SportPress.kz قازاقستان سپورت جاڭالىقتارى
قىرعىز رەسپۋبليكاسى پرەزيدەنتىنىڭ ءباسپاسوز حاتشىسى اسقات الاگوزوۆ بۇعان دەيىن «بىشكەك-ارەنا» ستاديونىنا قاتىستى جاريالاعان قىسقاشا اقپاراتىن تولىقتىرىپ، سپورت ارەناسىنىڭ قۇرىلىسىنا 386 ملن دوللار جۇمسالعانىن ايتتى.
«وسى كەزگە دەيىن «بىشكەك-ارەنا» ستاديونىنا قاتىستى تولىق اقپارات الا المادىق. ونىڭ سەبەبى، وسى جوباعا قاتىسى بار بارلىق ادامدار شىۇ ءسامميتى مەن دۇنيەجۇزىلىك كوشپەلىلەر ويىندارىنا دايىندىق جۇمىستارىمەن اينالىسىپ، تاۋلىك بويى جۇمىس ىستەدى.
ەندى مىنە، ستاديونعا قاتىستى تولىق مالىمەت بەرۋگە بولادى. سوندىقتان ونى حالىققا جاريالاۋدى ءجون ساناپ وتىرمىن،» دەدى ول.
ونىڭ ايتۋىنشا، «بىشكەك-ارەنا» ستاديونىنىڭ قۇرىلىسىنا 386 ملن اقش دوللارى جۇمسالدى. ونى «60 ملن دوللارعا» سالدى دەگەن اقپارات – جالعان.
ستاديون قۇرىلىسى باستالعان كەزدە نىسان باستاپقىدا 30-35 مىڭ كورەرمەنگە ەسەپتەلگەن ەدى. سول كەزدە قامشىبەك تاشيەۆ ونىڭ شامامەن 60 ملن دوللارعا تۇسەتىنىن ايتقان. الايدا العاشقى كەزدە دولون ومىرزاقوۆ اتىنداعى ستاديونعا ۇقساس سپورت ارەناسىن سالۋ تۋرالى وي بولعان.
«كەيىن پرەزيدەنت سادىر جاپاروۆ باستاپقى جوبانى تولىعىمەن وزگەرتىپ، ستاديوندى قىرعىزدىڭ كيىز ءۇيى فورماسىندا سالىنسىن دەگەن تاپسىرما بەردى. «ونىڭ ىشىندە ساۋدا ورتالىقتارى، مەيرامحانالار مەن ءدامحانالار، سۋپەرماركەت، كينوتەاترلار، سپورت زالدارى مەن بالالارعا ارنالعان الاڭدار بولسىن. ايتپەسە، ستاديوندى ۇستاپ وتىرۋدىڭ ءوزى بيۋدجەتكە اۋىر سالماق تۇسىرەدى. بولاشاقتا ستاديون تابىس اكەلەتىن نىسانعا اينالۋى كەرەك»، دەدى ول.
ناتيجەسىندە جوبا تولىعىمەن قايتا ازىرلەنىپ، قۇرىلىستىڭ جالپى اۋماعى 194 248 م² بولدى. ستاديوننىڭ ءبىر شارشى مەترى 2 000 اقش دوللارىنان 15 000 اقش دوللارىنا دەيىن وزگەرۋى مۇمكىن.
سوندىقتان قامشىبەك تاشيەۆ ستاديوننىڭ 30-35 مىڭ ادامعا ارنالىپ، ونىڭ باعاسى شامامەن 60-70 ملن دوللارعا باراتىنىن ايتقاندا وسىنى مەڭزەگەن بولۋ كەرەك. ەگەر ستاديون دولون ومىرزاقوۆ اتىنداعى ستاديون سياقتى كادىمگى سپورت ارەناسى رەتىندە سالىنعاندا، ول ءوزىن-ءوزى اقتاپ قانا قويماي، ونى كۇتىپ ۇستاۋعا جانە قىزمەتكەرلەردىڭ جالاقىسىن تولەۋگە جىل سايىن بيۋدجەتتەن ميللياردتاعان سوم قاراجات تالاپ ەتەر ەدى.
سوندىقتان جوبا كەڭەيتىلىپ، «بىشكەك-ارەنا» سىيىمدىلىعى 52 مىڭ كورەرمەنگە ارنالىپ، مەن جاڭا ايتقان ينفراقۇرىلىمنىڭ ءبارى سالىندى»، دەدى ول.
وسى رەتتە ول جوبانى كەڭەيتۋدىڭ تاعى ءبىر سەبەبى، فيفا-نىڭ، ياعني حالىقارالىق فۋتبول فەدەراتسياسىنىڭ تالابى بولعانىن ەسكەرتتى.
«الەمدىك دەڭگەيدەگى حالىقارالىق جارىستاردى وتكىزۋ ءۇشىن ستاديون كەمىندە 50 مىڭ كورەرمەنگە ارنالعان بولۋى كەرەك ەكەن»، دەدى اسقات الاگوزوۆ.
وسىدان كەيىن ول «بىشكەك-ارەنا» ستاديونىنىڭ نەگىزگى سيپاتتامالارى تۋرالى كەڭىرەك مالىمەت بەردى.
