قازاقستاننىڭ العاشقى راۋندتا وينايتىن قارسىلاستارى انىقتالدى
28 مامىردا تەننيستەن فرانتسيانىڭ اشىق چەمپيوناتى – «رولان گارروس 2023» ءتۋرنيرى باستالادى. وسىعان بايلانىستى ايەلدەر مەن ەرلەر اراسىنداعى جەكەلەي سىنداعى جەرەبە تارتۋ ءراسىمىنىڭ ناتيجەلەرى بەلگىلى بولدى.
قازاقستاننىڭ ءبىرىنشى، الەمنىڭ 4-راكەتكاسى ەلەنا رىباكينا ىرىكتەۋ كەزەڭدەرىنەن ءساتتى وتكەن (كۆاليفايەر) نەمەسە ىرىكتەۋ كەزەڭىنىڭ سوڭعى كەزدەسۋىندە جەڭىلگەن تەننيسشىمەن (لاكي-لۋزەر) كەزدەسەدى.
يۋليا پۋتينتسەۆا ءبىرىنشى اينالىمدا بەلگيالىق مارينا زانەۆسكايامەن (88-راكەتكا) وينايدى.
ال ەرلەر اراسىندا الەكساندر بۋبليك تە العاشقى راۋندتا كۆاليفايەرمەن نەمەسە لاكي-لۋزەرمەن كورتقا شىعادى.
بۇگىن قازاقستاننىڭ ەكىنشى، الەمنىڭ 147-راكەتكاسى تيموفەي سكاتوۆ «رولان گارروستىڭ» ىرىكتەۋ سايىسىنىڭ فينالىندا نەگىزگى تۋرنيرگە جولدامانى ساراپقا سالادى. ول برازيليالىق مەليگەني رودريگەس الۆەس فەليپەمەن (165-راكەتكا) كەزدەسەدى. بۇعان دەيىن قازاقستاندىق تەننيسشى ىرىكتەۋ سايىسىنىڭ العاشقى ەكى ماتچىندا جەڭىسكە جەتتى.
قازاقستاندىق تەننيسشى ىرىكتەۋ سايىستارىنىڭ جارتىلاي فينالىندا الەمنىڭ 119-راكەتكاسى، فينليانديالىق وتتو ۆيرتانەندى ۇتتى.
وسى ماتچ تۋرالى ايتساق، ءبىرىنشى پارتيادا فين تەننيسشىسى 6:4 ەسەبىمەن باسىم ءتۇستى. ەسەسىنە ەكىنشى سەتتە قازاقستاندىق سپورتشى 6:2 ەسەبىمەن ەسە قايىردى. ول ءۇشىنشى، شەشۋشى پارتيادا دا 3:0 ەسەبىمەن شىقتى. بۇدان كەيىن و.ۆيرتانەن تارازى باسىن تەڭەستىردى. دەگەنمەن سكاتوۆ ماتچتى تاعى ءبىر برەيكپەن تۇيىندەدى. ەسەپ – 7:5.
ەكى ساعات 45 مينۋتقا سوزىلعان تارتىستى باسەكە بارىسىندا تيموفەي 12 برەيك-پوينتتىڭ بەسەۋىن پايدالاندى.
ەندى بۇگىن جوعارىدا ايتقانىمىزداي، سكاتوۆ ىرىكتەۋ سايىستارىنىڭ فينالىندا الەمنىڭ 165-راكەتكاسى مەليگەني رودريگەس الۆەس فەليپەمەن وينايدى. ەگەر تيموفەي برازيليالىق تەننيسشىنى ۇتسا، العاش رەت رولان گارروستىڭ نەگىزگى دوداسىنا جولداما الادى.
داستان كەنجالين،
استانا