلتوقسان كوشەسىن قامتيدى. مارە «الماتى ارەنا» تەرريتورياسىندا ورنالاسقان. جارىستىڭ ەكىنشى كەزەڭى، 1 قازاندا «حالىق ارەنا» عيماراتىنىڭ ماڭىنان باستالادى دا، ۆەلوشاباندوزدار «شىعىس اينالما جولى – ءال-فارابي» شەڭبەرىمەن ءجۇرىپ وتەدى، ال فينالدىق بولىگى تۇڭعىش پرەزيدەنت ساياباعىنان «مەدەۋ» مۇز ايدىنىنا دەيىن جالعاسىپ، وسىندا مارە نۇكتەسى ورنالاسادى.
«الماتى تۋرى – 2017» قالالىق تىرشىلىك جاعدايىنا بەيىمدەلگەن بولادى. بىرىنشىدەن، ۆەلوجارىستىڭ سورە مەن مارە نۇكتەلەرى بەلگىلى ءبىر عيماراتتاردىڭ ماڭىندا ورنالاسادى، ياعني كوشەلەر مەن جولدار قامتىلمايدى. ەكىنشىدەن، بيىل جولداردى جابۋ پروتسەسى ديناميكالىق ءارى جىلدام ىسكە اسىرىلادى. قاتىسۋشىلار بەلگىلى ءبىر كوشەگە جەتىپ، مەجەگە جەتكەننەن كەيىن جولدار قايتا اشىلىپ وتىرادى. سونىمەن قاتار، «الماتى تۋرى — 2017» كورەرمەندەرى مەن جانكۇيەرلەرىن قالادان ۆەلوجارىس مارەسى ورنالاسقان «مەدەۋ» مۇز ايدىنىنا جەتكىزەتىن كولىك ۇيىمداستىرىلادى.
«كەيبىر جولدار جابىلاتىندىقتان قالا تۇرعىندارىنا ىڭعايسىزدىق تۋىندايدى، بىراق وعان قاراماستان الماتى قالاسىنىڭ اكىمشىلىگى «الماتى تۋرىن» بارىنشا قولداپ، كومەكتەسىپ جاتىر. جۇرت «الماتى تۋرىنىڭ» ءداستۇرلى تۋرعا اينالعانىن بىلەدى، شارادان كەيىن ولاردان جىلى لەبىزدەر ەستىپ جاتامىز. بيىل ءبىراز ۋاقىتقا قالانىڭ ورتالىعى جابىق بولادى، سوندىقتان تۇرعىندار تۇسىنىستىك تانىتادى دەپ ۇمىتتەنەمىز. ونىڭ ۇستىنە، بۇل ىڭعايسىزدىقتى بارىنشا بىلدىرتەۋ ءۇشىن بارىمىزدى سالىپ جاتىرمىز»، دەپ اتاپ ءوتتى امانبەك قۇلشىقوۆ.
«الماتى تۋرى – 2017» ۆەلودوداسىنا الەمنىڭ 17 ەلىنەن 20 كوماندا قاتىسادى. ءداستۇرلى تۇردە جارىسقا قازاقستان اتىنان جالعىز كاسىپقوي كوماندا «Astana Pro Team» شىعادى. وتاندىق كوماندا وسىعان دەيىنگى ءتورت جارىستا توپ جارعان ەدى. «الماتى تۋرى – 2017» قاتىسۋشىلارىنىڭ ىشىندە يتاليا مەن فرانتسيادان پروقۇرلىقتىق كوماندالار، الەمنىڭ ءار ەلىنەن كەلگەن 14 قۇرلىقتىق كوماندا، سونداي-اق وزبەكستاننان، سلوۆاكيادان جانە قازاقستاننان 3 ۇلتتىق كوماندا بار.
«ادەتتە كوماندالاردى ءبىز شاقىراتىنبىز. بۇل جولى، جارىستان شامامەن جارتى جىل بۇرىن «الماتى تۋرىنا» قاتىسقىسى كەلەتىن كوماندالاردان كوپتەگەن حات الدىق. جانە سولاردىڭ ىشىنەن ەڭ مىقتىلارىن تاڭداۋعا مۇمكىندىك بولدى، — دەپ اڭگىمەلەدى امانبەك قۇلشىقوۆ. – ارينە، بۇل جارىستان كەيىن مۇنداي كوماندالاردىڭ سانى ارتادى دەپ سەنەمىز».
