ءبىر اتانىڭ بالالارى تۇركىستاندا دوپ تەپتى

…سوناۋ 1991 جىلى دونكيحوتشىلاپ تازا قازاق بالالارىنان «نامىس» اتتى ۇلتتىق كاسىپقوي فۋتبول كلۋبىن قۇرىپ، قازاقستان چەمپيوناتىندا 5-6 جىل ويناعان سوڭ كلۋبىمىزدى دەمەيتىن جان نەمەسە مەكەمە تابىلماعاننان كەيىن 4-5 جىل تومەن قاراپ ءجۇردىم دە، قازاق فۋتبولىنا تالانت ىزدەۋ ارمانى ۇيىقتاتپاعان سوڭ، 2001 جىلى «ءبىر اتانىڭ بالالارى فۋتبول وينايدى!» دەگەن اتپەن ءبىر كوماندادا ءبىر عانا اتانىڭ بالالارى وينايتىن (جۇنىسباەۆتەر، ايدابولوۆتار) جارىس ويلاپ تاپتىم! وسى جارىستان تالاي تالانت ءوسىپ شىقتى. ەڭ مىقتىسى — جامبىل كوكەەۆ! بۇل جارىس بۇگىنگى تاڭدا تەك قازاق مەملەكەتىندە عانا بار!

سول جارىستىڭ مەرەكەلى 25-باسەكەلەرى كەشە عانا تاريحي تۇركىستان قالاسىندا بولىپ ءوتتى.

ءسوز باسىنان-اق وسى جارىستى تۇركىستانعا شاقىرعان، بارلىق اۋىرتپالىعىن كوتەرگەن تۇركىستان وبلىسىنىڭ اكىمدىگىنە، وبلىستىق ءماسليحاتىنا، سپورت باسقارماسىنا، ەرەكشە وبلىستىق فۋتبول فەدەراتسياسىنىڭ توراعاسى نۇرالى ابىشەۆ مىرزاعا باسىمدى ءيىپ، العىس ايتامىن!

قازاق سپورت ونەرىنىڭ تاريحىنا اتى وشپەستەي جازىلعان وكتيابر جارىلعاپوۆ اتىنداعى ستاديوندا وتكەن جارىسقا رەسپۋبليكامىزدىڭ بارلىق دەرلىك وبلىسىنان 32 كوماندا جينالدى. ەكى كۇن بويى ءبىر عانا وتباسى، ءبىر عانا جانۇيادان قۇرىلعان كوماندالار كەرەمەت جارىسقا قاتىستى. ستاديون تريبۋناسى دا كورەرمەندەرگە تولى بولدى.

جارىس قورىتىندىسىندا 3-ورىندى شىمكەنت قالاسىنان كەلگەن ەسەنباەۆتەر اۋلەتى، 2-ورىندى استانادان جينالعان داداحان اتا اۋلەتى، ال چەمپيوندىق اتاقتى تۇركىستان وبلىسىنىڭ ءبىر اتا اۋلەتى سىبانوۆتار جەڭىپ الدى.

جارىستى ۇيىمداستىرۋ القاسى جەكە-جەكە فۋتبولشىلاردى دا ماراپاتتادى: ۇزدىك ارداگەر ويىنشى — ءا.تىلەشوۆ (75 جاستا)، ۇزدىك ەڭ جاس ويىنشى — ءا.سەيداحمەت(10 جاستا)، ۇزدىك قاقپاشى — س.ادىلەت، ۇزدىك قورعاۋشى — ا.ەسەنباەۆ، جارىستىڭ شەبەر ويىنشىسى — ا.داداحان بولدى. چەمپيوندار مەن جۇلدەگەرلەردى تاماشا تۇعىرعا شىعارىپ ماراپاتتاپ، چەمپيوندار باس كۋبوكتى توبەلەرىنە كوتەرگەندە چەمپيوندار ليگاسىنىڭ ۇردىسىمەن اسپاننان التىن جاۋىن جاۋدى.

جوعارىدا ايتقانداي، مۇنداي جارىس تەك قازاقستاندا عانا بار. سوندىقتان دا رەسمي جارىس يەسى بوپ تابىلاتىندىقتان وسى جارىستى حالىقارالىق ارەناعا شىعارۋدى ارمانداپ ءجۇرمىن. اۋەلدە مۇسىلمان ەلدەرى نەمەسە تۇركى ەلدەرىنىڭ اراسىندا جارىس وتكىزەر بولساق، بۇل تالاسسىز قىزىق جارىس الەمگە دە تەز تارار ەدى. ەگەر ۇيىمداستىرۋىن جوعارى دەڭگەيگە جەتكىزىپ، جۇلدە قورىن قوماقتى ەتەتىن بولساق، بولاشاقتا شاۋ تارتقان رونالدۋدىڭ ءوز بالالارىمەن، مەسسيدىڭ ءوز ۇلدارىمەن، بەكحەمنىڭ ءوز ۇرپاعىمەن كەلىپ وينامايتىنىنا كىم كەپىل؟!!

فۋتبولدا الەم چەمپيوناتى ءوتىپ جۇرگەنىنە كەلەسى الەم چەمپيوناتى وتەتىن جىلى 100 جىل بولادى ەكەن. ياعني، ءبىز الەم چەمپيوناتىن وتكىزىپ ەشكىمدى تاڭ قالدىرا المايمىز. ال، ەگەر «ءبىر اتانىڭ بالالارى فۋتبول وينايدى!» اتتى جوبادان اۋەلى حالىقارالىق جارىس، بىرتە-بىرتە الەم چەمپيوناتىن ۇيىمداستىرساق، قازاقستاننىڭ فۋتبول الەمىندە ەشكىم ورتاق بولا الماس ءوز جوباسى بولار ەدى!

مەنىڭ ارمانىم وسىنداي. كەرەك دەسەڭىزدەر بۇل جوبا — بۇكىل قازاق مەملەكەتىنىڭ ارمانى بولۋعا لايىق ەمەس پە؟!!

 

نەسىپ جۇنىسباي ۇلى،

قازاقستاننىڭ ەڭبەك سىڭىرگەن قايراتكەرى،

سپورت ءجۋرناليسى، جازۋشى، سپورت قايراتكەرى