يسلامبەك سالجانوۆ: «ءبىزدىڭ ماقسات — قازاق ات سپورتىن الەمدىك دەڭگەيگە كوتەرۋ»

11 ناۋرىز كۇنىۇلتتىق سپورت قاۋىمداستىعىنىڭ پەزيدەنتى يسلامبەك سالجانوۆ ەلىمىزگە ارنايى ساپارمەن كەلگەن الەمدىك تانىمال جوكەي، حالىقارالىق جارىستاردىڭ بىرنەشە دۇركىن جەڭىمپازى باۋىرجان مىرزاباەۆپەن كەزدەستى.

تاراپتار ەلىمىزدەگى ۇلتتىق سپورت تۇرلەرى دامۋىنىڭ قازىرگى جاعدايى مەن بۇل سالاداعى ۇزدىك الەمدىك تاجىريبەنى ەنگىزۋ سياقتى ماسەلەلەردى تالقىلادى. سونىمەن بىرگە، قازىر گەرمانيادا تۇرىپ جاتقان سپورتشى ەۋروپا ەلدەرىندەگى قازاق دياسپوراسى تاراپىنان ۇلتتىق سپورت تۇرلەرىن ناسيحاتتاۋعا قىزىعۋشىلىق بار ەكەنىن جەتكىزدى.

ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ قاۋىمداستىقتىڭ ەلىمىزدە 2024 جىلى وتەتىن V دۇنيەجۇزىلىك كوشپەندىلەر ويىندارىنا دايىندىق جۇمىستارى تۋرالى ايتىپ، تانىمال جوكەيدى جەرگىلىكتى سپورتشىلارمەن جانە اتبەگىلەرمەن تاجىريبە الماسۋعا شاقىردى.

كەزدەسۋ سوڭىندا يسلامبەك سالجانوۆ داڭقتى سپورتشىعا قاۋىمداستىق اتىنان قازاق ات سپورتىن الەمدە ناسيحاتتاۋعا قوسقان ۇلەسى ءۇشىن العىس حات تابىس ەتتى.

باۋىرجان مىرزاباەۆ 1992 جىلى الماتى وبلىسى كەربۇلاق اۋدانىنا قاراستى شۇبار اۋىلىندا دۇنيەگە كەلگەن.

2009 جىلى چەحيادا 3 جىلدىق جوكەيلەر مەكتەبىنە ءتۇستى. 2012 جىلى كاسىبي شاباندوز ليتسەنزياسىن الىپ، چەحيادا 35 بايگەنىڭ جەڭىمپازى اتاندى.

سونىمەن بىرگە، الەمدە ەڭ قىزۋ بايگەلەر وتەتىن جاپونيا چەمپيوناتتارىنىڭ بىرنەشە مارتە چەمپيونى اتاعىن جەڭىپ الدى.

2015 جىلى قازاقستان اتىنان ۇشقىر بايگەدەن ەۋروپا چەمپيوناتىنا قاتىسىپ، باس جۇلدەنى يەلەندى.

2017 جىلدان بەرى گەرمانيادا تۇرىپ جاتىر. سول ەلدە 100-دەن استام بايگەنىڭ جەڭىمپازى اتانىپ، نەمىس تاريحىندا بۇرىن-سوڭدى بولماعان رەكوردتى جاڭارتتى.

داستان كەنجالين،

استانا