جارىستا پارا دزيۋدوشىلار جاراپ تۇر

V ازيا پارا ويىندارىنىڭ كەزەكتى جارىس كۇنىندە قازاقستان ۇلتتىق قۇراماسىنىڭ سپورتشىلارى پارا ساداق اتۋدان، پارا ۇستەل تەننيسىنەن، پارا دزيۋدودان، پارا ۆەلوسپورتتان (شوسسە)، پارا جۇزۋدەن، پارا پاۋەرليفتينگتەن، پارا تاەكۆوندودان، پارا جەڭىل اتلەتيكادان، ۆولەيبولدى وتىرىپ ويناۋدان سىنعا ءتۇستى.

پارا دزيۋدودان ەل قۇراماسىنىڭ قورجىنى تاعى ءۇش التىن، ءبىر كۇمىس جانە ءتورت قولا مەدالمەن تولىقتى.

J2 كلاسىندا 95 كەلىدەن اسا سالماق دارەجەسىندە جۇرقامىرزا شۇكىربەكوۆ يران بالۋانى كحەيروللاحزادەن ۆارزي موحامماد رەزانى جەڭىپ، چەمپيون اتاندى.

J1 كلاسىندا تاتاميگە شىققان اقتoلقىن سەيىلبەكوۆا (70+كگ) دە بارلىق ءتورت قارسىلاسىن جەڭىپ، التىن مەدال يەلەندى. سول سياقتى J2 كلاسىندا 70 كەلىدەن اسا سالماقتا بەلدەسكەن زارينا رايفوۆا دا ءتورت قارسىلاسىنىڭ بارلىعىنان باسىم ءتۇسىپ، قۇرمەت تۇعىرىنىڭ ەڭ بيىك ساتىسىنا كوتەرىلدى. سونداي-اق J2 كلاسىندا 95 كەلىگە دەيىنگى سالماقتا ونەر كورسەتكەن جانبوتا امانجول كۇمىس مەدال يەلەنسە، J2 كلاسىندا كۇش سىناسقان ەرمەك نۇرقاباەۆ (95 كگ) جارىستىڭ قولا جۇلدەگەرى اتاندى.

ەرلان وتەپوۆ J1 كلاسىندا 95 كەلىدەن اسا سالماق دارەجەسىندە قولا مەدال يەلەندى. J1 كلاسى بويىنشا باعلانبەك وڭالبەك (90+كگ) قولا مەدالگە يە بولدى. ال J2 كلاسىندا سىنعا تۇسكەن ايالا مەرەكە (70 كگ ) قولا مەدال ءۇشىن وتكەن بەلدەسۋدە ءۇندىستان سپورتشىسىن جەڭىپ، جارىستىڭ جۇلدەگەرى اتاندى.

پارا ءجۇزۋ ءالي تۇرعانبەكوۆ SB4 ساناتىنداعى فينالدىق جارىستا براسس ادىسىمەن 100 مەترگە 1 مينۋت 44.26 سەكۋندتا ءجۇزىپ، ەكىنشى ورىنعا يە بولدى. ال S10 ساناتىندا سىنعا تۇسكەن دياس كەنجەبەك 100 مەترگە باتتەرفلياي ادىسىمەن 1 مينۋت 05.50 سەكۋندتا جەتىپ،  مارەگە ءۇشىنشى بولىپ جەتتى. بۇعان دەيىن ول S10 ساناتى بويىنشا 100 مەترگە 1 مينۋت 1،98 سەكۋندتا ءجۇزىپ،  مارەگە ءبىرىنشى بولىپ جەتىپ، پارا ازيادا چەمپيونى اتانىپ، كەشەندى جۇزۋدەن وتكەن فينالدىق جارىستا 200 مەتردى 2 مينۋت 21.61 سەكۋندتا ءجۇزىپ، كۇمىس جۇلدە العان ەدى. ءسويتىپ، سپورتشى ءبىر جارىستا ءۇش جۇلدەنى جەڭىپ الدى. ال الينا دۋبينينا، رومان پوتاپوۆ، ءامىر مۇراتبەكوۆ، ايسۇلتان كۇلكاەۆ، زارينا مىرزاعاليەۆا، بەكاسىل قاسىمبەك پەن نۇرداۋلەت دۇيسەنباەۆ كوڭىل كونشىتەرلىك ناتيجە كورسەتپەدى. ولار S8، SB5، SB11، SM11 ساناتىندا ەركىن ستيلدە جانە براسس ادىسىمەن جۇزۋدەن وتكەن فينالدا ءتورتىنشى، بەسىنشى جانە جەتىنشى ورىنداردى قاناعات تۇتتى.

