شىمكەنتتە جاڭا كۇرەس زالى اشىلدى

جاڭا وقۋ جىلىندا شىمكەنت قالاسىنداعى №149 «كەلەشەك» مەكتەبىندە وقۋشىلارعا ارنالعان جاڭا كۇرەس زالى اشىلدى.

قازاقستان كۇرەس فەدەراتسياسى ءباسپاسوز قىزمەتىءنىڭ مالىمەتىنە قاراعاندا، بۇل فەدەراتسيانىڭ «مەكتەپ كۇرەس ليگاسى» جوباسى اياسىندا وڭىرلەردە اتقارىپ جاتقان جۇمىسىنىڭ جالعاسى.

سالتاناتتى ءىس-شاراعا قازاقستان كۇرەس فەدەراتسياسىنىڭ ءبىرىنشى ورىنباسارى دارحان سارسەنوۆ، شىمكەنت قالاسىنىڭ سپورت جانە ءبىلىم باسقارمالارىنىڭ وكىلدەرى، سپورت جاناشىرلارى، فەدەراتسيا مۇشەلەرى مەن جاتتىقتىرۋشىلار قاتىستى.

ءىس-شارادا ءسوز العان دارحان سارسەنوۆ مەكتەپ ۇجىمىن جانە وقۋشىلاردى جاڭا وقۋ جىلىنىڭ باستالۋىمەن قۇتتىقتاپ، قازاقستان كۇرەس فەدەراتسياسىنىڭ توراعاسى ەركىن وقاسوۆتىڭ قۇتتىقتاۋىن جەتكىزدى. سونداي-اق فەدەراتسيا اتىنان مەكتەپ باسشىلىعىنا جاڭا كۇرەس كىلەمىنىڭ سەرتيفيكاتىن تابىس ەتتى.

جاڭا زالدىڭ اشىلۋى №149 «كەلەشەك» مەكتەبىنىڭ وقۋشىلارىنا ساباقتان تىس ۋاقىتتا ءوز مەكتەبىندە كۇرەسپەن تۇراقتى اينالىسۋعا مۇمكىندىك بەرەدى. بالالارعا سپورت سەكتسياسىنا بارۋ ءۇشىن باسقا اۋدانعا نەمەسە ارنايى سپورت مەكتەبىنە قاتىناۋدىڭ قاجەتى بولمايدى. ال جاتتىقتىرۋشىلار ءۇشىن بۇل مەكتەپ قابىرعاسىنان كۇرەسكە بەيىمى بار بالالاردى انىقتاپ، ولاردى جۇيەلى دايىندىققا تارتۋعا جول اشادى.

«مەكتەپ كۇرەس ليگاسىنىڭ» تۇپكى ماقساتى دا وسى، كۇرەستى بالالارعا بارىنشا قولجەتىمدى ەتۋ جانە سپورتتى مەكتەپ ءومىرىنىڭ ءبىر بولىگىنە اينالدىرۋ. جوبا جاسوسپىرىمدەردى تۇراقتى دەنە بەلسەندىلىگىنە تارتۋمەن قاتار، قابىلەتتى بالۋانداردى ەرتە انىقتاپ، ولاردىڭ كەيىنگى سپورتتىق دامۋىنا باستاپقى نەگىز قالىپتاستىرۋدى كوزدەيدى.

اتاپ ايتقاندا، ماۋسىم ايىندا استانا قالاسىنداعى №114 مەكتەپ-گيمنازياسىندا تۋريزم جانە سپورت مينيسترلىگى، وقۋ-اعارتۋ مينيسترلىگى جانە قازاقستان كۇرەس فەدەراتسياسى اراسىندا مەكتەپتەردە گرەك-ريم، ەركىن جانە ايەلدەر كۇرەسىن دامىتۋعا باعىتتالعان بىرلەسكەن جۇمىس باستالعان بولاتىن.

وسى باعىتتاعى جۇمىس بۇگىندە بىرنەشە وڭىردە جالعاسىپ كەلەدى. بۇعان دەيىن استانا، شىمكەنت جانە قاراعاندى قالالارىنداعى مەكتەپتەردە كۇرەس زالدارى اشىلسا، تامىز ايىنىڭ سوڭىندا كوكشەتاۋداعى تەحنيكالىق مەكتەپ-ليتسەيىندە دە جاڭا زال پايدالانۋعا بەرىلدى. كەيىن قاراعاندىدا باۋىرجان مومىش ۇلى اتىنداعى مەكتەپتە دە «مەكتەپ كۇرەس ليگاسى» جوباسى اياسىندا جابدىقتالعان زال جۇمىسىن باستادى»، دەلىنگەن حابارلامادا.

فەدەراتسيانىڭ حابارلاۋىنشا، ماڭىزدى جوبانىڭ بولاشاقتاعى مىندەتتەرىنىڭ ءبىرى – مەكتەپتەردىڭ جەكە كۇرەس كوماندالارىن قالىپتاستىرىپ، بالالاردى ماۋسىم بويى تۇراقتى جارىس تاجىريبەسىمەن قامتاماسىز ەتۋ.

جالپى، «مەكتەپ كۇرەس ليگاسى» اياسىندا رەسپۋبليكا بويىنشا 60-تان استام مەكتەپتى ءموبيلدى جانە ستاتسيونارلىق كۇرەس كىلەمدەرىمەن جابدىقتاۋ جوسپارلانعان. سونىڭ ناتيجەسىندە 3،5 مىڭنان استام وقۋشىنىڭ گرەك-ريم، ەركىن جانە ايەلدەر كۇرەسىمەن تۇراقتى اينالىسۋىنا جاعداي جاسالماق.

№149 «كەلەشەك» مەكتەبىندەگى جاڭا كۇرەس زالى وسى اۋقىمدى جۇمىستىڭ شىمكەنتتەگى كەزەكتى نىسانى. جاڭا وقۋ جىلىن جاڭا سپورتتىق مۇمكىندىكپەن باستاعان مەكتەپ وقۋشىلارى ەندى العاشقى جاتتىعۋىن ءوز مەكتەبىندە وتكىزىپ، كۇرەستەگى جولىن وسى جەردەن باستاي الادى.