فۋتبولدان قازاقستان كۋبوگى ءۇشىن 1/8 فينالىنىڭ كەزدەسۋلەرى ءوتتى

كۇتپەگەن ناتيجە تالدىقورعاندا تىركەلدى. وندا ءبىرىنشى ليگادا وينايتىن «جەتىسۋ» كومانداسى وتكەن جىلعى ەل چەمپيونى ءارى كۋبوكتىڭ يەگەرى «استانانى» قابىلداپ، 2:1 ەسەبىمەن جەڭىسكە جەتتى. 10-مينۋتتا ەسەپتى ەلوردالىق ابزال بەيسەبەكوۆ اشقانىمەن، كەزدەسۋ سوڭىنا تامان الاڭ يەلەرى ابجىلدىك كورسەتتى. 75-مينۋتتا ولەگ حرومتسوۆ تارازى باسىن تەڭەستىرسە، 87-مينۋتتا الەكسەي شاكين جەڭىس گولىن سوقتى. ءسويتىپ قازاقستاندىق مامان دميتري وگايدىڭ شاكىرتتەرى ەشكىمنەن دە قايمىقپايتىندىقتارىن تانىتتى. دەگەنمەن بۇل ماتچتا بولگاريالىق مامان ستانيمير ستويلوۆ «استانانىڭ» قوسالقى قۇرامىندا وتىرعانداردى الاڭعا شىعاردى. ويىندار ءار ءۇش-ءتورت كۇن سايىن وتەتىندىكتەن، نەگىزگى قۇرامدى تىنىقتىرىپ الۋدى ويلاعاندىقتان شىعار، ءدال سونداي ءتاسىلدى ورالدا «اقجايىقتىڭ» باپكەرى ۆاحيد ماسۋدوۆ تا قولداندى.

«اقجايىق» پەن «اقتوبە» كوماندالارى 120 مينۋت بويى اڭدىسقانىمەن، بىردە-ءبىر گول سوعا المادى. 11 مەترلىك باسەكەدە ورالدىقتاردان رۋسلان ۆاليۋللين ءمۇلت كەتىپ، اقتوبەلىكتەر 5:4 ەسەبىمەن ۇتىپ، كەلەسى كەزەڭگە جولداما الدى.

استانالىقتاردىڭ جولىن «قۋماعان» «اتىراۋ» مەن «وقجەتپەس» كوماندالارى وڭتۇستىك قازاقستانعا بارىپ، ءبىرىنشى ليگا كلۋبتارىنان شەبەرلىگىن اسىردى.

اتىراۋلىقتار شىمكەنتتە «قىراننان» 2:1 ەسەبىمەن باسىم ءتۇستى. مۇندا الاڭ يەلەرىنەن ايدار جاقسىبەك ەسەپ اشقانىمەن، «اتىراۋدان» نوۆيتسا ماكسيموۆيچ پەن داۋرەن قايرالليەۆ ەكى دوپپەن جاۋاپ قايىردى.

ال «وقجەتپەس» اتاكەنتتە وتكەن ويىندا «ماقتاارالدى» 4:1 ەسەبىمەن ويسىراتا ۇتتى. الەكساندر ماروچكين، ماكسيم فەدين، يگور يۋرين جانە دانيل چەرتوۆ سوققان گولعا «ماقتاارالدان» ەلمار نابيەۆ ءبىر عانا دوپپەن «ءۇن قاتتى».

ەسەسىنە وڭتۇستىك قازاقستاننىڭ باس كومانداسى «ورداباسى» پەتروپاۆلدا ءبىرىنشى ليگانىڭ تاعى ءبىر وكىلى «قىزىلجارمەن» وتكەن كەزدەسۋدە جەرگە قاراعان جوق. گوگيتا گوگۋا سوققان جالعىز گول شىمكەنتتىكتەرگە جەڭىس اپەردى.

جۋىردا قاراعاندى وبلىسىنىڭ اكىمىمەن كەزدەسىپ، قاتتى سىنعا ۇشىراپ، سوگىس العان «شاحتەر» كلۋبىنىڭ باسشىلىعى سودان قورىتىندى شىعارعان بولۋى كەرەك. پرەمەر-ليگادا كوش سوڭىندا كەلە جاتقان كەنشىلەر قوستانايدا «توبىلدى» 2:1 ەسەبىمەن تىزە بۇكتىردى. الدىمەن «شاحتەردەن» يۋليۋس سزوكە مەن ايدوس تاتتىباەۆ مەرگەندىك تانىتسا، «توبىلدان» توقتار جاڭعىلىشباي عانا كوزگە تۇسە الدى.

بيىلعى سۋپەركۋبوك يەلەرى الماتىنىڭ «قايراتى» ءوز الاڭىندا «تارازدى» قابىلداپ، 2:0 ەسەبىمەن باسىمدىلىق تانىتتى. بۇل ويىندا اندرەي ارشاۆيننەن پاس العان گەورگي جۋكوۆ «قايراتتىڭ» ساپىنداعى العاشقى گولىن سوقتى. سودان كەيىن يۆو يليچەۆيچ 11 مەترلىك پەنالتيدەن ءمۇلت كەتكەن جوق.

ورالداعى كەزدەسۋ سياقتى، پاۆلوداردا «ەرتىس» پەن قىزىلوردانىڭ «قايسارى» قوسىمشا ەكى تايم ويناۋعا ءماجبۇر بولدى. نەگىزگى ۋاقىتتا الاڭ يەلەرىنەن يسماەل فوفانا مەن فرانك دجا دجەدجە قارسىلاستىڭ قاقپاسىنا ءبىر-بىردەن گول ەنگىزسە، «قايساردان» دۋمان نارزيلداەۆ پەن ەلجاس التىنبەكوۆ ءوز مۇمكىندىكتەرىن ءمۇلت جىبەرگەن جوق. قوسىمشا ۋاقىتتا رودريگونىڭ ارقاسىندا «ەرتىس» 3:2 ەسەبىمەن «قايساردىڭ» مەسەلىن قايىردى.

ءسويتىپ قازاقستان كۋبوگى ءۇشىن شيرەك فينالدا «اقتوبە»، «اتىراۋ»، «وقجەتپەس»، «شاحتەر»، «ورداباسى»، «قايرات»، «ەرتىس» جانە ءبىرىنشى ليگانىڭ جالعىز وكىلى «جەتىسۋ» وينايتىن بولادى.

http://www.inform.kz/kz/futbol-astana-kazakstan-kubogy-zholyndagy-zharystan-shygyp-kaldy_a3018798