• Қазақ
  •   
  • Qazaq
  •   
  • قازاق
  •   
  • Рус
  •   

    باۋىرجان مومىش ۇلى اتىنداعى جارىس جالعاسىن تاپتى

    ءتول كۇرەسىمىزدەن قازاقتىڭ حالىق باتىرى، جازۋشى  باۋىرجان مومىش ۇلىنىڭ اتىنداعى ءداستۇرلى جارىس اراعا ءبىراز جىل سالىپ، بيىل قايتا جالعاسىن تاپتى. جاسوسپىرىمدەر اراسىندا جالاۋىن كوتەرگەن جەكپە-جەككە الماتى قالاسى مەن الماتى وبلىسىنان 100-دەن اسا جاس پالۋان كەلىپ، باقتارىن سىنادى. ءداستۇرلى تۋرنير اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە ۇيىمداستىرىلدى.

     بۇل تۋرنيردەن  ەلىمىزگە تانىمال كوپتەگەن تالانتتى پالۋاندار ءوسىپ شىقتى. سولاردىڭ ءبىرى قازاق كۇرەسىنەن ەكى دۇركىن الەم چەمپيونى، ازيا چەمپيونى باۋىرجان ءتالىپ پەن الەم چەمپيوناتىنىڭ كۇمىس جۇلدەگەرى ەركىن سايداقوۆ.

    مىنە، وسىنداي جۇلدىزدى سپورتشىلاردىڭ شوعىرىن دايىنداپ شىعارعان ايتۋلى تۋرنير  31-ءشى رەت جالاۋىن جەلبىرەتتى. ءدۇبىرلى جارىس باتىر  رۋحىن قۇرمەتتەگەن  جاناشىر ازاماتتاردىڭ ارقاسىندا كەزەكتى رەت ءوتتى.  بىر-ەكى جىل اراعا ءۇزىلىس سالىپ جالعاسىن تاپقان تۋرنير بيىل الماتى قالاسىنىڭ سپورت باسقارماسى، «سپارتاك» ستاديونىنىڭ ديرەكتورى ارىستان قۇلجاباەۆ، اباي اتىنداعى قازاق ۇلتتىق  پەداگوگيكالىق ۋنيۆەرسيتەتىنىڭ ساۋىقتىرۋ  دەنە مادەنيەتى جانە سپورت كافەدراسىنىڭ مەڭگەرۋشىسى امانتاي قاراقوۆ  سىندى ۇلتىق كۇرەسىمىزگە جاناشىر جانداردىڭ   مۇرىندىق بولۋىنىڭ ارقاسىندا قايتا جاڭعىرىپ وتىر. نەگىزى باۋىرجان اتامىزدىڭ اتىنداعى ايتۋلى جارىستى كوپ جىلدان بەرى ومىرشەڭ بولۋىنا شاھارىمىزداعى حالىقتىق ۇلتتىق سپورت تۇرلەرى جانە بۇقارالىق دەنەشىنىقتىرۋ-ساۋىقتىرۋ كلۋبىنىڭ بۇرىنعى ديرەكتورى، ارداگەر اۋىر اتلەت اعامىز ءىزباسار ورازباقتىڭ قوسقان  ۇلەسى ەرەكشە بولعانىن ايتقانىمىز ءجون. مىنە، ەنەدى تولقىندى، تولقىن قۋادى — دەمەكشى، ايتۋلى سپورت كلۋبىنا باسشى بولىپ كەلگەن نۇرعيسا نۇرعاليەۆ تە  باتىر اتامىزدىڭ اتىنداعى الاماندى ابىرويلى وتكىزۋگە ءبىر كىسىدەي اتسالىسۋعا كەلىپتى. سونىمەن بىرگە جاس تا بولسا باس بولىپ، وسى جارىستى وتكىزۋگە شارق ۇرىپ شاپقىلىپ جۇرگەن قازاق كۇرەسىنەن الەم چەمپيوناتىنىڭ كۇمىس جۇلدەگەرى ەركىن سايداقوۆ، الداعى جىلى جارىستى رەسپۋبليكا دەڭگەيىنە شىعارۋدى ماقسات ەتىپ وتىر.  اسقارالى ماقسات قويعان جاعدايدا عانا ىرگەلى ىستەر كورىنىس بەرەرى بەسەنەدەن بەلگىلى. سونىمەن بىرگە، ارينە  قولداۋ بولعان جەردە ناتيجە  كۇتتىرمەيتىنى انىق دەسەك، باۋىرجانداي قازاقتىڭ حاس باتىرىنىڭ تۋرنيرىنە دەمەۋشىلەر تابىلماۋى مۇمكىن ەمەس شىعار. سوندىقتان دا كوپ جىلدان بەرى تالاي-تالاي تارلانبوز جاستاردىڭ توماعاسىن سىپىرىپ كەلە جاتقان ايتۋلى الاماننىڭ شابىسى كىدىرمەسە ەكەن دەگەن ويدامىز.

