تارلاندارعا تاعزىم

بۇگىن الماتى قالاسىنداعى «تۇلپار» يپپودرومىنىڭ سپورت زالىندا فۋتزالدان قالامگەرلەر اراسىندا قازاق جۋرناليستيكاسىندا كورنەكتى ءىز قالدىرىپ، ەلگە تانىلعان نۇرتىلەۋ يمانعالي ۇلى، امانگەلدى سەيىتحان مەن بەيسەن قۇرانبەكتى ەسكە الۋعا ارنالعان رەسپۋبليكالىق جارىس ءوتتى.

بۇل جارىستى ايتۋلى  اتشاباردىڭ ديرەكتورى، اۋىر اتلەتيكادان الەم چەمپيونى، الاشقا اتى ءمالىم ۇلتجاندى ازامات جاسۇلان قىدىرباەۆ ۇيىمداستىردى. «ءولى رازى بولماي ءتىرى بايىمايدى»،  دەمەكشى  اتتارى اتالعان ەل قۇرمەتتەپ ارداقتاعان اسىل ازاماتتاردى ەسكە الۋعا ارنالعان شاراعا ۇيىتقى بولعان جاسۇلانداي ءيمانجۇزدى باۋىرىمىزعا قوناقتاردىڭ العىسى شەكسىز بولدى. سونىمەن قاتار وسى جارىستىڭ وتۋىنە ارىستانبەك مۇحامەدي ۇلى دا مۇرىندىق بولعان ەكەن. كەزىندە ەل سپورتىن باسقارعان ازاماتتىڭ وتكەندى ۇمىتپاي، باقيلىق دۇنيەگە ساپار شەككەن بەلگىلى جۋرناليستەرگە دەگەن قۇرمەتىنە جيىلعان كوپشىلىك ريزاشىلعىن ءبىلدىرىپ جاتتى.

جارىستىڭ اشىلۋ سالتاناتىنا ارنايى قاتىسقان نەسىپ ءجۇنىسباي، مۇرات ادامبەكوۆ، سەرىك ابىكەن مەن نۇرتىلەۋ يمانعالي ۇلىنىڭ جۇبايى، امانگەلدى سەيىتحانوۆتىڭ تۋعان بالاسى جارىستى ۇيىمدستىرۋشىلارعا زور العىستارىن جەتكىزىپ، ويىنشىلارعا جەڭىس تىلەدى. سودان كەيىن، كەسكىلەسكەن جانكەشتى ويىندار باستالىپ كەتتى. كۇن ەڭكەيە بەرە تۋرنيردە توپجارعانداردىڭ ەسىمدەرى دە بەلگىلى بولدى. بۇل جارىسقا مەندە «نامىس» اتتى كوماندامەن سىنعا تۇسكەن ەدىم. العاشقى كەزدەسۋدە كوماندامىمىز شىعىستان كەلگەن جاستارعا تاماشا ويىن كورسەتىپ، 1:1 ەسەبىمەن تەڭ تارقاسقان ەدىك. دەگەنمەن ەكىنشى ويىندا جولىمىز بولمادى. سپورت ءوزى جەڭىس پەن جەڭىلىستەن تۇرادى دەسەك، ەلىمىزدىڭ ءار وڭىرىنەن جاساقتالىپ كەلگەن جالىنى ءورت جاس ويىنشىلاردى قوعاداي جاپىرىپ ءوتۋ بۇل كۇنى بىزگە بۇيىرماسا كەرەك.

حوش، سونىمەن فينالدا تالدىقورعاننان كەلگەن «قاراكەت» كومانداسى «كتك» تەلەارناسىن 4:1ەسەبىمەن جەڭىپ، جارىستىڭ جەڭىمپازى اتاندى. جۇلدەلى ءۇشىنشى ورىن جامبىل وبلىسىنان كەلگەن «تاراز» كلۋبىن 4:2 ەسەبىمەن ۇتقان شقو «شىعىس»  جاساعىنا بۇيىردى. جارىستا باس كۋبوكتى جەڭىپ العان «قاراكەت» كومانداسى  جاسۇلان قىدىرباەۆتىڭ قولىنان 80 000 تەڭگە السا، ەكىنشى ورىنعا يە بولعان  «كتك» كومانداسى 50 000، ءۇشىنشى ورىندى يەلەنگەن «شىعىس»  30 000 تەڭگەنى قالتاسىنا باستى. سونىمەن قاتار ءتۋرنيردىڭ ۇزدىك ويىنشىسى، ۇزدىك قاقپاشىسى، ۇزدىك قورعاۋشىسى، ۇزدىك شابۋىلشىسى دەگەن نوميناتسيالارى بويىنشا وزا شاپقاندار سالتاناتپەن ماراپاتتالدى.

جارىس ۇيىمداستىرۋشىسى جاسۇلان قىدىرباەۆ ويىنشىلارعا العىسىن بىلدىرە وتىرىپ، بۇيىرتسا ايتۋلى دودا ءداستۇرلى بولۋى ابدەن مۇمكىن ەكەنىن باسا ايتا كەتتى. راسىمەندە جاقسى ءبىر ادام بۇل پانيدەن ءوتىپ كەتسە، ارتىنان تەك قۇران باعىشتاپ، دۇعا وقۋمەن بىرگە وسىنداي يگىلىگى زور شارالاردى ۇيىمداستىرۋدىڭ ساۋابى شەكسىز ەكەنى بەلگىلى. سوندىقتان وسىنداي ساۋاپتى شارالار ارقىلى ءبىز دۇنيەدەن وزعان جاقسى جاندارىمىزدىڭ جارقىن بەينەلەرىن ءجيى ەسكە الىپ وتىرامىز.

اقىن ورداباي ۇلى،

الماتى