پارا جەڭىل اتلەتيكادان ەرلەر اراسىندا F36 كلاسىندا يادرونى لاقتىرۋ سايىسىندا داستان مۇكاشبەكوۆ يادرونى 15 مەتر 47 سانتيمەترگە لاقتىرىپ، كۇمىس مەدال يەلەندى. ال يۆان زەلەزنياك 12.71 مەتر ناتيجەمەن قولا جۇلدەگەر اتاندى.

پارا ساداق اتۋدان نۇرشات تولەۋقاسىم قولا مەدال جەڭىپ الدى.ول ەرلەر اراسىنداعى W1 كلاسىندا تايلاند سپورتشىسى سۋپحاۆات سامۋتچاياكيدجدى 6:2 ەسەبىمەن جەڭدى.

بۇعان دەيىن نۇرشات تولەۋقاسىم شيرەك فينالدا وڭتۇستىك كورەيا سپورتشىسىن 7:3 ەسەبىمەن جەڭىپ، جارتىلاي فينالدا قىتاي وكىلىنە 0:6 ەسەبىمەن ەسە جىبەرگەن بولاتىن.

پارا پاۋەرليفتينگتەن دە وتانداستارىمىز جۇلدە الا المادى. ايەلدەر اراسىندا 73 كەلىگە دەيىنگى سالماقتا راۋشان قويشىباەۆا 113 كەلى ناتيجەمەن ءتورتىنشى ورىن يەلەندى. ال ەرلەر اراسىندا 88 كەلىگە دەيىنگى سالماقتا راحمەتجان حاماەۆ 206 كەلى كوتەرىپ، بەسىنشى ورىنعا شىقتى. سونداي-اق ەرلەر اراسىندا 97 كەلىگە دەيىنگى سالماقتا ءادىلجان باۋتوۆ 204 كەلى ناتيجەمەن بەسىنشى ورىن الدى. وسى سالماقتا ەل نامىسىن قورعاعان اسحات جۇمانوۆ 180 كەلى كورسەتكىشپەن سەگىزىنشى ورىنعا جايعاستى. پارا تاەۆوندودان K44 كلاسى بويىنشا 80 كەلىگە دەيىنگى سالماقتا ونەر كورسەتكەن نۇرلان دومباەۆ العاشقى جەكپە-جەگىندە جاپونيالىق چيكارا يتودى جەڭىپ، جارتىلاي فينالعا جولداما العان ەدى. الايدا جارتىلاي فينالدا كورەيالىق چجۋ چونحىمگە 0:2 ەسەبىمەن ەسە جىبەردى.

K44 كلاسىندا 80 كەلىدەن اسا سالماقتا سىنعا تۇسكەن جانبولات كازيەۆ جۇبانىش جەكپە-جەگىندە يراك وكىلى شاد حوشناۆقا 2:1 ەسەبىمەن جول بەردى. K44 كلاسىندا سىنعا تۇسكەن ايكەنجە داۋلەتشينا (65+ كگ) جۇبانىش جەكپە-جەگىندە يران وكىلىنەن ەسە جىبەرىپ، جارىستى اياقتادى.

ۆولەيبولدى وتىرىپ ويناۋدان ۇلتتىق كوماندا سپورتشىلارى توپتىق كەزەڭدە يران كومانداسىنان 0:3 ەسەبىمەن جەڭىلىپ قالدى. وسىعان دەيىن ۇلتتىق كوماندا تايلاند كومانداسىن جەڭىپ، جارىستى جاقسى باستاعان ەدى.

پارا ۇستەل تەننيسىنەن دە جاعدايىمىز ءماز بولماي تۇر. بۇل سىندا ەرلەر دە ايەلدەر دە قارسىلاستارىنىڭ بارىنەن جەڭىلدى. وكىنىشكە قاراي، ارالاس جۇپ بولىپ ويناعاننىڭ وزىندە دە ارۋجان عينياتوۆا، راۋشان ورىنباەۆا، بالزيا تاش، ءالي ماقۇلبەكوۆ، بالزيا تاش، يگور حۋدياكوۆ، ارداق نۇرماعامبەتوۆ، الەكساندرا ستەپانوۆا، ازامات ورازبەك پەن تالعات ەرەكەەۆ بىردە-ءبىر ۇپاي جيناي العان جوق. قازىر جارىستا گونكونگ، جاپونيا، قىتاي، فيليپپين كوماندالارىنىڭ  وكىلدەرى ۇپاي جيناپ جاتىر.