    ءبىر جارىستى رەسپۋبليكالىق دەڭگەيگە كوتەرىپ، ون جىل ۇزبەي ۇيىمداستىرۋ وڭايعا سوقپايتىنى ءمالىم. قانشاما بوتا پالۋانداردىڭ بولاشاعىنا باعدارشام رەتىندە ماڭىزى زور بولىپ كەلدى.

    سونىمەن جارىستىڭ سالتاناتتى اشىلۋىنان كەيىن پالۋانداردىڭ بەلدەسۋلەرى باستالىپ كەتتى.  ەكى كۇن بويى بوز كىلەمدە تەر توككەن وقۋشىلار مەن ستۋدەنتتەر اراسىندا وتكەن تارتىسقا تولى وتكەن بەلدەسۋلەردەن توپ جارىپ شىققان جەڭىمپازداردىڭ ەسىمدەرى  دە بەلگىلى بولدى. 2002-2004 جىلى تۋعان جاسوسپىرىمدەر 9 سالماق دارەجەسى بويىنشا كۇش سىناسسا، ستۋدەنت جاستار اراسىندا 8 سالماق بويىنشا جەڭىمپازدار انىقتالدى.

    فينالدا  ستۋدەنتتەر اراسىندا اباي اتىنداعى قازاق ۇلتتىق  پەداگوگيكالىق ۋنيۆەرسيتەتىنىڭ 55 كگ سالماقتاعى ستۋدەنتى  نۇرسۇلتان  نۇرسەيتوۆ، نۇرمان قايىپبەردى (66 كگ) پەن امانجول جانبوتا (82 كگ) التىن جۇلدەمەن بىرگە كورەرمەندەردىڭ سۇيىسپەنشىلىگىنە بولەنسە، جاسوسپىرىمدەردىڭ اراسىندا ەرتاي نىسانوۆ (38كگ)، اكەجان ايتوللا (55كگ) مەن  جاندوس ەسكەندىر (60كگ) تاماشا جەكپە-جەكتەر كورسەتىپ، جەڭىمپاز اتاندى.

    جالپى، قازىر ەلىمىزدىڭ ءار ايماعىندا جاستارىمىزدىڭ قازاق كۇرەسىنە دەگەن قۇلشىنىسى كۇن ساناپ ءوسىپ كەلەدى دەسەك، باۋىرجان اتامىزدىڭ اتىنداعى بوتا پالۋاندار اراسىنداعى ءداستۇرلى سىننىڭ بولاشاعى زور دەپ ايتۋعا بولادى. جارىستىڭ ۇيىمداستىرۋشىلارى الداعى جىلى ايتۋلى باسەكەنى رەسپۋبليكالىق دەڭگەيدە وتكىزۋگە بەل بايلاپ وتىر.

     اقىن ورداباي ۇلى،

     الماتى

    پىكىر جازۋ

    Your email address will not be published. Required fields are marked *

    *