Astanada kórkem gımnastıkadan Spartakıada aıaqtaldy

Búgin Astanada kórkem gımnastıkadan Qazaqstannyń VI jazǵy Spartakıadasy aıaqtaldy.

Mádenıet jáne sport mınıstrliginiń Sportty damytý dırekııasy Spartakıadaǵa elimizdiń ár óńirinen kelgen 54 gımnasttyń qatysqanyn habarlady. Al toptyq jattýǵýda 12 komanda baq synasty. Olardyń ishinde Eljańa Tanıeva, Erıka Jaılaýova, Mılana Parfılova syndy halyqaralyq básekelerde el namysyn qorǵap júrgen ulttyq qurama ókilderi boldy.

Shyǵyrshyqpen óner kórsetýde ulttyq quramanyń kóshbasshylary eshkimge des bergen joq. Bas júldeni Eljańa Tanıeva alsa, Mılana Parfılova kúmis, Aıbota Ertaıqyzy qola medalge ıe boldy.

Eljańa Tanıeva doppen jattyǵýda da chempıon atansa, Aıbota Ertaıqyzy ekinshi, Erıka Jaılaýova úshinshi oryn aldy.

Urshyq pen lenta jattyǵýynda Eljańa Tanıeva úzdik atandy. Kúmis júldeni Mılana Parfılova, qola medaldy Erıka Jaılaýova ıelendi. Kópsaıysta, ıaǵnı tórt quralmen óner kórsetýde ár baǵdarlamada turaqty nátıje kórsetken Erıka Jaılaýova altyn júlde alsa (115,450 ball), shymkenttik Mılana Parfılova (111,700 ball) men Baıan Qoıbaqar (102,950 ball) qurmet tuǵyrynyń qalǵan satysyna kóterildi. Bul saıysta 15 gımnast fınalǵa iriktelip, joldama aldy.

Al toptar arasyndaǵy jáne komandalyq kópsaıysta birdeı nátıje tirkeldi. Eki synda da Shymkent qalasynyń gımnastshylary bas júldege laıyq ekenin taǵy bir márte dáleldese, odan keıingi orynǵa Astana men Almaty qalasynyń ujymy jaıǵasty.

Keshe kórkem gımnastar saıysynyń ashylýyna Sportty damytý dırekııasy dırektorynyń orynbasary, VI jazǵy Spartakıadanyń bas tóreshisi Azamat Imashev, Astana qalasy Dene shynyqtyrý jáne sport basqarmasynyń basshysy Samat Jylqybaev, federaııanyń bas hatshysy qatysyp, sóz sóıledi.

Bul eldegi barlyq kórkem gımnast úshin jaýapty jarys. Jýyrda Portýgalııadaǵy Álem kýbogy kezeńinde sátti óner kórsetken ulttyq qurama sportshylary da osynda synǵa túsedi. Sosyn, Fılıppınde ótetin Azııa chempıonatyna daıyndyqty bastaıdy. Al kúzde jyldyń basty básekesi — Azııa oıyndary bar. Sol synda gımnastarǵa zor senim artamyz, — dedi Azamat Imashev.

Jalpy esepte Shymkent qalasynyń gımnastary 7 altyn, 5 kúmis pen 1 qola medal jeńip alyp, birinshi orynǵa shyqty. Astana qalasy (1 altyn, 3 kúmis, 4 qola) kúmis, Almaty qalasy (1 altyn, 1 kúmis, 2 qola) qola júldeger atandy.

Shamken BAIYRBEK,

ASTANA