• Қазақ
  •   
  • Qazaq
  •   
  • قازاق
  •   
  • Рус
  •   

    Búlikshilerge qarsy turǵan batyr basshy

    Almatydaǵy qańtardyń qaıǵyly oqıǵasy qazaq eline aýyr tıdi. Qanshama bozdaqtar alańǵa shyǵyp, oqqa ushyp, qaza boldy. Iá, qazirgi resmı derekterde 200-den asatyn sandy jarııa etýde. Al, negizinde odan eki ese kóp qazaq jastary jan qushty.

    Qańtardyń qaıǵyly kúnderiniń sebep-saldaryn Úkimet tarapynan taǵaıyndalǵan arnaıy komıssııa áli zerttep jatyr. Degenmende beıbit sherýge ilese shyqqan jazyqsyz jandar aýyr jazaǵa tartylyp ketpese eken degen úmittemiz. Úkimettiń sońǵy kezderdegi saıasatyna qatty narazylyq bolǵan halyq beıbit sherýdi elimizdiń ár aımaǵynan bastaǵan bolatyn. Jańaózendegi suıytylǵan gaz baǵasynyń shekten tys qymbattaýynyń áserinen halyq kóterilip, Úkimetke óz talaptaryn qoıdy. El prezıdenti kún ótpeı bul túınekti máseleniń sheshimin shyǵaryp, gaz baǵasyn 50 teńgege deıin tómendetti. Al, Jańaózen jurty óziniń degenine jetip tynyshtalǵany sol-aq  edi, Almatyda kerisinshe, kóshe boıy otqa oranyp, búlikshiler otala túsken bolatyn. Aqyry nemen aıaqtalǵanyn bárimiz kórip bildik. Beıbit sherýmen halyqtyń muńyn joqtap shyqqan qazaqtyń sanaly jastary, ortaǵy kirip ketken qandyqol qaraqshylardyń jeteginde  ketip, ne istep ne qoıǵandaryn bilmeı de qaldy.

    Qudaı basqa bermesin, kóshe boıynda qoldaryna sýyq qarý ustaǵan susty  toptar aldyna kezdeskenin uryp-soǵyp, mańyzy zor nysandar men kóshe boıynda ornalasqan saýda-dúkenderdi astan-kesten etip tonady. Adam emes beıne bir jyrtqyshtar sekildi bul tobyr aıýannyń isin istep, aıaýshylyq degendi múlde umytqan. Qarýlaryn ońdy soldy siltegen basbuzarlar azyq-túlik, kıim-keshek jáne elektronıka dúkenderine basyp kirip, topalań salyp túk qaldyrmaı tonap ketti.

    Ásem qalamyz Almatyda tula boıyn kek alyp, kózderi qantalaǵan jastardyń kóshedegi búligi qantógispen aıaqtaldy. Qanshama jastarymyz qyrshynnan qıyldy. Qanshama ana botadaı bozdap balasynan aıyrylyp, tipti múrdesin de taba almaı zar ılep qaldy. Prezıdent Ujymdyq qaýipsizdik sharty boıynsha kórshi elderden kómek kúshin shaqyryp, búlikshilerdiń baratyn mańyzdy nysandaryna tosaqaýyl qoıdy. Desek te sol syrttan kelgen áskerlerdiń bizdiń jastarǵa oq atpady degenge sený árıne, qıyn. Búlikshiler sharasyzdan qaladan aýyl-aýylǵa qashyp jan saýǵalap ketti. Degenmen Úkimettiń quryǵy uzyn, kúni búginge deıin jer-jerlerden sýyq qarý asynǵan jastarymyz tutqyndalyp, zań aldyna aparylýda. Al, endi sol bir qantógis kóshe boılap júrgen kúnderi bolǵan bir oqıǵany aıta ketsek.

    Kóshe boıyn talqandap kele jatqan búlikshiler toby 5 qańtar kúni Shevchenko men Baızaqov kósheleriniń qıylysynda ornalasqan Karken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat-kolledjiniń qabyrǵasyna taqaǵan edi. Jasóspirim daryndy balalar oqıtyn mektepti tas-talqan etý oıymen  temir qorshaýlardy maıystyryp, ishke basyp kirý amalyna kóshedi. Dál sol kezde mektep dırektory Seıilhan Baqtyǵalıuly Qaraqov qandyqol búlikshilerdiń qaharynan qoryqpaı  aldaryna kese-kóldeneń turyp, mektebin úlken qaterden qorǵap qalǵan eken. Balasyn qorǵaǵan boztorǵaıdaı, búlikshilerdi toqtatyp, ataly sózin aıtyp betin qaıyrypty. Iá, eshnárseni uqpaı óz degenderin istep jolyn qıratyp kele jatqan toptyń qaharynan qoryqpaı turyp, «Jigitter bul jerde biriń iniń, biriń baýyryń bolatyn qazaqtyń jasóspirim balalary oqıdy. Sondyqtan da óz qazaǵynyń otyn talqandap, qıratýdan eshqandaı abyroı tappaısyńdar. Qaıtyńdar! Tarańdar! Qoıyńdar bul buzaqylyqty», dep qarsy turyp alǵan eken. Sosyn ishterinde sanaly bireýleri aqylǵa kelip, «Júrińder, kettik», dep bárin ilestirip alyp, kóshe boılap tómen qaraı júgire-júrip ketse kerek.

    Mine, bilikti basshynyń batyr qımyly. Seıilhan Baqtyǵalıulynyń ata-babalary batyr ári balýan bolǵan kisiler eken. Júrek jutqan basshynyń qaharly topqa qaımyqpaı qarsy turyp, óziniń bilim shańyraǵyn qorǵap qalýy úlken erlik ári naǵyz azamattyq dep baǵalaýǵa bolatyn shyǵar. Qalaı desek te Abaısha aıqanda, essiz tobyrǵa qaımyqpaı qarsy kelý ekiniń biriniń qolynan kele bermesi bir anyq. Seıilhan Baqtyǵalıuly sol qaterli kúnderdi mektep qabyrǵasynda qalyp, bir kóz ilmeı kúzetken eken. Qazir qandyqol búlikshiler qıratyp ketken qorshaýlar túgeldeı jóndelipti. Alda oqý maýsymy bastalady. Olımpııa oıyndarynyń kúmis júldegeri Eldos Smetov sekildi daryndy jastar túlep ushyp shyǵyp jatqan bul mektep-ınternat kolledjde oqıtyn balalar osyndaı jolbarys júrek batyr basshylary bolǵanyn  maqtan eteri anyq.

     

    Aqyn ORDABAIULY,

    ALMATY

     

    Pikir jazý

    Your email address will not be published. Required fields are marked *

    *