سونىمەن قاتار پەر حاتسەباۋت ءباسپاسوز ءماسليحاتىندا باق وكىلدەرىنە «الماتى تۋرىنىڭ» ءتورت ۇتىس جەيدەسىن تانىستىردى. جارىس جەڭىمپازىنا كوك جەيدە ارنالعان، ۇزدىك سپرينتەرگە – جاسىل، ۇزدىك تاۋلىق كوك جەيدە كيەدى، ال ۇزدىك قازاقستاندىق ۆەلوشاباندوز قازاقتىڭ ءداستۇرلى ويۋى بار جەيدەنى كيەدى.
الەكسەي لۋتسەنكو مەن ياكوب فۋلسانگ ءوز كەزەگىندە كورەرمەندەرگە اسەرلى ءارى قىزىق جارىس ۇيىمداستىرۋعا ۋادە بەردى.
نەگىزگى جارىس بولىگىمەن قاتار، ۇيىمداستىرۋشىلار ۆەلوسيپەد سپورتىنىڭ جانكۇيەرلەرى مەن ۆەلوسپورتسۇيەر قاۋىمعا سپورتتىق كوڭىل كوتەرۋ باعدارلاماسىن دايىندادى. قالا تۇرعىندارىنا «استانا» ۆەلوكومانداسىنىڭ جۇلدىزدارىمەن اڭگىمەلەسۋ، ءتىپتى جارىسىپ كورۋ مۇمكىندىگى بەرىلدى.
ءباسپاسوز ءماسليحاتى اياقتالعاننان كەيىن Almaty Bike ۆەلوسيپەدتەرىمەن قالالىق ۆەلوسۇيەر قاۋىمعا ارنالعان «Sprint of Almaty» سپرينتەرلىك جارىسى وتكىزىلدى. جارىسقا كامەلەت جاسىنا تولعان، كاسىبي ەمەس ۆەلوسپورت جانكۇيەرلەرى قاتىستى. جالپى العاندا شاراعا 75 ادام تىركەلدى.
قىزىقتى ءارى قىزۋ جارىستا جارتىلاي فينالعا شىققاندار ىرىكتەلىپ، كەيىن فينالدىق دوداعا ۇمىتكەرلەر انىقتالدى. «Sprint of Almaty» جارىسىنىڭ قورىتىندىسىندا اۋەسقوي جارىستىڭ 3 جۇلدەگەرى انىقتالىپ، ماراپاتتالدى:
1-ورىن – احمەتبەك شىنعىس;
2-ورىن – ايجارىقوۆ رۋسلان;
3-ورىن – دجانزاكوۆ نياز.
«Sprint of Almaty» جارىسىندا كوزگە تۇسكەن قاتىسۋشىلار باعالى سىيلىقتارمەن ماراپاتتالدى، ال جەڭىمپاز ماتەريالدىق سىيلىقپەن قاتار «تۋر الماتى – 2017» جارىسىنا اككرەديتاتسيا ۇتىپ الدى، بۇل ارقىلى جەڭىمپاز جارىستى ءوز كوزىمەن جارىس كاۆالكادەسىندە تەحنيكالىق كولىكپەن ءجۇرۋ مۇمكىندىگىن الدى.
نەگىزگى جۇلدەگەرلەرمەن قاتار «Miss Sprint of Almaty» انىقتالىپ، جەڭىسكە دەگەن ەرىك-جىگەرى ءۇشىن كوزگە تۇسكەن قاتىسۋشىنى ماراپاتتادى.
بۇگىن قاتىسۋشى كوماندالاردىڭ تانىستىرىلىمى مەن ۆەلوشاباندوزداردىڭ رەسمي جاتتىعۋى وتەدى.
«الماتى تۋرىنىڭ» جابىلۋ سالتاناتى «مەدەۋ» سپورت كەشەنىنىڭ ساحناسىندا وتەدى.
