Bir atanyń balalary Túrkistanda dop tepti

…Sonaý 1991 jyly Donkıhotshylap taza qazaq balalarynan «NAMYS» atty Ulttyq kásipqoı fýtbol klýbyn quryp, Qazaqstan chempıonatynda 5-6 jyl oınaǵan soń klýbymyzdy demeıtin jan nemese mekeme tabylmaǵannan keıin 4-5 jyl tómen qarap júrdim de, qazaq fýtbolyna talant izdeý armany uıyqtatpaǵan soń, 2001 jyly «BIR ATANYŃ BALALARY FÝTBOL OINAIDY!» degen atpen bir komandada bir ǵana atanyń balalary oınaıtyn (Júnisbaevter, Aıdabolovtar) jarys oılap taptym! Osy jarystan talaı talant ósip shyqty. Eń myqtysy — Jambyl Kókeev! Bul jarys búgingi tańda tek Qazaq memleketinde ǵana bar!

Sol jarystyń merekeli 25-básekeleri keshe ǵana tarıhı Túrkistan qalasynda bolyp ótti.

Sóz basynan-aq osy jarysty Túrkistanǵa shaqyrǵan, barlyq aýyrtpalyǵyn kótergen Túrkistan oblysynyń ákimdigine, oblystyq máslıhatyna, sport basqarmasyna, erekshe oblystyq fýtbol federaııasynyń tóraǵasy Nuraly Ábishev myrzaǵa basymdy ıip, alǵys aıtamyn!

Qazaq sport óneriniń tarıhyna aty óshpesteı jazylǵan Oktıabr Jarylǵapov atyndaǵy stadıonda ótken jarysqa respýblıkamyzdyń barlyq derlik oblysynan 32 komanda jınaldy. Eki kún boıy bir ǵana otbasy, bir ǵana januıadan qurylǵan komandalar keremet jarysqa qatysty. Stadıon trıbýnasy da kórermenderge toly boldy.

Jarys qorytyndysynda 3-oryndy Shymkent qalasynan kelgen ESENBAEVTER áýleti, 2-oryndy Astanadan jınalǵan DADAHAN ATA áýleti, al chempıondyq ataqty Túrkistan oblysynyń bir ata áýleti SYBANOVTAR jeńip aldy.

Jarysty uıymdastyrý Alqasy jeke-jeke fýtbolshylardy da marapattady: úzdik ardager oıynshy — Á.TILEShOV (75 jasta), úzdik eń jas oıynshy — Á.SEIDAHMET(10 jasta), úzdik qaqpashy — S.ÁDILET, úzdik qorǵaýshy — A.ESENBAEV, jarystyń sheber oıynshysy — A.DADAHAN boldy. Chempıondar men júldegerlerdi tamasha tuǵyrǵa shyǵaryp marapattap, chempıondar bas kýbokty tóbelerine kótergende Chempıondar lıgasynyń úrdisimen aspannan altyn jaýyn jaýdy.

Joǵaryda aıtqandaı, mundaı jarys tek Qazaqstanda ǵana bar. Sondyqtan da resmı jarys ıesi bop tabylatyndyqtan osy jarysty HALYQARALYQ ARENAǴA shyǵarýdy armandap júrmin. Áýelde musylman elderi nemese Túrki elderiniń arasynda jarys ótkizer bolsaq, bul talassyz qyzyq jarys álemge de tez tarar edi. Eger uıymdastyrýyn joǵary deńgeıge jetkizip, júlde qoryn qomaqty etetin bolsaq, bolashaqta shaý tartqan Ronaldýdyń óz balalarymen, Messıdiń óz uldarymen, Bekhemniń óz urpaǵymen kelip oınamaıtynyna kim kepil?!!

Fýtbolda álem chempıonaty ótip júrgenine kelesi álem chempıonaty ótetin jyly 100 jyl bolady eken. Iaǵnı, biz álem chempıonatyn ótkizip eshkimdi tań qaldyra almaımyz. Al, eger «BIR ATANYŃ BALALARY FÝTBOL OINAIDY!» atty jobadan áýeli halyqaralyq jarys, birte-birte ÁLEM ChEMPIONATYN UIYMDASTYRSAQ, Qazaqstannyń fýtbol áleminde eshkim ortaq bola almas О́Z JOBASY bolar edi!

Meniń armanym osyndaı. Kerek deseńizder bul joba — búkil Qazaq memleketiniń armany bolýǵa laıyq emes pe?!!

 

Nesip JÚNISBAIULY,

Qazaqstannyń eńbek sińirgen qaıratkeri,

sport jýrnalısi, jazýshy, sport qaıratkeri