ءبىر قۋانىشتىسى، التىناي ەرجانقىزى مەن مارات سۇرتىباەۆ پارا ۇستەل تەننيسىنەن ارالاس جۇپتىق سىندا XD20 كلاسىندا پارا ازيا ويىندارىنىڭ جارتىلاي فينالىنا شىقتى. ولار گونكونگتىڭ سپورتشىلارىمەن وينايدى.

ۆولەيبولدى وتىرىپ ويناۋدان وتانداستارىمىز جارتىلاي فينالدا يراك قۇراماسىن 3:2 ەسەبىمەن جەڭىپ، فينالعا شىقتى. وسىعان ۇلتتىق قۇراما تايلاند كومانداسىن جەڭىپ، يران قۇراماسىنا 0:3 ەسەبىمەن جەڭىلگەن ەدى.

ەندى قازاقستان قۇراماسى التىن مەدال ءۇشىن سىنعا تۇسەدى.

پارا جەڭىل اتلەتيكادان ايسۇلۋ سۇلەيمەنوۆا 100 مەترگە جۇگىرۋدەن ازيانىڭ جاڭا رەكوردىن جاڭارتتى. ول جارىستارعا ەكى اياقتىڭ زاقىمدانۋىنا بايلانىستى ارنايى جۇگىرۋ پروتەزدەرىن پايدالاناتىن سپورتشىلارعا ارنالعان T62 ساناتىندا قاتىسىپ ءجۇر. الايدا ءوز ساناتىندا باسقا ادامدار بولماعاندىقتان، ول ءبىر اياقتىڭ زاقىمدانۋىنا بايلانىستى پروتەز پايدالاناتىن سپورتشىلار باق سىنايتىن T64 ساناتىنىڭ وكىلدەرىمەن بىرگە جارىستى.

فينالدا ول 100 مەتردى 16،18 سەكۋندتا جۇگىرىپ، جالپى ەسەپتە بەسىنشى ورىنعا يە بولدى. سونىمەن قاتار، بۇل ناتيجە ونىڭ T62 ساناتىندا ازيانىڭ جاڭا رەكوردى رەتىندە تىركەلدى.

وسىلايشا، ايسۇلۋ سۇلەيمەنوۆا بىرىككەن جارىستا بەسىنشى ورىن العانىمەن، ءوز ساناتىندا قۇرلىقتىق رەكورد جاساپ، ماڭىزدى جەتىستىككە جەتتى.

قازىر ەل قۇراماسىندا 10 التىن جۇلدە بار. بۇل مەدالدى پارا دزيۋدودان جۇرقامىرزا شۇكىربەكوۆ، پارا نىسانا كوزدەۋدەن ەركىن عابباسوۆ، پارا پاۋەرليفتينگتەن داۆيد دەگتيارەۆ، پارا دزيۋدودان يبراگيم نۇرماحان ۇلى، بەكسۇلتان قۇلمىرزا، اقتولقىن سەيىلبەكوۆا، زارينا رايفوۆا، پارا جۇزۋدەن دياس كەنجەبەك، پارا ۆەلوسپورتتان نايل ەرمۇحانبەت پەن اناستاسيا كالاۋس جەڭىپ الدى.

جارىستار ءالى اياقتالماعانىن جانە الدا بىرنەشە جارىس كۇنى بار ەكەنىن ەسكەرسەك، سپورتشىلاردىڭ جۇلدە قورجىنىن ودان ءارى تولىقتىرۋعا مۇمكىندىگى مول.

سوڭعى كەلىپ تۇسكەن مالىمەتكە قاراعاندا، التىناي ەرجانقىزى مەن مارات سۇرتىباەۆ پارا ۇستەل تەننيسىنەن قولا مەدال جەڭىپ الدى.

ول مارات سۇرتىباەۆپەن بىرگە XD20 كلاسىنداعى ارالاس جۇپتىق سىندا ونەر كورسەتىپ، جارتىلاي فينالعا دەيىن جەتتى.

ەكەۋى جارتىلاي فينالدا گونكونگ وكىلدەرى لام يان يۋ مەن ۆونگ حون لاممەن وينادى. بىراق بۇل ويىندا قارسىلاستار 3:0 ەسەبىمەن جەڭىسكە جەتتى.

ءبىزدىڭ سپورتشىلار V ازيا پارا ويىندارىنىڭ قولا جۇلدەگەرى اتاندى.

وسىلايشا، التىناي ەرجانقىزى جۇلدە قورجىنىن تاعى ءبىر مەدالمەن تولىقتىردى.

 

داستان كەنجالين،

استانا