قىرعىزستان اقىرى قاتەلىگىن مويىندادى

قىرعىزستان قازاقستاننىڭ VI دۇنيەجۇزىلىك كوشپەلىلەر ويىندارىنداعى جالپىكوماندالىق ەسەپتە ءبىرىنشى ورىن العانىن اقىرى مويىندادى.

ءبىر تاۋلىك ويلانىپ، تولعانىپ، قازاقستان سپورتشىلارىنىڭ 32 التىن، 20 كۇمىس جانە 22 قولا مەدالدى جەڭىپ العانىن مويىنداۋعا ءماجبۇر بولدى. بۇل تۋرالى قىرعىز رەسپۋبليكاسى پرەزيدەنتىنىڭ ءباسپاسوز حاتشىسى اسقات الاگوزوۆ حابارلادى. ول VI دۇنيەجۇزىلىك كوشپەلىلەر ويىندارىنىڭ قورىتىندىسىنداعى مەدال ەسەبىنە قاتىستى پىكىر ءبىلدىرىپ،  جارىستىڭ جاقسى وتكەنىن، دەگەنمەن كوماندالىق ەسەپ بويىنشا مەدالداردى ساناۋ كەزىندە تەحنيكالىق ايىرماشىلىق شىعا كەلگەنىن ايتتى.

«بۇگىن ۇيىمداستىرۋ كوميتەتى قازاقستاننىڭ ءۇش سپورتشىسىنىڭ ارقايسىسىنىڭ مەدالىن جەكە ەسەپتەۋ تۋرالى شەشىم قابىلدادى. وسىلايشا جالپى كوماندالىق ەسەپتە قازاقستان ءبىرىنشى ورىنعا يە بولدى. قازاق باۋىرلارىمىزدى جەڭىسىمەن قۇتتىقتايمىز!»، دەدى ول.

ول مەدال سانى سپورتتىڭ ءبىر جاعى عانا ەكەنىن، جارىستار ءوزارا قۇرمەت پەن ادال باسەكە جاعدايىندا بولسا، مىنە سول باستى جەتىستىك دەپ باعا بەردى.

ەندى نە ايتامىز؟! قىرعىزستان اۋەلى ءوزىن جالپىكوماندالىق ەسەپتە ءبىرىنشى ورىنعا شىعاردى. سودان كەيىن كوماندالىق ەسەپ دۇنيەجۇزىلىك كوشپەلىلەر ويىندارىنىڭ تۇجىرىمداماسى بويىنشا ەسەپتەلمەيتىنىن مالىمدەدى. ەندى مىنە، كوشپەلىلەر ويىندارىندا جالپىكوماندالىق ەسەپ بار ەكەن عوي، دەگەن سىڭايدا جۇلدە سانىن قايتىپ ەسەپتەپ، قاتەلىگىن مويىندادى. ءسويتىپ، كوماندالىق ەسەپتە ءبىر كۇندە ءۇش رەت ويىن وزگەرتىپ، بۇكىل الەم الدىندا ۇياتتىق جاسادى.

داستان كەنجالين،

استانا