ارگەنتينا اسىق اتۋ ويىنىن ۇيرەنىپ جاتىر

قازان ايىنىڭ 9–10 كۇندەرى ماجارستاندا ماجار – قازاق ەتنوسپورت جانە مادەني اسسوتسياتسياسىنىڭ وكىلدەرى — جانارگۇل باقتىگەرەيقىزى مەن بالاج گونتەر ارگەنتينادان كەلگەن  فرانتسيسكو گيسلەتتي، مارتين مارينو جانە ماتەو بيلباوعا قازاق حالقىنىڭ باي مادەني مۇراسىنىڭ ءبىر بولىگى سانالاتىن ءداستۇرلى ۇلتتىق ويىنى اسىق اتۋ مەن قىرعىزدىڭ وردو ويىندارىن ۇيرەتتى.

بۇل كەزدەسۋ تەك مادەني تانىسۋ ەمەس، حالىقتار اراسىنداعى تاريحي تامىرلاستىق پەن رۋحاني ساباقتاستىقتىڭ دا ايقىن كورىنىسى بولدى. ارگەنتينالىقتار ۇلتتىق ويىنداردىڭ ەرەجەلەرىمەن تانىسىپ قانا قويماي، ءوزارا جارىسىپ، ويىندى تاجىريبە جۇزىندە دە سىناپ كوردى.

بالاج گونتەر سوڭعى جىلدارى اسىق اتۋ ويىنىن ەۋروپا ەلدەرىندە كەڭىنەن ناسيحاتتاپ، ونىڭ دامۋىنا جانە حالىقارالىق دەڭگەيدە تانىلۋىنا ەلەۋلى ۇلەس قوسىپ جۇرگەن ماجار جىگىتى. ول ەتنوسپورت ارقىلى حالىقتاردىڭ مادەني بايلانىسىن نىعايتۋعا، ءداستۇر مەن قۇندىلىقتاردى ساقتاۋعا ەرەكشە كوڭىل بولەدى.

ارگەنتينالىق قوناقتار قازاقتىڭ ۇلتتىق ويىندارىنا زور قىزىعۋشىلىق تانىتىپ، اسىق اتۋ ويىنىنىڭ ەرەكشەلىكتەرىنە ءتانتى بولدى. ولار ءوز ەلدەرىندە كەڭىنەن تانىمال La payana جانە La taba ويىندارىنىڭ قازاقتىڭ بەس اسىق ويىنىمەن وتە ۇقساستىعىن اتاپ ءوتىپ، مۇنداي مادەني ۇقساستىقتار حالىقتار اراسىنداعى ورتاق رۋحاني قۇندىلىقتاردىڭ بار ەكەنىن كورسەتتى.

قوناقتار ءوز سوزدەرىندە كەلەر جىلى قىرعىزستاندا وتەتىن كوشپەندىلەر ويىندارىنا قاتىسىپ، تاجىريبە المااساتىندىعىن، سونداي-اق ارگەنتينادا قازاقتىڭ ۇلتتىق ويىندارىن ناسيحاتتاپ، دامىتۋعا نيەتتى ەكەنىن جەتكىزدى. بۇل باستاما قازاق مادەنيەتىنىڭ الەمدىك دەڭگەيدە تانىلۋىنا باعىتتالعان ماڭىزدى قادامداردىڭ ءبىرى بولىپ تابىلادى.

سونىمەن قاتار، ماجار – قازاق ەتنوسپورت جانە مادەني اسسوتسياتسياسىنىڭ تاعى ءبىر وكىلى، ماجار ازاماتى اتيللا ۆاش ءوز ەلىندە اسىق اتۋ مەن ماجار حالقىنىڭ كونە ۇلتتىق ويىنى Golyózás-تى دارىپتەپ، جاستار اراسىندا كەڭىنەن ناسيحاتتاۋ ماقساتىندا ارنايى كوماندا قۇرىپ، ەتنوسپورت قوزعالىسىن دامىتۋعا بەلسەندى تۇردە اتسالىسىپ ءجۇر.

ايتا كەتەرلىگى، قازاقستان رەسپۋبليكاسىنىڭ ماجارستانداعى ەلشىلىگىنىڭ قىزمەتكەرى قايرات قامباروۆ جۋىردا قازاقستاننان ارنايى اسىقتار اكەلىپ، ەلشىلىك اتىنان تارتۋ ەتكەن بولاتىن. سول كيەلى اسىقتار ارگەنتينالىق قوناقتارعا ەستەلىك رەتىندە تابىس ەتىلدى. بۇل سىي قازاقتىڭ ەجەلگى داستۇرىندەگى «اسىعىڭ الشىسىنان ءتۇسسىن!» دەگەن يگى تىلەكپەن بىرگە بەرىلىپ، دوستىق پەن ىزگى نيەتتىڭ سيمۆولىنا اينالدى.

ماجار جەرىندە وتكەن بۇل كەزدەسۋ قازاق مادەنيەتىنىڭ الەمدىك دەڭگەيدە كەڭىنەن تانىلۋىنا، ال ۇلتتىق ويىنداردىڭ — حالىقتار اراسىنداعى رۋحاني كوپىرگە اينالۋىنا ايقىن دالەل بولدى.

مۇساعالي تاسقاليەۆ،

اقتوبە

فوتو: اۆتور