Qazaqstan Azııa chempıonatynyń fınalyna shyqty

Qazaqstan sportshylary Taılandta akademııalyq eskek esýden ótip jatqan Azııa chempıonatynyń fınalyna shyqty.

Búgin Taılandtyń Pattaııa qalasynda akademııalyq eskek esýden eresekter men jastar arasyndaǵy Azııa chempıonaty bastaldy. Bul synda el namysyn 13 eresek (11 erkek, 2 áıel) pen 9 jas sportshy (3 erkek, 6 áıel) qorǵap jatyr. Birneshe sportshymyz  irikteý jarysynan sátti ótip, júlde úshin talasýǵa múmkindik aldy.

Eresekter arasynda (LW4h) Roza Keńes, Valentına Volkodavova, Medına Qońyrbaeva, Ekaterına Noskova kvarteti irikteýde óz tobynda márege besinshi bolyp keldi. Jarysqa alty eldiń sportshylary qatysqandyqtan otandastarymyz 3 jeltoqsanda ótetin fınalǵa joldama aldy.

Eresekter arasynda (LM4-) Ádilet Kerimbek, Qýanysh Bekbembetov, Danıl Petrenko men Bapan Ashambek irikteýde altynshy oryn alyp, 3 jeltoqsanda ótetin fınalǵa shyqty.

Jasóspirimder arasynda (JW2-) Melanı Jaqypova men Anjela Polıanına juby irikteý kezeńinde óz tobynda tórtinshi satyǵa turaqtady. Endi olar 3 jeltoqsandaǵy fınalda baq synaıdy.

Al eresekter arasyndaǵy jekeleı jarysta (W1x) Svetlana Germanovıch irikteýde márege ekinshi bolyp keldi. Bul topta tek jeńiske jetken sportshy ǵana fınalǵa shyqty. Qalǵan eskek esýshiler jubanysh jarysynda fınalǵa shyǵýǵa tyrysyp kóredi.

Eresekter arasynda (M2x) Mıhaıl Taskın men Alekseı Krasnovskıı dýeti irikteýde tórtinshi bolyp fınalǵa tikeleı joldama ala almady. Dese de jubanysh jarysyna qatysyp, fınalǵa jete alady.

Bıylǵy sary qurlyq básekesine 18 eldiń 150-ge tarta sportshysy qatysyp jatyr.

Dastan KENJALIN,

ASTANA