جاقسى  كىتاپ  – جان ازىعى

قازىر قازاقستان عانا ەمەس، دۇنيەجۇزى ۇرەي مەن ءۇمىتتىڭ ورتاسىندا. ۇنەمى قورقىنىش پەن ۋايىم ادامنىڭ يممۋندىق جۇيەسىن السىرەتەدى. ءوزىڭىز جانە تۋعان-تۋىستتارىڭىز ۇنەمى قورقىنىش سەزىمىندە بولماۋى ءۇشىن جاعىمسىز اقپاراتتار اعىنىن بارىنشا شەكتەۋ قاجەت.

سەبەبى، ادامنىڭ ىشكى قۇرىلىسىندا كەزىگەتىن اۋرۋلار پسيحولوگيامەن تىكەلەي بايلانىستى. كوڭىل-كۇيدىڭ تۇسىڭكى بولۋى، ۇلكەن ميدىڭ شارشاۋى ءتۇرلى اۋرۋلاردىڭ باستى سەبەپكەرى. مەديتسينا ىلىمىندە ۇلكەن ميدىڭ جۇمىسى بۇكىل دەنە ورگانيزمدەرىنە تىكەلەي اسەر ەتەدى دەلىنگەن. نەگىزى ادامنىڭ ميى ۇزدىكسىز شىنىعۋ ارقىلى قۋاتتانىپ وتىراتىنى، قان تامىردىڭ، وكپە، جۇرەك جانە باسقا دا اعزالاردىڭ ساۋ بولۋى ءۇشىن دەنە شىنىقتىرۋ ماڭىزدى ورىندا تۇراتىنى بەلگىلى. الەمدىك تاجىريبە كوروناۆيرۋستىڭ تارالۋىنا قارسى كۇرەستىڭ ەڭ جاقسى ءادىسى كارانتين جانە قوزعالىستى بارىنشا شەكتەۋ ەكەنىن كورسەتىپ وتىر.

كارانتين كەزىندە ۇيدە «قامالىپ» وتىرۋ كەي ادامداردى كۇيزەلىسكە شالدىقتىرعانىن الۋمەتتىك جەلىلەردەن كوزىمىز شالىپ جاتادى. بۇل ۋاقىتشا كەزەڭدى كۇيزەلىسسىز وتكەرۋگە كومەكتەسەتىن پايدالى كەڭەستەر ۇسىنىپ جاتقاندارى دا بار. سونىڭ ءبىرى – كارانتين كەزىندە ۋاقىتتى كىتاپ وقۋعا ارناپ، ءبىر-بىرىنە چەلەندج جولداعان حالىقتىڭ يگى باستاماسىن ەل پرەزيدەنتى جوعارى باعالاپ، ءوزى دە بىرنەشە كىتاپتى اقتارىپ شىعۋعا باس قويعانىن ءباسپاسوز بەتتەرى مەن الەۋمەتتىك جەلى جارىسا جازدى.

–شىن مانىندە، كىتاپ وقۋ – رۋحاني كەمەلدەنۋدىڭ كوزى دەسەم ارتىق ەمەس. قازىرگى ۋاقىت – سەكۋند سايىن جاڭارعان اقپارات زامانى. جالعان دەرەكتىڭ، شىندىققا جاناسپايتىن قاۋەسەتتەردىڭ دە تەز تاراپ جاتقانىن كورىپ وتىرمىز. سوندىقتان مۇنداي جاعدايعا مەيلىنشە جول بەرمەۋ ءۇشىن التىن ۋاقىتىمىزدى وسىنداي پايدالى ىستەرگە جۇمساعانىمىز ءجون، – دەپ مەملەكەت باسشىسى قاسى-جومارت توقاەۆ كوروناۆيرۋس پەن داعدارىسقا قاتىستى نەگىزسىز اقپاراتتاردىڭ جەتەگىندە كەتپەي، ءبىلىمنىڭ سەنىمدى كوزى – كىتاپقا كوڭىل بولۋگە شاقىردى.

