دۇنيەجۇزىلىك حالىقارالىق اۋدارىسپاق فەدەراتسياسى قۇرىلدى

الماتىدا قازاقستاننىڭ اۋدىراسپاق فەدەراتسياسى وكىلدەرى مەن موڭعوليادان كەلگەن دەلەگاتسيامەن كەزدەسۋى ءوتتى، دەپ حابارلادى Halyq Uni.

كەزدەسۋدىڭ نەگىزگى ماقساتى موڭعوليادا «اۋدارىسپاق» سپورتىن دامىتۋ، قازاقستان رەسپۋبليكاسىنىڭ ۇلتتىق ات سپورتى تۇرلەرى قاۋىمداستىعى مەن اۋدارىسپاق فەدەراتسياسىنىڭ قولداۋىمەن IV ازيا چەمپيوناتىن وتكىزۋ جانە فەدەراتسيالار اراسىنداعى جۇمىس جوسپارىن تالقىلاۋ بولدى.

كەزدەسۋ اياسىندا ەكى فەدەراتسيا ىنتىماقتاستىق تۋرالى مەموراندۋمعا قول قويدى. بۇل قادام قازاقستان مەن موڭعوليا اراسىنداعى ۇلتتىق ات سپورتى سالاسىنداعى ىنتىماقتاستىقتى دامىتۋ ءۇشىن جاڭا پەرسپەكتيۆالار اشادى.

كەزدەسۋدە شتاب-پاتەرى قازاقستان رەسپۋبليكاسىنىڭ الماتى قالاسىندا ورنالاسقان دۇنيەجۇزىلىك حالىقارالىق اۋدارىسپاق فەدەراتسياسىن قۇرۋ تۋرالى تاريحي شەشىم قابىلداندى. دۇنيەجۇزىلىك حالىقارالىق اۋدارىسپاق فەدەراتسياسىنىڭ قاتىسۋشى ەلدەرى 11 مەملەكەتتى انىقتادى: قازاقستان رەسپۋبليكاسى، رەسەي فەدەراتسياسى، قىرعىز رەسپۋبليكاسى، قىتاي، ۆەنگريا، اۋعانستان، تۇركيا، موڭعوليا، تاجىكستان، وزبەكستان، ءازىربايجان.

دەلەگاتتار 2023 جىلعى 05-07 شىلدەدە قازاقستان رەسپۋبليكاسىنىڭ الماتى قالاسىندا بۇكىلالەمدىك اۋدارىسپاق حالىقارالىق قوعامداستىعىنىڭ تاريحتا العاشقى قۇرىلتايدىڭ وتەتىن كۇندەرىن انىقتادى، وندا بارلىق 11 قاتىسۋشى ەلدىڭ وكىلدەرى جينالادى. دۇنيەجۇزىلىك حالىقارالىق اۋدارىسپاق فەدەراتسياسىنىڭ پرەزيدەنتى بولىپ مارات جۇمان سايلاندى.

ناتيجەسىندە موڭعوليادان كەلگەن دەلەگاتسيامەن كەزدەسۋ ءساتتى جانە ناتيجەلى بولدى، ول ەكى فەدەراتسيا اراسىنداعى ىنتىماقتاستىقتى نىعايتتى.