كوزدەن كەتسە دە، كوڭىلدەن كەتپەيدى

(امانگەلدى سەيىتحانوۆتىڭ قۇرمەتىنە كوماندا قۇرىلدى)

جاقىندا استانادا شاعىن فۋتبولدان جۋرناليستەردىڭ BAQ League بىرىنشىلىگىنىڭ كەزەكتى ماۋسىمى باستالدى.

وعان بەلگىلى جۋرناليست، سپورت كوممەنتاتورى امانگەلدى سەيىتحانوۆتىڭ قۇرمەتىنە قۇرىلعان «جەڭىس Dream team» كومانداسى دا قاتىسىپ جاتىر. وسى جاساققا جينالعان بارلىق جىگىتتەرگە العىسىمدى ايتامىن. كومانداعا شاقىرعان ارىپتەسىم ۆسەۆولود حۆانعا ريزاشىلىعىمدى بىلدىرەمىن. اۋجەكەڭ ەكەۋى «ليتەر» كومانداسىندا بىرگە ويناعان ەدى. ول كەزدە امان اعاممەن مەن 2020 – 2021 جىلدارى «فوليانت» باسپاسىنىڭ كلۋبىندا دوپ تەپكەندە كەزدەسىپ جۇردىك.

ال مەنى «فوليانت» باسپاسىنىڭ كومانداسىنا شاقىرعان بەلگىلى اقىن داۋرەن بەرىكقاجى بولاتىن. بۇعان دەيىن ستۋدەنت كەزىمدە الماتىدا «Dostar international» اۋلا كلۋبىن، 2001 – 2017 جىلدارى «استانا اقشامى»، «ەگەمەن قازاقستان» گازەتتەرى مەن قازاقستان سپورت ءباسپاسوزى قاۋىمداستىعى استانا قالالىق فيليالىنىڭ «جەڭىس» كومانداسىن جاساقتاپ، كوپتەگەن جارىستارعا قاتىسقان ەدىك. «جەڭىس» كومانداسى دەگەندە ءبىز امان اعام ەكەۋمىز ءبىر كلۋبتا ويناعان ەدىك. ونى كومانداعا شاقىرعان ەدىم. ول سوعان ريزا بولىپ، ءبىر ماۋسىم استاناداعى بۇرىنعى «اۆتوموبيليست» ستاديونىنىڭ (قازىرگى بوكس ورتالىعىنىڭ) كوكمايسا الاڭىندا دوپ تەپكەنبىز. ال مەنىڭ ستۋدەنت كەزىمدەگى العاشقى كوماندام – «Dostar international» الماتىنىڭ اۋلا كوماندالارىمەن جانە قالانىڭ شەتىندەگى اۋىلدارعا بارىپ ويناسا، «استانا اقشامى» قالالىق تۋرنيرلەردە توپ جارىپ ءجۇردى. «ەگەمەن قازاقستان» گازەتىنىڭ جاساعى جۋرناليستەر اراسىندا قازاقستان اۋەسقوي فۋتبولشىلار ليگاسىنا قاتىسقان العاشقى كوماندا بولىپ، جاقسى ويىن ورنەگىن كورسەتتى.

ءبىزدىڭ كلۋب اۋەلى «ۆ» ليگاسىندا، ودان كەيىن «ا» ليگاسىندا قازاقستان اتىنان ەۋروپانىڭ اۋەسقوي فۋتبول ليگاسىنا قاتىسقان ۇجىمدارمەن تالاي رەت يىق تەڭەستىرىپ وينادى. وسى جىلدارى باس باسىلىمنىڭ كلۋبى جىلدا الماتىدا، ودان كەيىن استانادا جالاۋى جەلبىرەگەن سەيداحمەت بەردىقۇلوۆتى ەسكە تۇسىرۋگە ارنالعان تۋرنيرگە قاتىسىپ وتىردى.
2016 جىلى ءبىزدىڭ قازاقستان سپورت ءباسپاسوزى قاۋىمداستىعىنىڭ استانا قالالىق فيليالى العاش رەت ۇيىمنىڭ كۋبوگى ءۇشىن  باق-نىڭ سەگىز كومانداسى باس قوسقان تۋرنير وتكىزدى. وسى سىندا اتالعان بىرلەستىكتىڭ «جەڭىس» كلۋبى كۋبوكتىڭ يەگەرى اتاندى. ودان كەيىن «جەڭىس» جاساعى ەكى ماۋسىم BAQ League بىرىنشىلىگىنە قاتىسىپ، جاقسى ناتيجە كورسەتتى.
سودان كەيىن 2020 جىلى ءۇش جىل ۇزىلىستەن كەيىن «فوليانت» باسپاسىنىڭ شاقىرۋىمەن قايتىپ الاڭعا شىققانمىن. ەندى مىنە، ءبىر جارىم جىل ۇزىلىستەن سوڭ، 44 جاسقا قاراعان شاعىمدا تاعى جاسىل الاڭعا شىعىپ وتىرمىن. كوماندانىڭ جىگىتتەرىنە سەنىم بىلدىرگەنى ءۇشىن راحمەتىمدى ايتىپ، شاما كەلگەنشە جاساقتى جەرگە قاراتپاۋعا تىرىسامىن دەپ ءسوز بەردىم. بۇعان تالاي كوماندالاردى قۇرىپ، اياققا تۇرۋىنا جۇگىرىپ، جارىستاردا باسىنان سوڭىنا دەيىن جۇرگەن از-ماز تاجىربيەمنىڭ دە سەپتىگى تيەدى دەپ ويلايمىن.

فۋتبول ويناۋدى 10 جاسىمنان باستاسام، قازىر كوز الدىما 18-22 جاستا «Dostar international» كلۋبىندا ويناعان شاعىم، 23-25 جاستا «استانا اقشامى» گازەتىنىڭ نامىسىن قورعاعان جىلدارىم، 26-39 جاستا «ەگەمەن قازاقستان» مەن «جەڭىس» جاساقتارىندا دوپ تەپكەن كەزىم، 42-43 جاسىمدا «فوليانت» فۋتبول كومانداسىندا جاسىل الاڭعا شىققانىم كوز الدىما كەلەدى. جاس الادى ەكەن. بىراق، «سپورت دەگەن ءبىر سيقىر» دەپ بەكەر ايتپايدى…

داستان كەنجالين

XI سەزون. NUR-SULTAN CITY — جەڭىس DREAM TEAM — YouTube