• Қазақ
  •   
  • Qazaq
  •   
  • قازاق
  •   
  • Рус
  •   

    سپارتاكيادا: جۇما نامازعا جينالعان جاماعات جارىستى

    ازاماتتاردىڭ  دۇرىس باعىتتا ءجۇرىپ، ولاردىڭ تۋرا جولدان تايماۋى ءۇشىن الماتى قالالىق ءدىن ىستەرى باسقارماسى ءداستۇرلى يسلامنىڭ سان عاسىرلىق ونەگەسىن ناسيحاتتاپ كەلەدى. ءتىپتى، ءدىندار ازاماتتاردىڭ سپورتپەن ۇزدىكسىز اينالىسۋى ءۇشىن دە بار جاعدايدى جاساۋدا. «ۇلتتىق مۇرا» باعدارلاماسى مەن قالالىق ءدىن ىستەرى جونىندەگى باسقارماسى بىرلەسە وتكىزگەن كەزەكتى سپارتاكيادا الىپ شاھار الماتى قالاسىنىڭ بەس بىردەي مەشىتىندە ءوتتى.

    جۇما نامازعا جينالعان كوپشىلىك كونستيتۋتسيا كۇنىنە وراي ۇيىمداستىرىلعان سپارتاكيادا بارىسىندا ارقان تارتۋ، قوشقار كوتەرۋ، اسىق اتۋ، ارمرەستلينگ سەكىلدى سپورت تۇرلەرىنەن باق سىنادى.

    جينالعان جاماعاتتىڭ نازارىن وزىنە اۋدارعان – قوشقار كوتەرۋ سايىسى بولدى. شىن مىقتىلار باسەكەسىندە قاستەر سارقىتبەك جەڭىمپاز اتاندى. ول 2 مينۋتتا قوشقاردى 75 رەت كوتەرىپ، سىيعا تىگىلگەن ءوز جۇلدەسىن جەتەگىنە بايلاپ الىپ كەتتى. ارقان تارتۋشىلار سايىسىندا ۇيىمشىلدىق تانىتقان «كوكساراي» توبىنىڭ ءاپايتوس جىگىتتەرى توپ جاردى. ال بىلەكتى جىگىتتەردىڭ باسەكەسى – ارمرەستلينگتە ابزال پىرىمبەك قارسىلاس شاق كەلتىرمەي، تۇعىر بيىگىنەن كورىندى. اسىق اتۋدا ۇلتتىق سپورتىمىزدى مىقتى مەڭگەرگەن تاھير عاريفوللا مەرگەندىك تانىتىپ، باس جۇلدەنى يەلەندى.

    جاماعات اراسىنداعى جارىستارعا كوپشىلىكتىڭ قىزىعۋشىلىعى جىل ساناپ ارتىپ كەلەدى. ءوزىم جۋىردا قوناەۆ قالاسىندا وتكەن الىپتار سايىسىنا قاتىسىپ، جۇلدەگەر اتانعان ەدىم. جاماعات اراسىنداعى جارىستى ەستىگەن سوڭ «نەگە قاتىسپاسقا»، دەگەن وي كەلدى.  ارمرەستلينگ، قوشقار كوتەرۋ سايىسىندا كۇشىمدى سىناپ كوردىم. بىرىندە العاشقى ۇشتىككە ەنسەم، ەندى بىرىندە جەڭىمپاز اتاندى. جالپى، وسىنداي سپورتتىق شارالار ءجيى وتكىزىلسە، ەلدىڭ رۋحانياتى كوتەرىلىپ، مەشىت جاماعاتىنىڭ بىرلىگى نىعايا تۇسەدى، — دەدى قوشقار كوتەرۋ سايىسىنىڭ جەڭىمپازى قاستەر سارقىتبەك.

    قالا تۇرعىندارىن سپورتپەن ۇزدىكسىز اينالىسۋىن قامتاماسىز ەتۋگە ارنالعان بىرەگەي جوبانىڭ ماقساتى – قالا تۇرعىندارىن جۇيەلى تۇردە دەنە تاربيەسى مەن سپورتقا تارتۋ، بۇقارالىق سپورتتى دامىتۋ جانە سالاۋاتتى ءومىر سالتىن ۇستانۋعا شاقىرۋ. ءداستۇرلى دىندەر اراسىنداعى اۋىزبىرلىك پەن تاتۋلىقتى، تىنىشتىق پەن تۇراقتىلىقتى، بەيبىتشىلىك پەن ىنتىماقتى دارىپتەۋ. جارىس سوڭىنان جەڭىمپازدار مەن جۇلدەگەرلەر  ۇيىمداستىرۋشىلاردىڭ باعالى سىيلىقتارىمەن ماراپاتتالدى.

    ءازيز تاستاەۆ،

    فوتو: ولگا اپەلگانەتس،

    الماتى

     

    پىكىر جازۋ

    Your email address will not be published. Required fields are marked *

    *