بوكس: جەتىنشى كۇنگى كورسەتكىشى: 3 جەڭىس، 1 جەڭىلىس

تاشكەنتتە ءوتىپ جاتقان بوكستان الەم چەمپيوناتىنىڭ جەتىنشى كۇنى قازاقستان بوكسشىلارىنىڭ ۇشەۋى جەڭىسكە جەتىپ، بىرەۋى ۇتىلىپ قالدى. بۇل تۋرالى rast.kz حابارلادى.

بۇگىن 51 جانە 75 كەلىگە دەيىنگى سالماقتاعىلار – 1/16 فينالدىق، ال 57 كەلىگە دەيىنگى جانە 92 كەلىدەن اۋىر سالماقتاعىلار 1/8 فينالدىق شايقاستارىن وتكىزدى.

ءبىزدىڭ بوكسشىلاردان تاشكەنت رينگىنە ءبىرىنشى رەت شىعىپ تۇرعان ساكەن بيبوسىنوۆ (51 كگ) – ۇندىستاندىق ديپاك ديپاكپەن، نۇرقانات رايىس (75 كگ) دومينيكاندىق ۆيرگيليا دە لوس-سانتوس دەلگادومەن قولعاپ تۇيىستىرسە، بۇعان دەيىن ءبىر-ءبىر قارسىلاسىن ۇتىپ شىققان سەرىك تەمىرجانوۆ (57 كگ) – ۆەنگەر رولاند ۆەرەسپەن، قامشىبەك قوڭقاباەۆ (+92 كگ) سيريالىق موحامماد ملايەسپەن كەزدەستى. بۇلاردىڭ الدىڭعى ۇشەۋى كۇندىزگى سەسسيادا، ال قامشىبەك كەشكى سەسسيادا ونەر كورسەتتى.

وكىنىشكە قاراي، بۇل كۇنى ءبىرىنشى بولىپ رينگكە كوتەرىلگەن الەم چەمپيونى ساكەن جەڭىلىسكە دۋشار بولدى. بىراق الدىڭعى ەكى راۋندتا دا باسەكەلەسىنەن باسىم تۇسكەن (3:2، 4:1) ونىڭ سوڭعى راۋندتىڭ قورىتىندىسىمەن قالايشا جەڭىلىسكە ۇشىراعانى تۇسىنىكسىزدەۋ بولىپ قالدى. بۇدان كەيىن شارشى الاڭدى شايقاعان سەرىك ۆەنگەر بوكسشىسىن تاكتيكالىق جاعىنان وتە ادەمى ەتىپ ۇتتى. ونىڭ سوڭىنان دومينيكاندىق اتلەتپەن تايتالاسقا تۇسكەن نۇرقانات ءبىر رەت نوكداۋنعا ءتۇسىپ قالعانىنا قاراماستان، ەكىنشى-ءۇشىنشى راۋندتاردى قارقىندى اياقتاپ، جەڭىستى تارتىپ اكەتتى.

كەشكى سەسسيادا سيريالىق الىپپەن ايقاسقان قامشىبەكتىڭ جەكپە-جەگى ءوزىنىڭ اقىرىنا دەيىن جانكۇيەرلەرىن قاتتى الاڭداتىپ وتىردى. ولاي بولاتىنى، ءبىزدىڭ باعلان راۋند سايىن ارتىق شىعىپ تۇرعانىنا قاراماستان، سالماعى دا اۋىر، جۇدىرىعى دا جۋان سيريالىقتىڭ قاپيادا تيگەن وقىس سوققىسى ءبارىن ءبىر مەزەتتە شەشىپ كەتپەس پە ەكەن دەگەن قاۋىپ سەيىلە قويعان جوق. دەگەنمەن، ءار مۇمكىندىكتەن ءتيىستى ۇپاي جيناي بىلگەن قامشىبەك جۇدىرىعىمەن جەل شايقاپ جۇرگەن جىگىتتىڭ سۇراپىل سىلتەسى ساتتەرىنىڭ بارىنەن سىتىلىپ شىعىپ كەتىپ، گۇجبان گۇرزىنىڭ بار پارمەنىمەن جۇمسالۋىنا مۇرسات بەرگەن جوق.

وسىلايشا، سەرىك پەن قامشىبەك 10 مامىردا وينالاتىن شيرەك فينالعا شىقتى. سول كۇنى سەرىك كۋبالىق دەل-رەي سايدەل ورتا رودريگەسپەن، قامشىبەك وزبەك باحودير جالولوۆپەن شايقاسادى. ال نۇرقانات 9 مامىردا برازيليالىق ۋاندەرەي پەرەيرا 1/8 فينالدىق جەكپە-جەك وتكىزەدى.

سونىمەن، قازاقستان قۇراماسى ساپىنان وسى كەزگە دەيىن ساكەن بيبوسىنوۆ (51 كگ)، تالعات سىرىمبەتوۆ (60 كگ)، ءساناتالى تولتاەۆ (63، كگ) جانە ايبەك ورالباي (92 كگ) ەسىمدى جىگىتتەر جارىس جولىنان شىعىپ قالدى. توپ تالاسىندا ءالى توعىز ساڭلاعىمىز ءجۇر.

ەرتەڭ، 8 مامىر، چەمپيوناتتىڭ سەگىزىنشى كۇنى 48، 54، 60، 86 جانە 92 كەلىگە دەيىنگى سالماقتارداعى اتلەتتەر 1/8 فينالدىق شايقاستارعا قاتىسادى. بۇلاردىڭ قاتارىنا بىزدەن سانجار تاشكەنباي (48 كگ)، ماحمۋد سابىرحان (54 كگ)، ساعىندىق توعامباي (86 كگ) قيقۋ قوسادى. وسى ساناتتاعى سانجار مەن ماحمۋد چەمپيوناتتاعى ءبىرىنشى ۇرىستارىن وتكىزەدى. ال ساعىندىق 2 مامىر كۇنى 1/16 فينالدىق ىرىكتەۋ سىنىندا كونگو دەموكراتيالىق رەسپۋبليكاسىنىڭ وكىلى مبەلين نلاندۋدى ءۇشىنشى راۋندتا تەحنيكالىق نوكاۋتپەن جەڭگەن ەدى.

سونىمەن، ەرتەڭ ماحمۋد سابىرحان كۇندىزگى سەسسيادا ۆەنگەر يشتۆان زاكامەن كەزدەسسە، كەشكى سەسسيادا سانجار تاشكەنباي وزبەك شوديەرجون مەليكۋزيەۆپەن، ساعىندىق توعامباي وزبەك شوحجاحون ابدۋللاەۆپەن جۇدىرىق سىلتەسەدى.

كۇندىزگى سەسسيا شايقاستارى – ساعات 14:00-17:00، كەشكى سەسسيا ساعات 18:00-21:00 ارالىعىندا وتەدى.