Jetisýda jalyndy jastardyń jarysy jalaý kóterdi

Bir apta boıy Almaty oblysy, Ile aýdany  О́tegen batyr kentindegi záýlim sport saraıynda  qoldobynan  2008 jyly týǵan qyzdar arasynda Qazaqstan chempıonaty bolyp ótti.

Bul  jarysqa elimizdiń barlyq aımaǵynan 11 komanda qatysyp, baqtaryn synaǵan edi.  Fınaldyq synda Qyzylorda men Almaty oblysynyń komandalary kezdesti. Tartysty ótken oıynda eki jaq sheberlikterin aıanyp qalmady.  Degenmen ujymdyq oıyndy ádemi úılestire bilgen Syr óńiriniń qyzdary jeńisti julyp áketti. Al, júldeli úshinshi oryndy Aqtóbe oblysy Qandyaǵash aýdanynyń  komandasy ıelendi. Almaty oblysynyń quramasy áli de bolsa bir terisi alynbaǵan sáıgúlekteı  jeńiske sál jetpeı qaldy deýge bolady. Alaıda, qoldy tómen túsirmeıtin Jetisý óńiriniń jas quramasy jibergen qatelikterinen sabaq alyp, jattyǵýlaryn shyńdaı túsý kerek ekenin jaqsy túsinedi. Osyndaı elimizidń ár óńirinen úkilip qosylǵan komandalar arasynan top jaryp,  el chempıonatynda fınalǵa shyǵyp, óner kórsetýdiń ózi  úlken jetistik dep baǵalaǵan jón bolar.

Shyn máninde Almaty  men Qyzylorda komandalarynyń fınalda kezdesýi kezdeısoqtyq dep alyp qaraýǵa  bolmaıdy. О́ıtkeni, Qazaqstan boıynsha búgingi kúni osy eki oblysta ǵana qol doby joǵary qarqynmen damyp keledi. Mysaly, Almaty oblysy Deneshynyqtyrý jáne sport basqarmasynyń bastyǵy, áıgili balýan Nurbaqyt Teńizbaevtyń sporttyń qaı salasyna bolmasyn belsene aralasyp, qarjy kózin qıynnan bolsa da taýyp qoldaý jasap jatqandyǵynyń arqasynda qol doby  sporty eńsesin tiktep, tamasha kórsetkishterge qol jetkizip keledi. Iaǵnı, tógilgen ter, jasalǵan jaǵdaı óz jemisin berip otyr degen sóz. Sol sııaqty ár oblysta Olımpıada baǵdarlamasyna kirgen qol dobyndaı sporttyń bekzat túrine qoldaý barynsha jasalsa nur ústine nur bolar edi.

Jarys sońynda Qazaqstan chempıonatynda úzdik shyqqan úsh komanda oıynshylaryn О́tegen batyr kentindegi Gandbol men fýtzaldan balalar men jasóspirimder sport mektebiniń dırektory Darhan Áshirov saltanatty túrde  marapattap, jasóspirim oıynshylarǵa aman-esen úılerine jetýlerin tiledi. Iá, jeńiske jetken Syr óńiriniń  qyzdary qýanyshtan kóz jastaryn súrtip, jeńip alǵan bas kýboktaryn bastyryna kóterip qýanyp barady. Al, alaman el jarysynyń kúmisin jeńip alǵan Almaty oblysy men qola júldeger Aqtóbe oblysynyń komandalary aldaǵy jyly qalaıda jeńiske jetýdiń úshin endi jattyǵýda aıanyp qalamasy bek anyq. Jarys aıaqtalǵanda komandalar estelikke sýretke tústi.

Aqyn ORDABAIULY,

О́tegen batyr kenti,

Ile aýdany,

Almaty oblysy