لۋيش ناني كوپبالالى وتباسىعا پاتەر سىيلادى

فۋتبولدان «اقتوبە» كلۋبىنىڭ جارتىلاي قورعاۋشىسى لۋيش ناني «حارەكەت» قوعامدىق قايىرىمدىلىق قورىنىڭ الەۋەمەتتىك جوباسىنىڭ اياسىندا قايىرىمدىلىق اكتسياسىنا قاتىسىپ، كوپبالالى وتباسىعا جاڭا پاتەر سىيلادى. ول پاتەردىڭ كىلتىن ورتالىق ستاديوندا تابىس ەتتى.

بۇعان دەيىن پورتۋگاليالىق فۋتبولشى جالدامالى پاتەردە تۇرىپ كەلگەن اتا-انامەن جانە ولاردىڭ التى بالاسىمەن كەزدەسكەن ەدى. سول كەزدەسۋدە بەلگىلى بولعانداي، وتاعاسى وتباسىن اسىراۋ ءۇشىن دەمالىسسىز ەڭبەك ەتسە، اناسى دەنساۋلىعىنا بايلانىستى اۋىر جۇمىس ىستەي الماعان.

ستاديوندا ناني بالالارمەن ەستەلىككە سۋرەتكە ءتۇسىپ، ءوزىنىڭ قولتاڭباسى قويىلعان كلۋبتىڭ جەيدەسىن سىيعا تارتىپ،  جاڭا ءۇيدىڭ كىلتىن تاپسىردى.

 «قازىر مەن سىزدەردى جاقسى ءتۇسىنىپ تۇرمىن. ويتكەنى، ادامنىڭ ءومىرى ءۇشىن باسپانالى بولۋدىڭ قانشالىقتى ماڭىزدى ەكەنىن جاقسى تۇسىنەمىن.

مەن دە بالا كەزىمدە جاقسى تۇردىم دەپ ايتا المايمىن. ءومىردىڭ كوپ قيىندىعىن كورىپ ءوستىم. ءبىزدىڭ وتباسىمىز ۇلكەن ەدى.  بىز باۋىرلارىمەن  شاعىن عانا الاقانداي ءبىر ۇيدە تۇردىق. جاڭا باسپاناعا كوشەر كەزدە مەن دە سىزدەر سياقتى تولقىپ، سىزدەر سەزىنىپ وتىرعانداي كۇي كەشكەن ەدىم. سوندىقتان  سىزدەر ءۇشىن قۋانىشتىمىن. سىزدەرگە بار جاقسىلىقتى، مىقتى دەنساۋلىق تىلەيمىن»، دەدى ناني.

وسىلايشا ناني جومارت ءىس ىستەدى. ول بيىلعى جىلدىڭ 25 قاڭتارىندا رەسمي تۇردە «اقتوبە» ساپىنا قوسىلدى. بيىلعى ماۋسىمدا پورتۋگاليالىق فۋتبولشى اقتوبەنىڭ كلۋبى قۇرامىندا 20 رەت الاڭعا شىعىپ، ءۇش گول سوقتى. گولعا اپارعان ءتورت پاس بەردى.

لۋيش ناني بۇرىن انگليانىڭ «مانچەستەر يۋنايتەد» كلۋبى مەن پورتۋگاليا ۇلتتىق قۇراما كومانداسىندا وينادى.

«حارەكەت» قوعامدىق قايىرىمدىلىق قورى ەلىمىزدە «1000 تەڭگەگە باسپانا» ۇرانىمەن جۇمىس ىستەيدى. قور  تۇرمىسى ناشار، از قامتىلعان، باسپاناعا اسا مۇقتاج وتباسىلارعا جەكە ءۇي الۋلارىنا كومەكتەسەدى.

داستان كەنجالين،

استانا