ەلىمىزدە فۋتبولدان العاش رەت ايەلدەر ليگاسى باستالادى

بيىل ەلىمىزدە فۋتبولدان العاش رەت ايەلدەر ليگاسى باستالادى.

جاقىندا Qazaqstan Football League-سىنىڭ ۇيىمداستىرۋىمەن  QFL ايەلدەر ليگاسى مەن QFL ايەلدەر كۋبوگى ءتۋرنيرىنىڭ جالاۋى كوتەرىلەدى، دەپ حابارلادى Qazaqstan Football League.

جارىسقا ەلىمىزدىڭ ءتورت وڭىرىنەن «بيىك-شىمكەنت»، «ورداباسى»، «اقتوبە»، «وقجەتپەس»، «توميريس-تۇران» كلۋبتارى قاتىسادى. فۋتبول دوداسىنىڭ جەرەبە تارتۋ ءراسىمى بۇگىن، 2 ساۋىردە، استانا قالاسىندا تۇسكى 15:00-دە (تىكەلەي ەفيردى QFL.KZ سايتى، QFL TV YouTube ارناسى جانە Q Football تەلەارناسىنان كورە الاسىزدار) بولادى.

كەيىنگى جىلدارى الەمدە ايەلدەر فۋتبولىنىڭ دامۋىنا ەرەكشە نازار اۋدارىلىپ كەلەدى. ەۋروپانىڭ وزىندە ايەلدەر فۋتبولىن 144 ملن جانكۇيەر تاماشالاسا، 2033 جىلى ولاردىڭ سانى 328 ملن-عا دەيىن كوبەيەدى دەپ جوسپارلانعان. QFL ءۇشىن وسىنداي دەڭگەيدەگى ءتۋرنيردى ۇيىمداستىرۋ وسى سالانىڭ دامۋى ءۇشىن ماڭىزدى ەلەمەنت رەتىندە سانالادى. سەبەبى، بۇگىندە حالىقارالىق فەدەراتسيالاردا بىردە-ءبىر كوممەرتسيالىق نەمەسە فۋتبول ناۋقانىن ايەلدەر فۋتبولىنسىز ەلەستەتۋ مۇمكىن ەمەس.

QFL ايەلدەر كۋبوگىنىڭ ءبىرىنشى جارىسى 1-9 مامىر ارالىعىندا شىمكەنت قالاسىنداعى «بيىك» سپورت كەشەنىندە وتەدى. تۋرنير اينالىمدىق جۇيەدە ۇيىمداستىرىلىپ، ءار كوماندا 4 ماتچتان وينايدى. كەزدەسۋدە تەڭ ەسەپ قاراستىرىلماعان. ەگەر ويىننىڭ نەگىزگى ۋاقىتىندا ەسەپ تەڭ بولسا، جەڭىمپاز بىردەن پەنالتي سەرياسىندا انىقتالادى. سونداي-اق، ۇپاي 4 دەڭگەي بويىنشا بەرىلەدى. نەگىزگى ۋاقىتتاعى جەڭىمپازعا  3 ۇپاي، پەنالتيدەن جەڭگەن كومانلاعا 2 ۇپاي، پەنالتيدە ەسە جىبەرگەن كلۋبقا 1 ۇپاي بەرىلەدى. نەگىزگى ۋاقىتتا جول بەرگەن كوماندا ۇپايسىز قالادى، — دەلىنگەن حابارلامادا.

ال QFL ايەلدەر ليگاسى 17 مامىر — 30 قازان ارالىعىنا جوسپارلانعان. ليگا 4 اينالىم بويىنشا شىمكەنت، تۇركىستان، اقتوبە جانە كوكشەتاۋ قالالارىندا وتەدى.

تۋرنيرلەردىڭ بارلىق ويىندارىن Q Football، Q Arena، Q League تەلەارنالارى مەن QFL.KZ سايتى تىكەلەي ەفيردە كورسەتەدى.