تۇركيا تۋرى: «استانا» جۇلدەگەرلەر قاتارىنان كورىندى

انادولى ەلىندە وسىمەن 53-ءشى رەت جالاۋى جەلبىرەگەن «تۇركيا تۋرى» جارىسى ءوز مارەسىنە جەتتى. بۇل بايگە ءبىر جەتىگە سوزىلىپ، جەر-ءجۇزىنىڭ ۆەلوسپورت جارىسىنا قىزىعاتىن جانكۇيەرلەرىنىڭ بار نازارىن وزىنە اۋداردى. وسى سىنعا ەلىمىزدىڭ اتىنان «استانا» كاسىپقوي ۆەلوكلۋبى دا قاتىستى.

وندا قازاقستاندىق كوماندا جارىستىڭ بارلىق كەزەڭدەرىندە قارسىلاستارىنا لايىقتى باسەكەلەس بولىپ، ەكى رەت جۇلدەلى ورىننان كورىندى. تۋردىڭ ءتورتىنشى كۇنى يتاليان ديەگو ۋليسسي بىرىككەن اراب امىرلىكتەرىنىڭ كومانداسىنا جەڭىس سىيلاسا، ودان 12 سەكۋند ارتتا قالعان «استانانىڭ» ۆەلوشاباندوزى دات يەسپەر حانسەن ەكىنشى بولىپ مارە سىزىعىن كەستى. ونىڭ بۇل كورسەتكىشى جالپى ەسەپتەگى جاعدايعا اسەر ەتتى. ءسويتىپ، ول جالپى ەسەپتە ەكىنشى ورىنعا تابان تىرەدى. ال «اندرويد» كلۋبىنىڭ وكىلى فاۋستو ماسنادا جارىستى ءۇشىنشى ورىنمەن اياقتادى.

داستان كەنجالين