الماتىدا «ءتان سۇلۋلىعى — ۇستازدا» سپورتتىق فەستيۆالى ءوتتى

قازاقستان رەسپۋبليكاسىنىڭ تۇڭعىش پرەزيدەنتى مەرەكەسى كۇنى الماتىداعى اباي اتىنداعى   قازاق ۇلتتىق پەدوگوگيكالىق ۋنۆەرسيتەتىندە «ءتان سۇلۋلىعى – ۇستازدا» سپورتتىق فەستيۆالى ءوتتى.

مەملەكەت باسشىسى نۇرسۇلتان نازارباەۆتىڭ سالاماتتى قوعامدى قالىپتاستىرۋ ساياساتىن قولداۋ، سالاۋاتتى ءومىر سالتىن ناسيحاتتاۋدى ماقسات تۇتقان سپورتتىق شارا بارىسىندا  ارقان تارتۋ، ۆولەيبول، قازاق كۇرەسى،  جەڭىل اتلەتيكا، ۆەلوجارىس، ۇستەل تەننيسى، شاحمات، توعىزقۇمالاق،  قول كۇرەسى سپورتتىق ويىن تۇرلەرى  بويىنشا جارىستار ۇيىمداستىرىلىپ، رەكتورات قۇراما كومانداسىمەن قاتار  بارلىق ينستيتۋتتاردان 7  كوماندا قاتىستى.

مەرەكەلى شارانى ۋنيۆەرسيتەت رەكتورى تاكير  بالىقباەۆ اشىپ، بيىلعى وقۋ جىلى ۋنيۆەرسيتەت ابىرويىن اسقاقتاتىپ، تۋىن كوككە جەلبىرەتىپ جۇرگەن  رەسپۋبليكالىق، قالالىق جارىستار مەن IX جازعى ۋنيۆەرسيادانىڭ ءتۇرلى ويىندارى بويىنشا جەڭىمپاز اتانعان  56 سپورتشىنى ارنايى ديپلوممەن جانە اقشالاي سىياقىمەن ماراپاتتادى. سوسىن ينيستيتۋتتىڭ نامىسىن ۇلكەن جارىستاردا قورعاپ جۇرگەن سپورتشىلار ءوز ونەرلەرىن كورسەتتى.

ەكى كۇنگە سوزىلعان سپورتتىق فەستيۆالدە قىزمەتكەرلەر مەن پروفەسسور-وقىتۋشىلار  قۇرامى اراسىندا وتكەن جارىستا 25 ۇپاي جيناعان پەداگوگيكا جانە پسيحولوگيا ينستيتۋتىنىڭ كومانداسى جەڭىمپاز اتاندى. ەكىنشى ورىندى 22 ۇپايمەن ونەر، مادەنيەت جانە سپورت ينستيتۋتى السا، ال ءۇشىنشى ورىنعا 19 ۇپايمەن جاراتىلىستانۋ جانە گەوگرافيا ينستيتۋتى يە بولدى.

ستۋدەنتتەر اراسىندا ۇيىمداستىرىلعان سپورتتىق ويىنداردا جالپى كوماندالىق ەسەپتە 24  ۇپاي جيناعان     جاراتىلىستانۋ جانە گەوگرافيا ينستيتۋتىنىڭ كومانداسى  باس جۇلدەنى جەڭىپ الدى. 23 ۇپايمەن  ەكىنشى ورىندى سوربوننا-قازاقستان  ينستيتۋتىنىڭ كومانداسى يەلەنسە،  ۇشىنشى ورىنعا ماتەماتيكا، فيزيكا جانە ينفورماتيكا ينستيتۋتى ورنالاستى.  ولار 19 ۇپاي جينادى. جارىس سوڭىندا بارلىق جەڭىمپاز اتانعان كوماندالار  ۋنيۆەرسيتەت رەكتورىنىڭ گراموتاسى جانە كۋبوگىمەن ماراپاتتالدى.

تۇڭعىش پرەزيدەنت كۇنىنە ورايلاستىرىلعان بۇل شارا جاستاردىڭ سپورتقا دەگەن قىزىعۋشىلىعىن ارتتىرىپ، ۇجىمدىق بىرلىكتى نىعايتا ءتۇستى. جاستارعا جىگەر بەرەر  بۇل سپورتتىق جارىس الداعى جىلى ءداستۇرلى تۇردە جالعاساتىن بولادى.

اقىن ورداباي ۇلى،

سۋرەتتى تۇسىرگەن  س. يمانقۇلوۆ

الماتى