ۇلتتىق سپورت تۇرلەرى قاۋىمداستىعى بيىلعى جىلعا جۇمىس جوسپارىن بەكىتتى

استانادا ۇلتتىق سپورت تۇرلەرى قاۋىمداستىعىنىڭ القا وتىرىسى ءوتتى. جيىنعا مادەنيەت جانە سپورت ءمينيسترى اسحات ورالوۆ، قاۋىمداستىق پرەزيدەنتى يسلامبەك سالجانوۆ جانە ۇلتتىق سپورت تۇرلەرى قاۋىمداستىعىنىڭ قۇرامىنا كىرەتىن فەدەراتسيالاردىڭ باسشىلارى قاتىستى.

كەزدەسۋدە قاۋىمداستىقتىڭ بيىلعا ارنالعان دامۋ ستراتەگياسى مەن جۇمىس جوسپارى تانىستىرىلىپ، بەكىتىلدى.

القا وتىرىسىندا ءسوز سويلەگەن مادەنيەت جانە سپورت ءمينيسترى ۇلتتىق سپورت تۇرلەرىنىڭ بارلىق قازاقستاندىق ءۇشىن ەرەكشە ماڭىزى بار ەكەنىن اتاپ ءوتتى.

«قازاقستان وليمپيادالىق سپورت تۇرلەرىنەن الەمدىك ارەنالاردا بەلگىلى ءبىر دەڭگەيدە جەتىستىكتەرگە جەتتى. ەندى ۇلتتىق سپورت تۇرلەرىنەن دە وسىنداي بيىكتەردى باعىندىرۋدىڭ ۋاقىتى كەلدى»، — دەپ اتاپ ءوتتى مينيستر.

يسلامبەك سالجانوۆ قاۋىمداستىق مەملەكەت پەن قوعامنىڭ ىنتىماقتاستىعى نەگىزىندە ۇلتتىق سپورت تۇرلەرىنىڭ تۇراقتى دامۋىنىڭ ەكوجۇيەسىن قالىپتاستىرۋعا باعىتتالعان جاڭا ناقتى قادامدار جاساعانىن اتاپ ءوتتى.

ولاردىڭ قاتارىندا قۇقىقتىق رەتتەۋ جۇيەسىن جەتىلدىرۋدى، قازاقستاننىڭ كوشپەلى مادەنيەتى مەن ءيميدجىن شەتەلدە ىلگەرىلەتۋدى كوزدەيتىن جوسپارلار بار.

«2022 جىلدىڭ قىركۇيەگىنەن باستاپ قاۋىمداستىق جۇمىسىندا وزگەرىستەر بولدى. سپورت تۇرلەرى بويىنشا ۇلتتىق قاۋىمداستىق قۇرامىندا بۇرىن بەس فەدەراتسيا بولعان. ولار: كوكپار، جامبى اتۋ، اۋدارىسپاق، تەڭگە ءىلۋ، بايگە فەدەراتسياسى. قازىر بىزگە تاعى 4 فەدەراتسيا قوسىلدى: ءداستۇرلى ساداق اتۋ، توعىزقۇمالاق، اسىق اتۋ جانە قۇسبەگىلىك» — دەدى قاۋىمداستىق پرەزيدەنتى.

سونىمەن قاتار جيىنعا قاتىسقاندار 2024 جىلى قازاقستاندا وتەتىن V دۇنيەجۇزىلىك كوشپەندىلەر ويىندارىن وتكىزۋ ماسەلەسىن تالقىلادى.

«V دۇنيەجۇزىلىك كوشپەندىلەر ويىندارىنىڭ وتەتىن ورنىن انىقتاماس بۇرىن جاۋاپتى مەملەكەتتىك ورگان ۇيىمداستىرۋ كوميتەتىن قۇرىپ، ءار فەدەراتسيادان ءبىر وكىلدى قوسۋى كەرەك»، — دەدى توعىزقۇمالاق  فەدەراتسياسىنىڭ پرەزيدەنتى ءاليحان بايمەنوۆ.

YPO Kazakhstan توراعاسى ەرلان قوجاسباي دا V دۇنيەجۇزىلىك كوشپەندىلەر ويىندارىن وتكىزۋگە قاتىستى ويىن ايتتى.

«بۇل جۇمىسقا بيزنەس تۇرعىسىنان قاراۋ كەرەك. ءىس-شارا پايدالى بولۋى كەرەك. دۇنيەجۇزىلىك كوشپەندىلەر ويىندارىن وتكىزۋ وليمپيادا ويىندارىن وتكىزۋمەن تەڭ. سوندىقتان بولاشاقتا ارنايى سالىنعان عيماراتتاردى دۇرىس پايدالانۋ تۋرالى ويلانۋ قاجەت»، — دەدى ەرلان قوجاسباي.

ۇلتتىق سپورت تۇرلەرى قاۋىمداستىعى قۇرامىنا «تەڭگە ءىلۋ»، «بايگە»، «جامبى اتۋ»، «اۋدارىسپاق»، «كوكپار»، «توعىزقۇمالاق»، «قۇسبەگىلىك» جانە «اسىق اتۋ» سپورت تۇرلەرى بويىنشا 9 ۇلتتىق سپورت تۇرىنەن رەسپۋبليكالىق فەدەراتسيالار كىرەدى.

بۇعان دەيىن ۇلتتىق سپورت قاۋىمداستىعىنىڭ باسشىلىق قۇرامىندا وزگەرىستەر بولدى. 6 ۇلتتىق سپورت ءتۇرى بويىنشا رەسپۋبليكالىق فەدەراتسيالاردىڭ باسشىلارى سايلاندى.

داستان كەنجالين،

استانا