Tarlandarǵa taǵzym

Búgin Almaty qalasyndaǵy «Tulpar» ıppodromynyń sport zalynda fýtzaldan qalamgerler arasynda qazaq jýrnalıstıkasynda kórnekti iz qaldyryp, elge tanylǵan Nurtileý Imanǵalıuly, Amangeldi Seıithan men Beısen Quranbekti eske alýǵa arnalǵan respýblıkalyq jarys ótti.

Bul jarysty aıtýly  atshabardyń dırektory, aýyr atletıkadan álem chempıony, Alashqa aty málim ultjandy azamat Jasulan Qydyrbaev uıymdastyrdy. «О́li razy bolmaı tiri baıymaıdy»,  demekshi  attary atalǵan el qurmettep ardaqtaǵan asyl azamattardy eske alýǵa arnalǵan sharaǵa uıytqy bolǵan Jasulandaı ımanjúzdi baýyrymyzǵa qonaqtardyń alǵysy sheksiz boldy. Sonymen qatar osy jarystyń ótýine Arystanbek Muhamedıuly da muryndyq bolǵan eken. Kezinde el sportyn basqarǵan azamattyń ótkendi umytpaı, baqılyq dúnıege sapar shekken belgili jýrnalısterge degen qurmetine jıylǵan kópshilik rızashylǵyn bildirip jatty.

Jarystyń ashylý saltanatyna arnaıy qatysqan Nesip Júnisbaı, Murat Adambekov, Serik Ábiken men Nurtileý Imanǵalıulynyń jubaıy, Amangeldi Seıithanovtyń týǵan balasy jarysty uıymdstyrýshylarǵa zor alǵystaryn jetkizip, oıynshylarǵa jeńis tiledi. Sodan keıin, keskilesken jankeshti oıyndar bastalyp ketti. Kún eńkeıe bere týrnırde topjarǵandardyń esimderi de belgili boldy. Bul jarysqa mende «Namys» atty komandamen synǵa túsken edim. Alǵashqy kezdesýde komandamymyz Shyǵystan kelgen jastarǵa tamasha oıyn kórsetip, 1:1 esebimen teń tarqasqan edik. Degenmen ekinshi oıynda jolymyz bolmady. Sport ózi jeńis pen jeńilisten turady desek, elimizdiń ár óńirinen jasaqtalyp kelgen jalyny órt jas oıynshylardy qoǵadaı japyryp ótý bul kúni bizge buıyrmasa kerek.

Hosh, sonymen fınalda Taldyqorǵannan kelgen «Qaraket» komandasy «KTK» telearnasyn 4:1esebimen jeńip, jarystyń jeńimpazy atandy. Júldeli úshinshi oryn Jambyl oblysynan kelgen «Taraz» klýbyn 4:2 esebimen utqan ShQO «Shyǵys»  jasaǵyna buıyrdy. Jarysta bas kýbokty jeńip alǵan «Qaraket» komandasy  Jasulan Qydyrbaevtyń qolynan 80 000 teńge alsa, ekinshi orynǵa ıe bolǵan  «KTK» komandasy 50 000, úshinshi oryndy ıelengen «Shyǵys»  30 000 teńgeni qaltasyna basty. Sonymen qatar týrnırdiń úzdik oıynshysy, úzdik qaqpashysy, úzdik qorǵaýshysy, úzdik shabýylshysy degen nomınaııalary boıynsha oza shapqandar saltanatpen marapattaldy.

Jarys uıymdastyrýshysy Jasulan Qydyrbaev oıynshylarǵa alǵysyn bildire otyryp, buıyrtsa aıtýly doda dástúrli bolýy ábden múmkin ekenin basa aıta ketti. Rasymende jaqsy bir adam bul pánıden ótip ketse, artynan tek quran baǵyshtap, duǵa oqýmen birge osyndaı ıgiligi zor sharalardy uıymdastyrýdyń saýaby sheksiz ekeni belgili. Sondyqtan osyndaı saýapty sharalar arqyly biz dúnıeden ozǵan jaqsy jandarymyzdyń jarqyn beınelerin jıi eske alyp otyramyz.

Aqyn ORDABAIULY,

ALMATY