كوڭىل كوڭىلدەن سۋ ىشەدى

ەڭ كونە دەنە شىنىقتىرۋ-سپورت قوعامى «مەكتەپكە جول» رەسپۋبليكالىق قايىرىمدىلىق اكتسياسىنا جىل سايىن بەلسەندى تۇردە قاتىسىپ كەلەدى.

بۇگىن اينالاعا ۇلگى بولاتىن ءىس-شارا «دينامو» دشسق قوعامدىق بىرلەستىگىنىڭ شاڭىراعىندا بولىپ، بالالار شاد-شادىمان كوڭىل-كۇيمەن مەكتەپتەرىنە اتتاندى.

بۇل جولى توتەنشە جاعدايلار مينيستىرلىگى قىزمەتكەرلەرىنىڭ وتباسىلارىنا ەرەكشە كوڭىل ءبولىندى. قوعامنىڭ الماتىداعى «دينامو» ستاديونىندا توتەنشە جاعدايلار مينيستىرلىگى قىزمەتكەرلەرىنىڭ از قامتىلعان جانە كوپبالالى وتباسىلارىنان شىققان ونداعان ءبىرىنشى سىنىپقا باراتىن ءبۇلدىرشىن وقۋشىلارعا سالتاناتتى جاعدايدا قوعام اپپاراتىنىڭ باسشىسى گۇلايىم ماحاتقىزى مەن تانىمال گيمناست ميلاد كاريمي مەكتەپكە قاجەتتى زاتتارعا تولى سومكەلەر تاراتىپ بەردى. سومكەلەردىڭ ىشىندە كەڭسە تاۋارلارى: قالامدار، داپتەرلەر، وقۋلىقتار، قارىنداشتار، سونداي-اق «دينامو» قوعامىنىڭ ايگىلى ەمبلەماسى بەينەلەنگەن سپورتتىق كوستيۋمدەر بولدى.

ءوز سوزىندە گۇلايىم ماحاتقىزى از قامتىلعان وتباسىلارعا، جەتىم بالالارعا، اتا-اناسىنىڭ قامقورلىعىنسىز قالعان نەمەسە ومىرلىك قيىن جاعدايعا تاپ بولعان بالالارعا كومەك كورسەتۋ دينامولىقتار ءۇشىن ۇلكەن مارتەبە ءارى ابىرويلى مىندەت ەكەنىن اتاپ ءوتتى.

«بۇل — بيىلعى جىلى وتكىزىلگەن العاشقى وسىنداي ءىس-شارا ەمەس. بۇگىنگى اكتسيا «دينامو» قوعامى مەن كۇشتىك قۇرىلىمدار اراسىنداعى ەرەكشە بايلانىستىڭ جانە ءوزارا قولداۋدىڭ تاعى ءبىر ايقىن دالەلى بولدى»، دەدى ول.

بالالاردىڭ قۋانىشتارىنا اتا-انالارى دا قۋانىپ قالدى.

راسىمەندە جاعدايى ناشار وتباسىلار بالالارىن مەكتەپكە دايىنداۋدا قارجىلاي قيىندىقتارعا كەزدەسەدى. ءبىر بالانى تولىقتاي كيىم-كەشەك، وقۋ قۇرالدارىمەن مەكتەپكە ازىرلەگەندە 200 مىڭعا تاياۋ تەڭگە كەتەدى ەكەن. وسىنداي قيىندىقتارعا ۇرىنعان وتباسىلاردىڭ جاعدايىن جەڭىلدەتكەن توتەنشە جاعدايلار مينيستىرلىگى قىزمەتكەرلەرى مەن «دينامو» قوعامىنىڭ قولداۋ كورسەتكەن ساۋاپتى ىستەرىنە العىستان باسقا ايتار جوق. بالا ءبىزدىڭ بولاشاعىمىز. ەندەشە، زايىرلى ەلدىڭ سانالى ۇرپاعى ءوسسىن دەسەك، بالانىڭ بىلىمىنە قامقور جاساۋ ماڭىزدى ماسەلە.

اقىن ورداباي ۇلى،

الماتى