Lýısh Nanı kópbalaly otbasyǵa páter syılady

Fýtboldan «Aqtóbe» klýbynyń jartylaı qorǵaýshysy Lýısh Nanı «Hareket» qoǵamdyq qaıyrymdylyq qorynyń áleýemettik jobasynyń aıasynda qaıyrymdylyq akııasyna qatysyp, kópbalaly otbasyǵa jańa páter syılady. Ol páterdiń kiltin Ortalyq stadıonda tabys etti.

Buǵan deıin portýgalııalyq fýtbolshy jaldamaly páterde turyp kelgen ata-anamen jáne olardyń alty balasymen kezdesken edi. Sol kezdesýde belgili bolǵandaı, otaǵasy otbasyn asyraý úshin demalyssyz eńbek etse, anasy densaýlyǵyna baılanysty aýyr jumys isteı almaǵan.

Stadıonda Nanı balalarmen estelikke sýretke túsip, óziniń qoltańbasy qoıylǵan klýbtyń jeıdesin syıǵa tartyp,  jańa úıdiń kiltin tapsyrdy.

 «Qazir men sizderdi jaqsy túsinip turmyn. О́ıtkeni, adamnyń ómiri úshin baspanaly bolýdyń qanshalyqty mańyzdy ekenin jaqsy túsinemin.

Men de bala kezimde jaqsy turdym dep aıta almaımyn. О́mirdiń kóp qıyndyǵyn kórip óstim. Bizdiń otbasymyz úlken edi.  Biz baýyrlarymen  shaǵyn ǵana alaqandaı bir úıde turdyq. Jańa baspanaǵa kósher kezde men de sizder sııaqty tolqyp, sizder sezinip otyrǵandaı kúı keshken edim. Sondyqtan  sizder úshin qýanyshtymyn. Sizderge bar jaqsylyqty, myqty densaýlyq tileımin», dedi Nanı.

Osylaısha Nanı jomart is istedi. Ol bıylǵy jyldyń 25 qańtarynda resmı túrde «Aqtóbe» sapyna qosyldy. Bıylǵy maýsymda portýgalııalyq fýtbolshy Aqtóbeniń klýby quramynda 20 ret alańǵa shyǵyp, úsh gol soqty. Golǵa aparǵan tórt pas berdi.

Lýısh Nanı buryn Anglııanyń «Manchester ıýnaıted» klýby men Portýgalııa ulttyq qurama komandasynda oınady.

«Hareket» qoǵamdyq qaıyrymdylyq qory elimizde «1000 teńgege baspana» uranymen jumys isteıdi. Qor  turmysy nashar, az qamtylǵan, baspanaǵa asa muqtaj otbasylarǵa jeke úı alýlaryna kómektesedi.

Dastan KENJALIN,

ASTANA