ءبيبىسارا اساۋباەۆا گروسسمەيستەر سەرگەي كارياكيندى جەڭدى

ماسكەۋدە ءوتىپ جاتقان «شاحمات جۇلدىزدارى» اتتى حالىقارالىق تۋرنيردە سەنساتسيا بولدى. بليتس شاحماتتان ەكى دۇركىن الەم چەمپيونى ءبيبىسارا اساۋباەۆا راپيدتە جارىستىڭ باستى ءفاۆوريتى سانالىپ وتىرعان سەرگەي كارياكيندى جەڭدى.

مادەنيەت جانە سپورت مينيسترلىگى سپورتتى دامىتۋ ديرەكتسياسىنىڭ حابارلاۋىنشا، رەسەيلىك شاحماتشى الەمدەگى ەڭ مىقتى گروسسمەيستەردىڭ ءبىرى. قازىرگى ۋاقىتتا ونىڭ 2 739 ۇپايى بار.

تۋرنير كوممەنتاتورلارىنىڭ ايتۋىنشا، ءبيبىسارانىڭ بليتستە الەم چەمپيونى بولعانى بەكەر ەمەس. ول ويىننىڭ باسىنان-اياعىنا دەيىن سابىر ساقتاپ، ءار ءجۇرىسىن باعامداپ، «جەتى رەت ولگەپ، ءبىر رەت كەسىپ» سەرگەي كارياكيننىڭ قورعانىسىن بۇزىپ، جەڭىسكە جەتتى.

ەكى مىقتىنىڭ ويىنى ءتۋرنيردىڭ ءسانىن كەلتىردى. ءبيبىسارا بۇعان دەيىن سۇحباتتارىندا وسى تۋرنيردە سەرگەي كارياكين مەن تەيمۋر رادجابوۆپەن ويناعىسى كەلەتىنىن ايتقان ەدى. ەندى مىنە، ول سول ماقساتىن 100 پايىزدان ارتىعىمەن ورىنداپ شىقتى.

رەسەيلىك گروسسمەيستەر اساۋباەۆادان جەڭىلگەنىنە ەش ۇيالمايتىنىن ايتتى.

مەن وتە جاقسى وينايتىن الەم چەمپيونىنان ۇتىلدىم، — دەدى كارياكين ويىننان كەيىن.

بۇل جارىستىڭ جۇلدە قورى — 15 ملن رۋبل. قازىر مۇندا الەمدەگى ەڭ مىقتى شاحماتشىلار ويناپ جاتىر. ولاردىڭ قاتارىندا ءبيبىسارا اساۋباەۆا، سەرگەي كارياكين، الەكساندر گريششۋك، تەيمۋر رادجابوۆ، راۋناكۋ سادۆاني، فرانسيسكو ۆالەحو، ۆلاديسلاۆ ارتەمەۆ، ەكاتەرينا لاگنو جانە باسقا دا الا تاقتانىڭ شەبەرلەرى بار.

ءبىر قىزىعى، اساۋباەۆا تۋرنيرگە قاتىساتىنىن باستالاردان ەكى كۇن بۇرىن بىلگەن. ءبيبىسارا الەم چەمپيونى ۆلاديمير كرامنيكتىڭ ورنىندا ويناپ جاتىر ەكەن.

راپيد باسەكەسى 24-26 قاڭتاردا بولدى. ەندى بليتس جارىسى 28، 30 قاڭتاردا بولادى.

داستان كەنجالين،

استانا