ولار مىنالار:
جەر ۋچاسكەسىنىڭ اۋماعى – شامامەن 20 گا (200 000 م²).
قۇرىلىستىڭ جالپى اۋماعى – 194 248 م².
نىساننىڭ ديامەترى – 280 م.
بيىكتىگى – 70 م.
قابات سانى – 8 قابات.
كورەرمەندەرگە ارنالعان ورىن سانى – 51 252.
سمەتالىق قۇنى – 386 ملن اقش دوللارى.
ساۋدا جانە كوممەرتسيالىق ينفراقۇرىلىم:
ساۋدا ورتالىعىنىڭ جالپى اۋماعى – 35 916 م².
ستاديوندا 48 دۇكەن، 1 سۋپەرماركەت، 18 ساۋدا دۇڭگىرشەگى، 23 مەيرامحانا، 11 ءدامحانا، 4 كينو زالى، بالالارعا ارنالعان ويىن الاڭى، سپورت زالى. جالپى اۋماعى 5 087 م² بولاتىن تەرراسالار بار.
«وسىلايشا، «بىشكەك-ارەنا» قۇرىلىسىنىڭ جالپى قۇنى 386 ملن اقش دوللارى بولدى. الايدا «بىشكەك-ارەنا» بۇل سومانى سالىستىرمالى تۇردە از ۋاقىتتا وتەپ قانا قويماي، ءارى قاراي تابىس اكەلەتىن بولادى.
قازىردىڭ وزىندە اقىلى ءىس-شارالار مەن كونتسەرتتەر وتكىزۋگە وتىنىمدەر تۇسە باستادى»، دەدى پرەزيدەنتتىڭ ءباسپاسوز حاتشىسى.
ودان ءارى ول سالىستىرمالى تۇردە باسقا ەلدەردەگى ستاديونداردىڭ قانداي سوماعا سالىنعانىن دا ايتتى. ونىڭ ايتۋىنشا، اقش-تاعى 65 000 ورىنعا ارنالعان Allegiant Stadium ستاديونى 1،9 ملرد دوللارعا سالىنعان. بۇل جەردە VIP پەن كوممەرتسيالىق ورىندار بار.
«وكىنىشكە قاراي، سوڭعى كۇندەرى «ءبىزدىڭ ستاديون 60 ملن دوللارعا سالىندى. ال كورشى ەلدەردەگى ستاديوندار وسىنداي سوماعا سالىندى» دەگەن پىكىرلەر ايتىلا باستادى. بۇل كورشى مەملەكەتتەردىڭ باسشىلارىنىڭ بەدەلىنە نۇقسان كەلتىرەدى. سوندىقتان، قۇرمەتتى وتانداستار، بۇل ماسەلەنى ساياسيلاندىرماي، كورشى مەملەكەتتەرمەن قارىم-قاتىناستى ۋشىقتىرمايىق»، دەدى ول.
وسى ورايدا اسقات الاگوزوۆ بۇگىندە بۇكىل الەمدە ستاديون قۇرىلىسىنىڭ قۇنى ماتەريالدىڭ قىمباتتاۋىنا بايلانىستى ءوسىپ جاتقانىن تىلگە تيەك ەتتى.
«مىسالى، مەتالدىڭ قىمباتتاۋى، بەتون باعاسىنىڭ ءوسۋى، لوگيستيكالىق شىعىندار، جۇمىس كۇشىنە تولەنەتىن اقشا، ينجەنەرلىك جۇيەلەردى، VIP جانە كوممەرتسيالىق ايماقتاردى سالۋ، ينفلياتسيا، دۇنيەجۇزى بويىنشا قۇرىلىس ماتەريالدارىنىڭ تاپشىلىعى، وسىنىڭ ءبارى قۇرىلىستىڭ باعاسىنا اسەر ەتەدى»، دەدى قىرعىزستان باسشىسىنىڭ ءباسپاسوز حاتشىسى.
ول پرەزيدەنت سادىر جاپاروۆتىڭ ەسەپ پالاتاسى مەن باسقا دا ءتيىستى ورگانداردىڭ وكىلدەرىنە كوميسسيا قۇرىپ، ستاديوننىڭ قۇرىلىسىن جان-جاقتى تەكسەرۋ تاپسىرعانىن ايتتى.
«كوميسسيا قۇرىلىس ماتەريالدارىنىڭ تولىق پايدالانىلعانىن، جۇمىسشىلارعا جالاقىنىڭ تولىق تولەنگەنىن، قاراجاتتىڭ ۇرلانباعانىن تەكسەرەدى.
تەكسەرۋ قورىتىندىسى بويىنشا ناتيجەلەر بۇكىل حالىققا جاريالانادى»، دەدى ول ءسوز سوڭىندا.
بۇعان دەيىن ول VI دۇنيەجۇزىلىك كوشپەلىلەر ويىندارىنىڭ قورىتىندىسىنداعى مەدال ەسەبىنە قاتىستى پىكىر بىلدىرگەن ەدى.
داستان كەنجالين،
استانا
