SportPress.kz قازاقستان سپورت جاڭالىقتارى
Astana Pro Team ۆەلوشاباندوزى ياكوب فۋلسانگ «الماتى تۋرى — 2017» ەكىنشى كەزەڭىنىڭ جەڭىمپازى، ال ونىڭ ارىپتەسى الەكسەي لۋتسەنكو – ۆەلودودانىڭ تورت دۇركىن چەمپيونى اتاندى.
ەكىنشى كەزەڭدە دانيالىق ياكوب فۋلسانگ جارىس جولىن 3 ساعات 58 مينۋت 01 سەكۋندتا ءجۇرىپ ءوتىپ، مارەگە ءبىرىنشى بولىپ جەتتى. ەكىنشى بولىپ قازاقستاندىق الەكسەي لۋتسەنكو 12 سەكۋندقا كەشىگىپ كەلدى. ال ۇشتىكتى شۆەيتساريالىق شاباندوز كريس ستۋسسي تۇيىندەدى.
وسىلايشا، كاسىپقوي حالىقارالىق ۆەلوجارىستىڭ قورىتىندىسى بويىنشا الەكسەي لۋتسەنكو «الماتى تۋرى – 2017» دوداسىنىڭ جەڭىمپازى اتاندى. ونىڭ جالپى ۋاقىتى 07:47:43. جارىستىڭ كۇمىس جۇلدەسىن الەكسەيدەن 55 سەكۋندقا قالىپ قويعان رەمي دي گريگوري يەلەندى. ال قولا مەدالدى ۆەلوجارىستىڭ ەكىنشى كەزەڭىنىڭ جەڭىمپازى ياكوب فۋلسانگ قاناعات تۇتتى – 01:04.
– بۇگىنگى بايگە قيىن بولدى. ءبىزدىڭ ۇجىم ەكى كۇن بويى كەرەمەت ونەر كورسەتتى. وسى جولى ياكوب باسىمدىق تانىتادى دەپ كەلىسكەن بولاتىنبىز. ويتكەنى، ول تاۋلى ايماقتاردىڭ شەبەرى. بۇل مەنىڭ وسى ماۋسىمداعى سوڭعى جارىسىم. ەندى پەتروپاۆلوۆسك قالاسىنا كەتەمىن. ءبىراز دەمالامىن. كەلەسى ماۋسىمعا كۇش جينايمىن، – دەدى الەكسەي لۋتسەنكو.
سونىمەن قاتار، لۋتسەنكو «سپرينتەرلىك كلاسسيفيكاتسيا جەڭىمپازى»، «جالپى كلاسسيفيكاتسيا جەڭىمپازى» جانە «ۇزدىك قازاقستاندىق ۆەلوشاباندوز» نوميناتسيالارىن جەڭىپ الدى. ال «تاۋلى جەردەگى كاسىپقوي كلاسسيفيكاتسياسىنىڭ جەڭىمپازى» اتاعىنا تاۋنسەند روري يە بولدى.
– «الماتى تۋرى – 2017» ۆەلوجارىسىندا جەڭىسكە جەتكەنىمە قاتتى قۋانىپ وتىرمىن. بۇل جارىس قازاقستاندا بولعان سوڭ، كوماندامىز ءۇشىن ماڭىزى زور. سونداي-اق، «الماتى تۋرىندا» تاۋلى كەزەڭىنىڭ بولعانى جاقسى بولدى. سەبەبى، الماتىنىڭ تابيعاتى وتە سۇلۋ. ال وزگە ۆەلودودالار تۋرالى كەيىنىرەك ويلانا جاتارمىن. قازىر جارىستاردا وزىمە سەنىپ ءجۇرمىن. ەڭ باستىسى سول، – دەدى ياكوب فۋلسانگ.
جەڭىمپازدار مەن جۇلدەگەرلەردى ماراپاتتاۋ راسىمىنە قالا اكىمى باۋىرجان بايبەك قاتىسىپ، ۆەلودادانى قورىتىندىلادى:
– ءبىز «الماتى تۋر» حالىقارالىق ۆەلوجارىسىن وسىمەن بەسىنشى رەت وتكىزدىك. وسى جىلى كاسىپقوي ۆەلودودا جاڭا دەڭگەيگە ءوستى. حالىارالىق ۆەلوسيپەدشىلەر وداعىنىڭ (UCI) كەلىسىمىمەن كوپكۇندىك تاسجولداعى ۆەلوجارىس اتاعىنا يە بولدى. ەۋروپا جانە ازيا قۇرلىعىنىڭ 17 ەلىنەن 20 كوماندانىڭ قالامىزدا ونەر كورسەتۋى ءبىز ءۇشىن ۇلكەن مارتەبە. ءبىز ۆەلوسپورتتىڭ دامۋىنا اسا كوڭىل بولەمىز. Astana Pro Team كومانداسىن جەڭىسىمەن شىن جۇرەكتەن قۇتتىقتايمىن. مىڭ بوياۋلى الماتى قالاسى – الەمدىك دەڭگەيدەگى القالى جيىندار مەن سپورتتىق شارالار وتەتىن وڭىرلىك ورتالىققا اينالدى. وسىناۋ سپورتتىق ءىس-شارالار قالالىق ينفروقۇرىلىمنىڭ قارقىندى دامۋىنا، تۇرعىندار اراسىندا ۆەلوسپورتتى ناسيحاتتاۋدا، وزىندىك ىقپالىن تيگىزەرى ءcوزسىز، – دەپ اتاپ ءوتتى قالا اكىمى باۋىرجان بايبەك.
ۆەلوجارىستىڭ ەكىنشى كەزەڭى «حالىق ارەنا» عيماراتىندا باستالىپ، «شاج-ءال-فارابي» مارشرۋتىمەن تۇڭعىش پرەزيدەنتتىڭ ساياباعىنان «مەدەۋ» تاۋ شاڭعىسى كۋرورتىنا دەيىن جالعاستى.
ايتا كەتەيىك، ءبىرىنشى كەزەڭدە الەكسەي لۋتسەنكو جارىس جولىن 3 ساعات 49 مينۋت جانە 52 سەكۋندتا ءجۇرىپ ءوتتى. ال ەكىنشى بولىپ مارەگە فرانتسۋز ۆەلوشاباندوزى رەمي دي گريگوري جەتسە، يراندىق ميرساماد پۋرسەديگولاxار قولا جۇلدەنى قاناعات تۇتتى.
