يراندا فۋتبولشىلاردىڭ تۋىستارىنا قىسىم كورسەتىلىپ جاتىر

وسى كۇندەرى فۋتبولدان كاتاردا ءوتىپ جاتقان الەم چەمپيوناتىندا يراننىڭ ۇلتتىق قۇراما كومانداسىنىڭ ويىنشىلارى مەن ولاردىڭ تۋعان-تۋىستارىنا قىسىم كورسەتىلىپ جاتىر. بۇل تۋرالى «چەمپيونات» حابارلادى.

اتاپ ايتقاندا، بۇگىن يران يسلام رەۆوليۋتسياسىنىڭ ساقشىلارى اقش قۇراماسىمەن بولاتىن ماتچتىڭ الدىندا فۋتبولشىلار وزدەرىن «دۇرىس ۇستاماسا»، ولاردىڭ تۋىستارىنىڭ تۇرمەگە قامالىپ، ازاپتالاتىنىن ايتقان دەگەن دەرەك بار.

مالىمەتكە قاراعاندا، قازىر يسلام رەۆوليۋتسياسى ساقشىلارى كورپۋسىنىڭ ون شاقتى وفيتسەرى يران كومانداسىنىڭ فۋتبولشىلارىن ءجىتى قاداعالاپ ءجۇر. ويىنشىلارعا ۇلتتىق قۇرامانىڭ ورنالاسقان جەرىنەن شىعىپ، شەتەلدىكتەرمەن سويلەسۋگە تىيىم سالىنعان.

ەسكەرتە كەتسەك، يران — اقش ماتچى بۇگىن كەشكى 22:00-دە باستالادى. بۇل كوماندالار «ۆ» توبىندا وينايدى. ولاردان باسقا توپتا انگليا مەن ۋەلس قۇرامالارى بار. انگليا توپتا 4 ۇپايمەن كوش باستاپ كەلەدى. ەكىنشى ورىندى 3 ۇپايمەن يران كومانداسى يەلەنىپ وتىر. ال اقش ەكى ۇپايمەن 3-ورىندا. سونداي-اق وسى توپتاعى ۋەلس 1 ۇپايمەن سوڭعى ورىندا تۇر.

داستان كەنجالين،

استانا