Жібек Құламбаева ITF W35 турнирінің жартылай финалына шықты

Теннисші Жібек Құламбаева Тунистің Хаммамет қаласында өтіп жатқан  ITF W35 турнирінің жартылай финалына шықты, деп хабарлады Қазақстан теннис федерациясы.

Спортшы алдымен дүниежүзілік рейтингіде 1351-орында тұрған франциялық Эмма Маззониден 6:0, 6:2 есебімен басым түсті. Одан кейін екінші айналымда әлемнің 362-інші, осы жарыстың 4-ракеткасы, швейцариялық Сюзан Бандеччиді аса тартысты бәсекеде 6:3, 1:6, 7:6 (7:4) есебімен жеңді.

Құламбаеваның ширек финалдағы кездесуі де оңайға түскен жоқ. Бұл жолы ол рейтингіде 753-сатыдағы ресейлік Диана Демидовадан 7:6 (8:6), 6:4 есебімен айласын асырды.

Енді Жібек Құламбаева финалға шығу үшін әлемнің 790-ракеткасы, жапониялық Икуми Ямадзакимен кездеседі.