Qyrǵyzstan aqyry qateligin moıyndady

Qyrǵyzstan Qazaqstannyń VI Dúnıejúzilik kóshpeliler oıyndaryndaǵy jalpykomandalyq esepte birinshi oryn alǵanyn aqyry moıyndady.

Bir táýlik oılanyp, tolǵanyp, Qazaqstan sportshylarynyń 32 altyn, 20 kúmis jáne 22 qola medaldi jeńip alǵanyn moıyndaýǵa májbúr boldy. Bul týraly Qyrǵyz Respýblıkasy Prezıdentiniń baspasóz hatshysy Asqat Alagózov habarlady. Ol VI Dúnıejúzilik kóshpeliler oıyndarynyń qorytyndysyndaǵy medal esebine qatysty pikir bildirip,  jarystyń jaqsy ótkenin, degenmen komandalyq esep boıynsha medaldardy sanaý kezinde tehnıkalyq aıyrmashylyq shyǵa kelgenin aıtty.

«Búgin uıymdastyrý komıteti Qazaqstannyń úsh sportshysynyń árqaısysynyń medalin jeke esepteý týraly sheshim qabyldady. Osylaısha jalpy komandalyq esepte Qazaqstan birinshi orynǵa ıe boldy. Qazaq baýyrlarymyzdy jeńisimen quttyqtaımyz!», dedi ol.

Ol medal sany sporttyń bir jaǵy ǵana ekenin, jarystar ózara qurmet pen adal báseke jaǵdaıynda bolsa, mine sol basty jetistik dep baǵa berdi.

Endi ne aıtamyz?! Qyrǵyzstan áýeli ózin jalpykomandalyq esepte birinshi orynǵa shyǵardy. Sodan keıin komandalyq esep Dúnıejúzilik kóshpeliler oıyndarynyń tujyrymdamasy boıynsha eseptelmeıtinin málimdedi. Endi mine, Kóshpeliler oıyndarynda jalpykomandalyq esep bar eken ǵoı, degen syńaıda júlde sanyn qaıtyp eseptep, qateligin moıyndady. Sóıtip, komandalyq esepte bir kúnde úsh ret oıyn ózgertip, búkil álem aldynda uıattyq jasady.

Dastan KENJALIN,

ASTANA