Jastardy jeńiske jetelegen Jámıla

Búgin Almaty qalasyndaǵy №8 Olımpıadalyq rezervtegi mamandandyrylǵan balalar men jasóspirimder sport mektebinine jol túsip bas suqqan edim. Bul sport mektebinde jattyǵyp jatqan jasulandar elimizdiń abyroıyn álemdik jarystarda tabysty qorǵap júrgen daryndy jastar. Negizi «El ishi — ken ishi», demekshi qazaq dalasy talanttarǵa tunyp tur. Tek olardy tanı biletin, jigerin qaırap janı biletin mamandar bolsa bolǵany.

«Bulaq kórseń kózin ash», degen babalarymyz, boıynan óneri tasyp, durys jolda jumsaı almaı tasada qalyp jatqan qanshama qarakóz jastarmyz bar. Degenmende «Altyn kúldiń arasynda jatsa da jyltyrap jatady», demekshi, aldyna maqsat, meje qoıa bilgen týma talanttar bir jerden tesip shyǵary anyq. Mine, sondaı talanttardy taýyp alyp, baǵyn ashyp jatatyn shaharymyzda sport mektepteri bar. Solardyń qatarynda Almaty qalasyndaǵy №8 Olımpıadalyq rezervtegi mamandandyrylǵan balalar men jasóspirimder sport mektebine erekshe toqatalaǵan oryndy.

Bul mektepti  óz isiniń mamany, jastarǵa boıyna qazaqy namysty quıa biletin, erler kóterer aýyr júkti ózi kótere biletin, bilikti basshy, isine kórki saı  Jámıla Tanabaeva hanym basqarady. Men Jámılany kóp jyldan beri jaqsy tanımyn. О́z isine adal berilgen jan bolsa men Jámılany aıtar edim. Súıgen isiniń súıenishin kórip otyrǵan Jámıla «Tynymsyz, tabandy eńbek etseń ǵana muratyńa jetesiń», degen qaıǵdany berik ustaǵan jannyń biri. Sondyqtanda ol óz shákirterine tańdaǵan sport túrine úlken qurmetpen qarap, el namysy úshin ter tógý jolynda jyldar boıy jıǵan tájirbesin barynsha berip keledi.

Taǵy bir aıtar jaı, men Jámılany ózimniń týǵan anam Rápııaǵa uqsatymyn. Anam 40 jyl boıy aýyl klýbynda halyqqa kıno qoıyp tynbaı eńbek etip, jemisin kóre bilgen jan edi. Sol sebepten qazaq áıelderi arasynan tuńǵysh kınomekhanık bolyp aty qaldy. Anam marqumnan adam óz mamandyǵyna jaýapkershilikpen qarap, jan tánimen berilip jumys jasaǵanda ǵana jemisin kóretindigin kórip bilim óstim. Ol kisiniń boıyndaǵy eńbekqorlyq pen meıirimdilikti, adaldyq pen mol tájirbıeni men búgin Jámılanyń boıynan kórgendeı bolamyn. Iá, árqashanda osy mektep pen Jámıla hanymnyń sport salasyndaǵy iri jetistikterine qarap qýanamyn. О́ıtkeni, Jámılanyń shákirtteri qazirgi tańda álem jarystarynda úlken nátıjelermen elimizdiń mereıin ósirýde. Mine, jaqynda ǵana taǵy bir eki sportshy quzǵa órmeleý sportynan álem básekesinde Qazaqstannyń namysyn qorǵap jatyr.

Hosh, sonymen men aıtýly mektepke kelgende kóptegen tosyn tabystardyń kúási boldym. Negizgi maqsatym jýyrda ǵana jaryq kórgen «Izgilikpen órilgen ómir» atty qazaq sportyndaǵy 30 jyldyq eńbegim saraptalyp jazylǵan kitabymnyń bir parasynyń keıipkeri Jámıla Tanbaevamen kezdesip, kitappen qosa Qurmet dıplomyn tabys etý edi. «Joly bolar jigittiń jeńgesi aldynan shyǵady», demekshi Jámıla  óz jumys ornynda eken. Jaqsy adammen júzdeseń janyń jadyrap qalary sózsiz ǵoı. Ekeýara áńgimemiz qazaq sportynyń tóńiregindegi maıtalandary men aıtýly sport mektebiniń búgingi kúngi jetistikteri týraly boldy.

Tartymdy áńgimemizdiń sońynda men tól kitabymnyń shyǵýyna járdemdesken aıalýy qyz Jámılaǵa Qurmet dıplomyn tartý ettim. Osylaısha qazaqtyń sport dese janyn beretin, qazaqtyń daryndy jastarynyń boıyna namys uıalatyp, jigerin qaırap otyrǵan bilikti basshy, bilgir maman Jámıla Tanabaeva men estelikke sýretke túsip, jyly qoshtasyp shyǵyp kettim. Jolda ketip bara jatyp, keshegi batyr qyz Tomırıs, qyz Jibek pen Baıan sulý, qyz Qurtqa men Aqjúnis, Nazym jáne Gúlbarshyn arýlar el qorǵaǵan batyrlarǵa ári serik ári jar bolyp qana qoımaı, el basyna kún týǵanda atqa qonyp qolyna qarý ustap elin qorǵady. Al, búgingi beıbit ómirdiń eńbek maıdanynynda qazaqtyń qaısar qyzdary qoǵamda belsendilik tanytyp, túrli salalarda ozyp alǵa shyǵyp keledi. Solardyń bir biregeıi Jámıla Tanabaeva sekildi qarakózderimiz kóp bolsa el sportynyń eńsesi bıikteı túser edi ǵoı degen oıda qaldym.

Aqyn ORDABAIULY,

ALMATY