جەلتوقسان باتىرلارى جاس بۋىنعا باتاسىن بەردى

قازاقستانعا ەلىم، جەرىم دەپ كەلىپ، شىعىس جەكپە-جەگى تاەكۆوندو سپورتىنىڭ نەگىزىن قالاعان ارداقتى تۇلعا، اسىل ازامات مۇستافا وزتۇرىكتىڭ اتىندا كوپتەگەن جارىستار ءوتىپ تۇرادى. ۇلتجاندى باۋىرىمىزدىڭ دۇنيەدەن وزعانىنا دا كوپتەگەن جىلدىڭ ءجۇزى بولعانى بەلگىلى.

بۇگىندە مۇستافا وزتۇرىكتىڭ اتىندا جارىستار جاس بۋىن اراسىندا ءجيى وتەدى. ال، سول جارىستاردى ۇيىمداستىرۋشىلاردىڭ كوپشىلگى مۇستافا مارقۇمنىڭ ءتول شاكىرتتەرى. ۇستازدارىن جوعارى قۇرمەتتەيتىن شاكىرتتەرىنىڭ ىشىندە ءبايدىلدا قاجى جۇمابەكتىڭ ورنى ەرەك. ۇستازىن ەشقاشان ۇمىتپاي يگىلىكتى شارالارعا ۇيىتقى بولعان ءبايدىلدا قاجى جاسوسپىرىمدەر اراسىندا تاەكۆوندودان ەگەمەندىگىمىزدىڭ 30 جىلدىعى مەن جەلتوقسان كوتەرىلىسىنىڭ 35 جىلدىعىنا ارناپ تاعى ءبىر جارىسقا مۇرىندىق بولعان ەكەن.

جارىستىڭ اشىلۋ سالتاناتى الدىندا سول ءبىر ايازى بەت قارىعان الاپات تۇندە ەگەمەن ەلىمىزدىڭ ەرتەڭى ءۇشىن شەيىت بولعان باتىرلارعا قۇران وقىلىپ، دۇعا باعىشتالدى. بۇل دا ءبىر وسكەلەڭ ۇرپاققا عيبادات بولار ءساتتىڭ ءبىرى بولعانى انىق. سايىسقا كەلگەن قوناقتار مەن اتا-انالار مۇنداي يماندىلىققا باعىت بەرگەن يگى ءىستى ۇلكەن ريزاشىلىقپەن قابىلداپ، ءاۋمين دەسىپ جاتتى. سوسىن ەلىمىزدىڭ ءانۇرانى ورىندالىپ، تاتاميدە جاس شەبەرلەردىڭ جەكپە-جەكتەرى باستالىپ كەتتى.

بۇل جارىسقا قالاداعى بارلىق سپورت مەكتەپتەرىنىڭ جەتكىنشەكتەرى كەلىپ، جەڭىس ءۇشىن تارتىستى جەكپە-جەكتەر وتكىزدى. جاس بۋىن ءبىزدىڭ بولاشاعىمىز. سوندىقتان دا جاس تاەكۆوندوشىلارعا سپورت ارقىلى دۇرىس باعىت باعدار بەرسەك قانا قازاق ەلىنىڭ شىمىر دا شىنىققان جاستارى ءوسىپ شىعادى. بالانى ۇيادا باۋلاسا عانا قاناتى قاتايىپ، بيىككە سامعارى ءسوزسىز. وسى باعىتتا ۇيىمداستىرىلعان ءدۇبىرلى جارىسقا قولداۋ كورسەتكەن پق «جەلتوقسان اقيقاتى» رەسپۋبليكالىق قوعامدىق بىرلەستىگىنىڭ توراعاسى بولات قۇرىمباەۆ، نۇرداۋلەت جايناقوۆ پەن باقىتبەك كاربوزوۆ سەكىلدى جەلتوقساننىڭ باتىر ارداگەرلەرى  جارىستىڭ جوعارى دەڭگەيدە وتۋىنە ايىرىقشا ۇلەس قوسقانىن باسا ايتقان ورىندى.  سونىمەن قاتار، جەلتوقساننىڭ باتىرلارى سپورت سەكتورى ەرمەك ايتۋاروۆ، «جەلتوقسان اقيقاتى» اۋەزوۆ اۋدانىنىڭ ءتورايىمى الماگۇل مۇقامانوۆا جانە  باتىر، ەرتاي، حالەل سىندى جەلتوقساننىڭ باتىر قاhارماندارى اتسالىسقان بۇل تۋرنير جوعارى دەڭگەيدە بولىپ ءوتتى.

ستۆ تەلەارناسى اركەزدە جەلتوقسان باتىرلارىنا ەرەكشە ىلتيپاپەن قاراپ، ءوز تاراپتارىنان اقپاراتتىق قولداۋ كورسەتىپ كەلەدى. جەكسەنبى دەمالىس كۇنى بولسا دا بار شارۋالارىن ىسىرىپ تاستاپ، شاپقىلاپ جەتىپ، رەپورتاجدارىن تۇسىرگەن ايتۋلى تەلەارنا ۇجىمىنىڭ جۋرناليست، وپەراتورلارىنا جارىس سوڭىندا، پق «جەلتوقسان اقيقاتى» رەسپۋبليكالىق قوعامدىق بىرلەستىگىنىڭ اتىنان بولات قۇرىمباەۆ مىرزا زور العىسىن جەتكىزدى. جاس تاەكۆوندوشىلاردىڭ ونەرىن تاماشالۋعا كەلگەن قۇرمەتتى قوناق، كەزىندە تاەكۆوندو سپورتىنان ۇلتتىق قۇرامانىڭ تىزگىنىن ۇستاعان ارداگەر سپورتشى، قر ەڭبەگى سىڭگەن سپورت قايراتكەرى، م.وزتۇرىكتىڭ بەل شاكىرتتەرىنىڭ ءبىرى قايرات قىرعىزباەۆ تارتىستى وتكەن كەزدەسۋلەردى تاماشالاپ، جوعارى باعاسىن بەرىپ كەتتى. شىعىس جەكپە-جەگىنىڭ مايتالماندارى كوز الماي قاراپ تۇرعاندا، جاسوپىرىمدەر قولدان كەلگەنشە بار ونەرلەرىن ورتاعا سالۋعا تىرىستى. جارىس اياقتالعاننان سوڭ ءدۇبىرلى الامان جەكپە-جەكتە جەڭىسكە جەتكەن جەڭىمپازدار مەن جۇلدگەرلەردى جارىس ۇيىمداستىرۋشىلارى مەن جەلتوقسان ارداگەرلەرى ءوز قولدارىمەن قۇتتىقتاپ، اق باتالارىن بەردى. جەڭىسكە جەتكەن جاس ۇلانداردىڭ جۇزىندە نۇر ويناپ، كوڭىلدى كۇيمەن تارقاستى.

ءيا، بالالار قولدارىنا تيگەن جەڭىس مەدالدارى مەن ماقتاۋ قاعازدارىنا ءدان رازى. جارىستىڭ ءمان-ماعىناسىن تۇسىنبەگەندە شىعار. بىراق ولاردىڭ ويىندا جەلتوقسان تۋرالى ويىپ تۇرىپ ايتىلعان سوزدەر مەن «جەلتوقسان» دەگەن ءسوز تىركەسى ەستەرىندە ماڭگى قالارى ءسوزسىز دەپ ويلايمىن.

اقىن ورداباي ۇلى،

الماتى