«جاۋىنگەرلىك ونەر قاۋىمداستىعى» ەلوردادا ەرەكشە تارتۋ جاسادى

ەلوردادا استانا كۇنىنە وراي «جاۋىنگەرلىك ونەر اسسوتسياتسياسىنىڭ» گالا-فەستيۆالى ءوتتى.

اۋقىمدى شارا  كوپشىلىككە ەسىگىن ايقارا اشقان سۋ جاڭا «Jekpe-jek» سپورت سارايىندا بولدى. «سامۇرىق-قازىنا» ۇلتتىق ءال-اۋقات قورىنىڭ» قارجىلاي قولداۋىمەن بوي كوتەرگەن سپورت سارايىنىڭ  التاناتتى اشىلۋ راسىمىنە قازاقستان پرەزيدەنتى قاسىم-جومارت توقاەۆ، پرەمەر-مينيستر اسقار ءمامين، پرەزيدەنت اكىمشىلىگىنىڭ جەتەكشىسى قىرىمبەك كوشەرباەۆ، «سامۇرىق-قازىنا» ۇلتتىق ءال-اۋقات قورى»  اق باسقارما توراعاسى احمەتجان ەسىموۆ، مادەنيەت جانە سپورت ءمينيسترى اقتوتى رايىمقۇلوۆا، ۇلتتىق قاۋىپسىزدىك كوميتەتىنىڭ توراعاسى، «جاۋىنگەرلىك ونەر اسسوتسياتسياسىنىڭ» پرەزيدەنتى كارىم ءماسىموۆ باستاعان لاۋازىمدى تۇلعالار قاتىستى.

بەس مىڭ كورەرمەندى ەركىن سىيدىراتىن سپورت كەشەنىندە ەندى  سپورتشىلار الاڭسىز دايىندالادى. وسى جەردە كۇرەس، بوكس، گيمناستيكا، سۋعا ءجۇزۋ جانە جەكپە-جەك سپورتىنان سايىستار وتكىزىلەدى. دودالار وتكىزىلەدى دەمەكشى،  سپورت كەشەنى اشىلعان كۇنى جەكپە-جەك سپورتىنىڭ بىرنەشە تۇرىنەن چەمپيوندىق بەلبەۋلەر ساراپقا سالىنعان   اۋقىمدى دودا ۇيىمداستىرىلدى.

مۋاي-تايدان الەم چەمپيونى اتاعى مەن بەلبەۋى ءۇشىن سىنعا تۇسكەن اتىراۋلىق ەلامان  ساياساتوۆ تايلاندىق ۋنفەتحونگ بۋنچانانى بەس راۋندتىق ايقاستا ۇتتى.  جۇماگەلدى جالعاس ۇلى  پانكراتيوننان چەمپيوندىق بەلبەۋ ءۇشىن ايقاس وتكىزىپ، ۆەنگر سپورتشىسىن ايقىن باسىمدىقپەن جەڭدى.

كيكبوكسينگتەن ابزال ءديۋسىپوۆ پولشالىق سپورتشىدان  باسىم ءتۇسىپ، كاسىبي سپورتتاعى 11-ءىنشى جەكپە-جەگىندە جەڭىسكە جەتتى.

بيىلعى «جاستار جىلىنا» وراي ۇيىمداستىرىلعان شارا بارىسىندا «جاۋىنگەرلىك ونەر اسسوتسياتسياسىنىڭ» وبلىستارداعى  قاۋىمداستىقتارى وتكىزگەن ءىس-شارالار قورىتىندىلاندى.  ناتيجەسىندە اتىراۋ وبلىستىق جاۋىنگەرلىك ونەر قاۋىمداستىعى ۇزدىك ايماق  دەپ تانىلدى.

مامىر ايىنىڭ سوڭىندا مۇنايلى ولكەدە  قاۋىمداستىق اۋقىمدى سپورتتىق شارا ۇيىمداستىرىپ، جەكپە-جەكتىڭ بىرنەشە تۇرىنەن سپورتتىق سايىستار كورسەتىپ، ەسترادا انشىلەرىنىڭ قاتىسۋىمەن گالا-كونتسەرت وتكىزگەندە 10 مىڭنان اسا كورەرمەن جينالعان بولاتىن.  قاۋىمداستىق ديرەكتورى ەرلان تابىلديەۆ باستاعان ازاماتتاردىڭ ەڭبەگى ەلەنىپ «ۇزدىك ايماق» نوميناتسياسىنا يە بولدى. اتىراۋ وبلىستىق جاۋىنگەرلىك ونەر اسسوتسياتسياسىنىڭ ديرەكتورى ەرلان حيسمەت ۇلىنا وسىناۋ ماراپاتتى «سپورت-اككورد» حالىقارالىق سپورتتىق ويىندار قاۋىمداستىعىنىڭ ۆيتسە-پرەزيدەنتى ستەفان فوكس پەن مادەنيەت جانە سپورت ءمينيسترى اقتوتى رايىمقۇلوۆا سالتاناتتى تۇردە تاپسىرىپ،  ەل سپورتىن وركەندەتۋ جولىندا ايانباي تەر توگە بەرۋىنە تىلەكتەستىگىن ءبىلدىردى.

قۋان رازاق،

فوتو: دانيار مايلىباەۆ،

نۇر-سۇلتان قالاسى