جاقسىلىق ۇشكەمپىروۆ تۋرنيرىندە التى بالۋان جەڭىمپاز اتاندى

بۇگىن استانا قالاسىندا داڭقتى بالۋان جاقسىلىق ۇشكەمپىروۆتى ەسكە الۋعا ارنالعان گرەك-ريم كۇرەسىنەن 20 جاسقا دەيىنگى بالۋاندار اراسىنداعى حالىقارالىق تۋرنير اياقتالدى، دەپ حابارلادى مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى.

ەلىمىزدىڭ ءار وڭىرىنەن كەلگەن بالۋاندارمەن قاتار قىرعىزستان، وزبەكستان، تاجىكستان، ازەربايجان رەسپۋبليكاسى مەن ءيزرايلدىڭ ۇزدىك 164 سپورتشىسى 3 كۇن بويى ءوزارا سىنعا ءتۇستى.

قازاق بالۋاندارى اراسىنان ايبەك ايتبەكوۆ (55 كگ)، ولجاس ەرعالي (77 كگ)، يسلام ەۆلوەۆ (82 كگ)، نۇراسىل امانالى (87 كگ)، نۇرتاس قىدىرباەۆ (97 كگ)، جوحار ۋزاروۆ (130 كگ) ءوز سالماعىندا چەمپيون اتاندى. قازاقستان قورجىنىندا بارلىعى 6 التىن، 5 كۇمىس، 14 قولا جۇلدە الدى.

ازەربايجان قۇراماسى يلكين گۋربانوۆ (60 كگ)، كانان ابدۋللازادە (67 كگ، U-20 الەم چەمپيونى) پەن رۋسلان نۋرۋللاەۆ (72 كگ) ءوز سالماعىندا ۇزدىك شىققان سوڭ جالپى ەسەپتە ەكىنشى ورىنعا تۇراقتادى. ۇزدىك ۇشتىكتى تۇيىندەگەن قىرعىز رەسپۋبليكاسىنا جالعىز التىن مەدالدى جانتورو ميرزاليەۆ (63 كگ) سىيلادى.

بۇل جارىستىڭ ءبىز ءۇشىن ورنى ەرەكشە. جىلدان-جىلعا اۋقىمى كەڭەيىپ كەلە جاتقانى قۋانتادى. كەلەسى جىلى بۇدان دا كوپ ەل قاتىسۋى ءۇشىن جىلدىڭ باسىنا اۋىستىرۋ كەرەك بولادى. ونى حالىقارالىق كۇرەس فەدەراتسياسىنىڭ كۇنتىزبەسىن ەسكەرە وتىرىپ، بەكىتۋىمىز قاجەت. مىسالى، وسى جارىسقا وزبەكستان قۇراماسى ءبىراز مىقتى بالۋاندارىن جىبەرە المادى. سەبەبى، وندا قازىر ەل چەمپيوناتى ءوتىپ جاتىر. ال ازەربايجان مەن قىرعىزستان قۇراماسى نەگىزگى قۇراممەن كەلدى، -دەپ ايتتى قازاقستان ايەلدەر، گرەك-ريم جانە ەركىن كۇرەس فەدەراتسياسىنىڭ پرەزيدەنتى، پارلامەنت ءماجىلىسىنىڭ دەپۋتاتى داۋلەت تۇرلىحانوۆ.

بيىل وليمپيادا چەمپيونىن ەسكە الۋعا ارنالعان باسەكە ءۇش-رەت ۇيىمداستىرىلدى. داڭقتى بالۋان قايتىس بولعانعا دەيىن بوزكىلەم شەبەرلەرىنىڭ ءتۋرنيرى جاقسىلىق ۇشكەمپىروۆتىڭ جۇلدەسى ءۇشىن ءوتىپ كەلدى.

جازدا ازيا چەمپيوناتىنا باراتىن ۇلتتىق قۇراما بالۋاندارى ءوز دەڭگەيىن تاعى ءبىر مارتە كورسەتتى.  ەلىمىزدىڭ وڭىرلەرىنەن اقتوبە وبلىسى جاقسى ناتيجە كورسەتتى. الداعى ەكى ايدا ءبىز ءۇشىن جاۋاپتى جارىستار بار. الداعى كۇندەرى ازەربايجان قۇراماسىمەن بىرلەسىپ، دايىندىقتىڭ ءبىرىنشى كەزەڭىنە كىرەسەمىز. ولاردىڭ كوزدەگەنى ەۋروپا چەمپيوناتى، -دەدى قازاقستان جاستار قۇراماسىنىڭ اعا جاتتىقتىرۋشىسى قونىسبەك تۋكەنوۆ.

وسى تۋرنيردەن كەيىن استانا قالاسىندا قازاقستان مەن ازەربايجان قۇراماسى بىرلەسكەن وقۋ جاتتۋعۋ-جيىنىن وتكىزىپ، قۇرلىق چەمپيوناتىنا دايىندىققا كىرىسەدى. ءبىزدىڭ بالۋاندار 12-20 شىلدە ايىندا يوردانيا استاناسى امماندا سارى قۇرلىق باسەكەسىندە (U-15 پەن 20) باق سىناسادى. ازەربايجان سپورتشىلارى ەۋروپا چەمپيوناتىندا جۇلدەگە تالاسادى. وسى جاس ساناتىنداعى الەم چەمپيوناتى پولشا استاناسى ۆارشاۆادا 14-20 تامىز ارالىعىندا بولادى.

شامكەن بايىربەك،

استانا