سامبوشى رامازان ماماەۆ — الەم چەمپيونى

ماڭعىستاۋ وبلىسىندا سوڭعى جىلدارى سامبو جانە دزيۋدو كۇرەستەرى ەرەكشە قارقىنمەن دامۋ ۇستىندە. اسىرەسە، «جاس باتىر» سپورت مەكتەبىنىڭ ديرەكتورى ماناربەك بيسەكەنوۆ  باستاعان وبلىس سامبوشىلارى مەن دزيۋدوشىلارى كۇرەستىڭ وسى تۇرلەرىن دامىتۋعا بار ۇلەستەرىن قوسىپ، ءبىر جاعادان باس، ءبىر جەڭنەن قول شىعارىپ، ەڭبەك ەتۋدە.

مىڭە، سول ەڭبەك ءوزىنىڭ العاشقى جەمىسىن بەردى. بۇگىن سەربيانىڭ نوۆي-ساد قالاسىندا ءوتىپ جاتقان سامبودان جاستار اراسىنداعى الەم چەمپيوناتىندا ماڭعىستاۋلىق سامبوشى رامازان ماماەۆ – ماڭعىستاۋ وبلىسى تاريحىندا تۇڭعىش رەت الەم چەمپيونى اتاندى. قازاق ەلىنىڭ سامبوشىلارى جاستار اراسىندا سوڭعى 7 جىلدا الەم بىرىنشىلىكتەرىنەن التىن جۇلدەنى الا الماي جۇرگەن بولاتىن. رامازان ەل ءۇمىتىن اقتادى.

رامازان 62 كگ سالماقتا العاشقى بەلدەسۋىندە گوللانديالىق پالۋاندى ۇتسا، ەكىنشى بەلدەسۋدە بولگار جىگىتىن قاپى قالدىردى. فينالعا شىعار جولدا تاجىكتى جارىس جولىنان شىعارىپ، فينالدا موڭعول پالۋانىنان باسىم ءتۇستى. ءسويتىپ، ءوزىنىڭ الەم چەمپيوناتىنداعى العاشقى التىن جۇلدەسىن جەڭىپ الدى.

رامازان بۇعان دەيىن دزيۋدو كۇرەسىنەن قازاقستان رەسپۋبليكاسىنىڭ سپورت شەبەرى اتانىپ، ازيا جانە ەۋروپا كۋبوگىنىڭ يەلەنگەن ەدى. سامبو كۇرەسىنەن قازاقستاننىڭ 3 دۇركىن چەمپيونى جانە كۋبوگىنىڭ يەگەرى اتانىپ، جاستار ويىندارىن ۇتىپ، ازيا چەمپيونى اتاعىن يەلەندى.

«جاس باتىر» سپورت مەكتەبىنىڭ ديرەكتورى ماناربەك بيسەكەنوۆ رەسپۋبليكالىق «سپورت جۇلدىزدارى» جۋرنالىنىڭ بيىلعى №3 سانىندا «ماقساتىمىز – ازيا جانە الەم چەمپيوندارىن تاربيەلەپ شىعارۋ» دەپ سۇحبات بەرگەن بولاتىن. ىسكەر باسشى، شەبەر ۇيىمداستىرۋشى، بىلىكتى باپكەر ماناربەك بيسەكەنوۆ سوزىندە تۇردى. رامازان ازيانى دا، الەمدى دە باعىندىردى. بۇل ماڭعىستاۋلىق سامبوشىلار مەن دزيۋدوشىلاردىڭ بولاشاق جەڭىستەرىنە باستايتىن جول دەپ بىلەمىز. ەندىگى مەجە – وليمپ شىڭىن باعىندىرۋ. ەگەر، مۇنايلى تۇبەكتە سامبو مەن دزيۋدوعا دەگەن كوزقاراس ءدال بۇگىنگى باعىتتا جالعاسا بەرەتىن بولسا، ول ارمانعا دا قول جەتكىزۋگە بولادى دەپ بىلەمىز.

ەرتەڭ سەربيا بوز كىلەمىنە 72 كگ سالماقتا جالعاس قاسباەۆ دەگەن تاعى ءبىر ماڭعىستاۋلىق پالۋان شىعادى. رامازاننىڭ جەڭىستى جولىن جالعاسىمىز جالعاستىرىپ اكەتسە دەپ تىلەيىك، اعايىن!

مۇساعالي تاسقاليەۆ