عالىمدار كۇيزەلىسپەن كۇرەستە اۋەن تىڭداۋ، بەينە ويىندار ويناۋ، شاي، كوفە ءىشۋ وڭ اسەر بەرەتىنىن، الايدا بۇل ادىستەردىڭ كىتاپ وقىعانعا قاراعاندا اسەرى ءالسىز ەكەندىگىن انىقتاعان. ياعني، كىتاپ وقۋ – رۋحاني جەتىلۋگە عانا ەمەس، ءتان ساۋلىعىنا دا كەرەمەت پايدالى ەكەندىگىن دالەلدەپ وتىر. كىتاپ وقۋ سترەسس پەن كوڭىلسىزدىكتەن ارىلۋعا كومەكتەسەدى. ءاربىر دانا كىتاپتا 100 ميلليوننان ارتىق اقپارات بولادى. كىتاپ وقۋ كەزىندە مي وسى اقپاراتتاردى ەستە ساقتاۋمەن قاتار، زەيىن قۋاتىن دا كۇشەيتەدى، سونىمەن قاتار، قاتەرلى دەرتتەرگە قارسى اعزانىڭ قۋاتىن ارتتىرا الادى. عالىمدار جۇرگىزگەن تاجىريبەگە ءوز ەركىمەن قاتىسقان ادامدار كۇنىنە كىتاپتىڭ ەكى بەتىن وقىپ وتىرعاننىڭ وزىندە قاتىسۋشىلاردىڭ قان قىسىمى قالىپقا كەلىپ، بۇلشىق ەتتەرى بوساڭسىپ، باسقا دا وڭ وزگەرىستەر بايقالعانىن، كىتاپ وقىعان كەزدە كۇيزەلىستى جىلدام ءارى ءتيىمدى ەڭسەرەتىنىن انىقتاعان. كىتاپ وقۋدىڭ تاعى ءبىر ەرەكشەلىگى – ۇزاق ءومىر ءسۇرۋدىڭ كەپىلى ەكەن. جاپونيا مەديتسيناسى وسىلاي قورىتىندى شىعارىپ وتىر. ولاردىڭ ايتۋىنشا، ەڭ ۇزاق ءومىر سۇرەتىندەر – فيلوسوفتار، ودان كەيىنگىسى عالىمدار مەن كوركەمونەرشىلەر ەكەن. ولار «كىتاپ وقۋ – بارلىق دەنە مۇشەسىنە اسەر ەتەتىن ۇلكەن ميدى ۇزدىكسىز قوزعالىسقا سالادى. كىتاپ وقىپ بولعان سوڭ دا ونىڭ ادامعا سىيلايتىن اسەرى دەنە شىنىقتىرۋدان كەيىنگى ماسساج سەكىلدى ادامدى رۋحاني قالىپقا ءتۇسىرىپ وتىرادى»، دەيدى.

قازاقستان رەسپۋبليكاسىنىڭ ۇلتتىق كىتاپحاناسى – ەلىمىزدەگى تاريحى تەرەڭنەن باستاۋ الاتىن، ادامزات تاريحىنىڭ كەرۋەنىن سۇرىندىرمەي اكەلە جاتقان، شىراعى بيىك، پاراساتتىلىق پەن بىلىمدىلىكتىڭ كيەلى ورداسى. قاي كەز بولماسىن ۇلتتىق كىتاپحانا اقپارات جانە ءبىلىم ورتالىعى رەتىندە قوعام مەن مەملەكەتتىڭ دامىپ-وركەندەۋىنە ۇلەس قوسىپ كەلەدى. بارلىق ءبىلىم سالالارى بويىنشا قورى باي. وسى كىتاپحانادا 2001 جىلدىڭ ساۋىرىنەن قۇجاتتاردى ەلەكتروندى جەتكىزۋ ( قەج) قىزمەتى ءوز جۇمىسىن باستاعان. قىزمەت ۇلتتىق كىتاپحانا قورىنداعى قۇجاتتاردىڭ ەلەكتروندىق كوشىرمەلەرىنە تاپسىرس بەرۋ مۇمكىندىگىن ۇسىنادى. تاپسىرىسىڭىزدى edd@nlrk.kz ەلەكتروندىق پوشتاسى ارقىلى جولداي الاسىز. ۇلتتىق كىتاپحانا قورىنان الىنعان ەلەكتروندىق كوشىرمەلەردى عىلىمي جانە ءبىلىم بەرۋ ماقساتتارىندا عانا پايدالانۋعا رۇقسات ەتىلەدى. كوشىرمەلەردى جەكە ماقساتقا پايدالانۋعا جانە ءۇشىنشى ادامعا بەرۋگە تىيىم سالىنادى.

بۇگىنگى كۇنى ادام جۇيكەسىنە كەرى اسەر ەتەتىن جاعدايلاردىڭ ورىن الىپ وتىرعاندىقتان دەنساۋلىقتى ساقتاۋدى الدىن الاتىن ادىستەردىڭ ىشىندە كىتاپ وقۋ ەڭ ءونىمدى ءتاسىل بولىپ وتىر. كارانتين ۋاقىتى – كىتاپ وقۋعا تاپتىرماس مۇمكىندىك. وسىعان دەيىن ويدا جۇرگەن كىتاپتاردى وقىپ، جاڭا اۆتورلارمەن نەگە تانىسپاسقا؟! جاقسى كىتاپ دەنساۋلىعىڭىزدى ساقتاۋعا سەپتىگىن تيگىزۋمەن قاتار، وقىرماننىڭ ۇشقىر قيالىنا قانات ءبىتىرىپ، كاسىپتىك باعىت-باعدار جاعىنان جەتىلۋىنە، ىلگەرى ورلەۋىنە باستاۋشى بولارى ءسوزسىز. سونىمەن كەلتىرىلگەن دالەلدەر ارقىلى سىزدەردى كىتاپتى ەڭ جاقىن دوسى ەتەدى دەپ ۇمىتتەنەمىن!

ءلاززات ابدراحمانوۆا،

قازاقستان رەسپۋبليكاسى ۇلتتىق كىتاپحاناسى

عىلىمي-ادىستەمەلىك قىزمەتىنىڭ مامانى

الماتى