الەكساندر كاساچەۆ «جەتىسۋ ءبورىسى» اتاندى

تالدىقورعاندا «جەتىسۋ ءبورىسى» ءتۋرنيرى ءوتتى. ءدۇبىرلى دودادا الەكساندر كاساچەۆ باس جۇلدەنى جەڭىپ الدى. جەڭىمپازعا سۋ جاڭا «لادا گرانتا» اۆتوكولىگى سىيعا تارتىلدى، دەپ حابارلايدى قازاقپارات ءتىلشىسى. سايىسقا 38 ساڭلاق قاتىستى. ولار وسىعان دەيىن الماتى وبلىسىنىڭ اۋدان-قالالارىنداعى ىرىكتەۋ تۋرنيرلەرىندە توپ جارعان جانە ەكىنشى ورىن يەلەنگەن بالۋاندار. اقتىق سىندا جولىنداعىلاردى جاپىرا جەڭگەن، تالدىقورعان اتىنان كىلەمگە شىعىپ وتىرعان بالۋاندار — ۇلان رىسقۇل پەن الەكساندر كاساچەۆ كەزدەستى. ۇلان — 1986 جىلى تۋعان، بويى 186 سم، سالماعى 135 كەلى. الەكساندر — 1987 جىلى تۋعان، بويى 175 سم، سالماعى 105 كەلى. كەزدەسۋ تارتىستى بولعانىنا «جاستار» سارايىنا جينالعاندار كۋا. ءاپ دەگەننەن، ەسەپتى الەكساندر اشتى. بۇك ۇپايىن قانجىعاسىنا بايلاپ، جارتىلاي جەڭىسكە دە جەتتى. ۇلان دا قاراپ قالمادى. 2 رەت بۇك ۇپايىن يەلەندى. دەگەنمەن، ءادىس جاساپ، ۇلاندى جامباسقا اتىپ جىبەرگەن الەكساندر كاساچەۆ تازا جەڭدى. وسىلايشا، الەكساندر كاساچەۆ — «جەتىسۋ ءبورىسى» اتاندى. ۇلان رىسقۇل ەكىنشى ورىندى يەلەندى.

http://www.inform.kz/kz/aleksandr-kasachev-zhetisu-borisi-atandy_a3018754